¹ Yakobo kaisi nayaba ng'atambula, n'aiza mu nsi ey'abaana ab'ebuvaisana. ² N'alinga, era, bona, ensulo mu nimiro, era, bona, ebisibo bisatu eby'entama nga gigalamiire awo awali ensulo: kubanga mu nsulo omwo niimwo mwe baanywisyanga ebisibo: n'eibbale eryabbaire ku munwa gw'ensulo lyabbaire inene. ³ N'ebisibo byonsatu ne bikuŋaanira awo: ne bayiringisya Eibbaale okulitoola ku munwa gw'ensulo, ne banywesya entama, ne bairya eibbaale ku munwa gw'ensulo, mu kifo kyalyo. ⁴ Yakobo n'akoba nti Bagande bange, muva waina? Ne batumula nti Tuli ba Kalani. ⁵ N'abakoba nti Mumaite Labbaani omwana wa Nakoli? Ne batumula nti Tumumaite. ⁶ N'abakoba nti Mulamu? Ne btumula nti Mulamu: era, bona, Laakeeri muwala we aiza n'entama. ⁷ N'atumula nti bona, eisana ekaali mu luya; so obwire bukaali kutuuka ensolo okukuŋaanyizibwa: munywisye entama, mwabe mugiriisye. ⁸ Ne batumula nti Tetusobola, ebisibo byonsatu nga bikaali kukuŋaanyizibwa, ne bayiringisya Eibbaale okulitoola ku munwa gw'ensulo: kaisi ne tunywisya entama. ⁹ Bwe yabbaire akaali atumula nabo, Laakeeri n'aiza n'entama gya itaaye; kubanga niiye yagiriisyanga. ¹⁰ Awo olwatuukire Yakobo bwe yaboine Laakeeri muwala wa Labbaani mwanyoko wa maye n'entama gya Labbaani mwanyoko wa maye, Yakobo n'asembera, n'ayiringisya eibbaale n'alitoola ku munwa gw'ensulo n’anywisya ekisibo kya Labbaani mwanyoko wa maye. ¹¹ Yakobo n'anywegera Laakeeri, n'ayimusya eidoboozi lye, n'akunga. ¹² Yakobo n'abuulira Laakeeri nga niiye mugande wa itaaye, era nga niiye mwana wa Lebbeeka: n'airuka mbiro n'akobera itaaye. ¹³ Awo olwatuukire Labbaani bwe yawuliire ebigambo bya Yakobo omwana wa mwanyoko we n'airuka okumusisinkana, n'amugwa mu kifubba, n'amunywegera, n'amuyingirya mu nyumba ye. N'akobera Labbaani ebigambo ebyo byonabyona. ¹⁴ Labbaani n'amukoba nti Mazima iwe oli igumba lyange era omubiri gwange. N'atyama naye n'amalayo omwezi gumu. ¹⁵ Labbaani n'akoba Yakobo nti Kubanga oli mugande wange kyekiva kikugwanira okumpeerereryanga obwereere? Nkobera, empeera yo yabbanga ki? ¹⁶ Era Labbaani yabbaire n'abawala babiri: eriina ly'omukulu Leeya, n'eriina ly'omutomuto Laakeeri. ¹⁷ Ne Leeya amaiso ge gabbaire magonvu; naye Laakeeri yabbaire musa n'amaiso ge go kusanyusya. ¹⁸ Yakobo n'ataka Laakeeri; n'atumula nti Nakuweerereryanga emyaka musanvu mpeebwe Laakeeri omwana wo omutomuto. ¹⁹ Labbaani n'atumula nti Waakiri mukuwe iwe okusinga okumuwa omusaiza ogondi; bba nanze. ²⁰ Yakobo n'aweerererya emyaka musanvu aweebwe Laakeeri; ne gifaanana ng'enaku ti nyingi olw'okutaka kwe yamutakire. ²¹ Yakobo n'akoba Labbaani nti Mpa omukali wange, kubanga enaku gyange gituukiriire, nyingire gy'ali. ²² Labbaani n'akuŋaanya abasaiza bonabona ab'omu kifo, n'afumba embaga. ²³ Awo olwatuukire akawungeezi n'atwaala Leeya omwana we, n'amumuleetera; n'ayingira gy'ali. ²⁴ Labbaani n'amuwa Zirupa omuzaana we eri omwana we Leeya okubba omuzaana. ²⁵ Awo olwatuukire amakeeri n'abona nga niiye Leeya: n'akoba Labbaani nti Kino kiki ky'onkolere? tinakuweereirye lwa Laakeeri? kale kiki ekikumbeyeserye? ²⁶ Labbaani n'atumula nti Tebakola batyo mu kifo kyaisu okuwa omutomuto okusooka omuberyeberye. ²⁷ Mala enaku musanvu egy'oyo, tukuwe n'ogondi olw'okuweererya kwewampeereryanga ate emyaka omusanvu egindi. ²⁸ Yakobo n'akola atyo, n'amala enaku gye musanvu: n'amuwa Laakeeri omwana we okumukwa. ²⁹ Labbaani n'awa Laakeeri omwana we Bira omuzaana we okuba omuzaana we. ³⁰ Era n'ayingira n'eri Laakeeri, era yatakire Laakeeri okusinga Leeya, n'amuweerererya ate emyaka musanvu egindi. ³¹ Mukama n’abona nga Leeya yakyayibwe, n'asumula ekida kye naye Laakeeri yabbaire mugumba. ³² Leeya n'abba ekida, n'azaala omwana ow'obulenzi n’amutuuma eriina lye Lewubeni: kubanga yatumwire nti Kubanga Mukama alingiriire ekibonoobono kyange; kubanga atyanu ibawange yantaka. ³³ N'abba ekida ate n'azaala omwana ow'obwisuka; n'atumula nti Kubanga Mukama yawuliire nga nkyayiibwe kyaviire ampa n'omwana ono era: n'amutuuma eriina lye Simyoni. ³⁴ N'abba ekida ate, n'azaala omwana ow'obwisuka; n'atumula nti Kale omulundi guno ibawange yegaita nanze, kubanga muzaaliire abaana ab'obwisuka basatu: eriina lye kyeryaviire liba Leevi. ³⁵ N'abba ekida ate, n'azaala omwana ow'obwisuka: n'atumula nti Omulundi guno namutendereza Mukama: Kyeyaviire amutuuma eriina lye Yuda; n'aleekera awo okuzaala.