¹ Laakeeri bwe yaboine nga tazaalira Yakobo baana, Laakeeri n'akwatirwa Eiyali mugande we; n'akoba Yakobo nti Mpa abaana, oba tompe, n'afa. ² N'obusungu bwa Yakobo ne bubuubuukira Laakeeri: n'atumula nti Nze ndi mu kifo kya Katonda, eyakwimire ebibala eby'ekida? ³ N'atumula nti bona omuzaana wange Bira, yingira gy'ali; Kaisi azaalire ku makumbo gange, era nzeena nfune abaana mu iye. ⁴ N'amuwa Bira omuzaana we okumukwa: Yakobo n'ayingira gy'ali. ⁵ Bira n'abba ekida, n'azaalira Yakobo omwana ow'obwisuka. ⁶ Laakeeri n'atumula nti Katonda ansaliire omusango, era ampuliire eidoboozi lyange, era ampaire omwana ow'obwisuka: Kyeyaviire amutuuma eriina lye Daani. ⁷ Bira omuzaana wa Laakeeri n'abba ekida ate, n'azaalira Yakobo omwana ow'obwisuka ow'okubiri. ⁸ Laakeeri n'atumula nti Megaine no mugande wange okumegana okw'amaani, era amegere: n'amutuuma eriina lye Nafutaali. ⁹ Leeya bwe yaboine ng'alekeire awo okuzaala, n'airira Zirupa omuzaana we, n'amuwa Yakobo okumukwa. ¹⁰ Zirupa omuzaana wa Leeya n'azaalira Yakobo omwana ow'obwisuka. ¹¹ Leeya n'atumula nti Kisa! n'amutuuma eriina lye Gaadi. ¹² Zirupa omuzaana wa Leeya n'azaalira Yakobo omwana ow'obwisuka ow'okubiri. ¹³ Leeya n'atumula nti Mboine omukisa! kubanga abawala banjetanga we mukisa: n'amutuuma eriina lye Asezi. ¹⁴ Lewubeeni n'ayaba mu naku mwe babbaire bakungulira eŋaanu, n'abona amadudayimu mu nimiro, n'agaleetera maye Leeya. Awo Laakeeri n'amukoba Leeya nti Mpa, nkwegayiriire, ku madudayimu ag'omwana wo. ¹⁵ N'amukoba iye nti Kigambo kitono okuntoolaku ibawange? era otaka okuntoolaku n'amadudayimu ag'omwana wange? Laakeeri n'amukoba nti Kyeyaviire agona naiwe obwire buno olw'amadudayimu ag'omwana wo. ¹⁶ Yakobo n'ava mu nimiro olw'eigulo, Leeya n'afuluma okumusisinkana, n'atumula nti Kikugwanira okuyingira gye ndi; kubanga mazima nkuweereire amadudayimu ag'omwana wange. N'agona naye obwire obwo. ¹⁷ Katonda n'awulira Leeya, n'abba ekida, n'azaalira Yakobo omwana ow'obwisuka ow'okutaanu. ¹⁸ Leeya n'atumula nti Katonda ampaire empeera yange, kubanga nawaire ibawamge omuzaana wange: n'amutuuma eriina lye Isakaali. ¹⁹ Leeya n'aba ekida ate, n'azaalira Yakobo omwana ow'obwisuka ow'omukaaga. ²⁰ Leeya n'atumula nti Katonda ampaire ekirabo eky'obugole ekisa; atyanu ibawange yatyamanga nanze kubanga muzaaliire abaana ab'obwisuka mukaaga: n'amutuuma eriina lye Zebbulooni. ²¹ Oluvannyuma n'azaala omwana ow'obuwala, n'amutuuma ariina Dina. ²² Katonda n'aijukira Laakeeri, Katonda n'amuwulira, n'aigula ekida kye. ²³ N'abba ekida, n'azaala omwana ow'obwisuka: n'atumula nti Katonda antoireku okuvumibwa kwange: ²⁴ n'amutuuma Eriina lye Yusufu, ng'atumula nti Mukama anyongereku omwana ogondi ow'obwisuka. ²⁵ Awo olwatuukire, Laakeeri bwe yamalire okuzaala Yusufu, Yakobo n'akoba Labbaani nti Nsindika njabe mu kifo ky'ewaisu, era mu nsi ey'ewaisu. ²⁶ Mpa bakaali bange n'abaana bange be nakuweerereryanga, neyabire: kubanga omaite okuweererya kwange kwe nakuweereryanga. ²⁷ Labbaani n'amukoba nti Kaakano obanga nboine ekisa mu maiso go, bba wano: kubanga nfumiintirirya nga Mukama yampaire omukisa ku bubwo. ²⁸ N'atumula nti Nsalira empeera yo, nzeena nagiwanga. ²⁹ N'amukoba nti Omaite bwe nakuweereryanga, era ebisibo byo bwe byabbaire nanze. ³⁰ Kubanga bye wabbaire nabyo nga nkaali kwiza bitono, era byeyongeire okubba ebingi; era Mukama akuwaire omukisa gye nakyukiranga yonayona: ne watyanu ndifuna di eby'enyumba yange nze era? ³¹ Natumula nti Naakuwa ki? Yakobo n'atumula nti Obulaku ky'ewampa: bw'olinkolera kino, nalisyanga ate ekisibo kyo, nakikuumanga. ³² Nabita watyanu mu kisibo kyo kyonakyona, nga ntolamu buli eyo bujagijagi n'eye bitanga, na buli ngirugavu mu ntama, n'egye bitanga n'egyo bujagijagi mu mbuli: era niiyo yabbanga empeera yange. ³³ Butyo obutuukirivu bwange bulimpozererya oluvanyuma, bw'oliiza olw'empeera yange eri mu maiso go: buli eteri ya bujagijagi oba eya bitanga mu mbuli, oba ngirugavu mu ntama, eyo bw'eriboneka nanze eribalibwa nga ngibbe. ³⁴ Labbaani n'atumula nti bona, nanditakire kibbe ng'ekigambo kyo bwe kiri. ³⁵ N'atoolamu ku lunaku olwo embuli enume egy biwuuga n'egye bitanga n'embuli enkali gyonagyona egyo bujagijagi n'eza bitanga, buli eyabbaireku eibala eryeru, n'engirugavu gyonagyona mu ntama, n'agiwa mu mukono gw'abaana be; ³⁶ n'ateekawo olugendo lwe naku isatu wakati we no Yakobo; Yakobo n'alunda ebisibo bya Labbaani ebyasigairewo. ³⁷ Yakobo n'atoola obusaale bw'omulibine omubisi, n'obw'omusakedi n'obw'omwalamoni; n'abusasambulaku enguudo egitukula, n'alabisa obutukuvu obwali ku busaale. ³⁸ N'asimba obusaale bw'asasambwire mu maiso g'ebisibo ku manvu mu byesero eby'okunywisiryamu ebisibo we byaizire okunywa; ne giwaka ebida bwe gyaizire okunywa. ³⁹ Ebisibo ne biwakira mu maiso g'obusaale, ebisibo ne bizaala egya biwuuga n'egyobujagijagi n'ezabitanga. ⁴⁰ Yakobo n'ayawula mu baana, n'alingirirya amaiso g'ekisibo eri abe biwuuga, n'eri abairugavu bonabona ab'omu kisibo kya Labbaani; n'ayawulako ebisibo bye, n'atabigaita n'ekisibo kya Labbaani. ⁴¹ Awo olwatuukire egyabbaire n'amaani mu kisibo bwe gyawakanga, Yakobo n'ateeka obusaale mu maiso g'ekisibo mu byesero, giwakire awali obusaale; ⁴² naye ekisibo bwe kyabbanga ekibi, n'atabuteekangawo; gityo embiibbi niigyo egyabbanga egya Labbaani, n'egy'amaani nga niigyo gya Yakobo. ⁴³ Omusaiza ne yeeyongera inu, n'abba n'ebisibo binene, n'abazaana n'abaidu, n'eŋamira n'endogoyi.