¹ Isaaka n'ayeta Yakobo, n'amusabira omukisa, n'amukuutira, n'amukoba nti Tokwanga mukali ku bawala ba Kanani. ² Golokoka, oyabe e Padanalaamu, eri enyumba ya Besweri itaaye wa mawo; wekwere omukali alivaayo ku bawala ba Labbaani mwainyina wa mawo. ³ Era Katonda Omuyinza w'ebintu byonabyona akwongerenga, ofuuke ekibiina ky'amawanga; ⁴ era akuwe omukisa gwa Ibulayimu, iwe n'eizaire lyo awamu weena; osikire ensi gye watambuliiremu, Katonda gye yawaire Ibulayimu. ⁵ Isaaka n'asindika Yakobo: n'ayaba e Padanalaamu eri Labbaani, omwana wa Besweri Omusuuli, mwainyina wa Lebbeeka, maye wa Yakobo ne Esawu. ⁶ Era Esawu n'abona nga Isaaka yasabiire Yakobo omukisa n'amusindika okwaba e Padanalaamu, okwekwerayo omukali; era bwe yamusabiire omukisa n'amukuutira ng'atumula nti Tokwanga mukali ku bawala ba Kanani; ⁷ era nga Yakobo n'awulira itaaye no maye, era ng'ayabire e Padanalaamu: ⁸ Esawu n'abona ng'abawala ba Kanani tebaasanyusya Isaaka itawabwe; ⁹ Esawu n'ayaba eri Isimaeri, n'akwa wamu n'abakali be yabbaire nabo Makalasi muwala wa Isimaeri omwana wa Ibulayimu, mwonyokowe Nebayoosi, okubba omukali we. ¹⁰ Yakobo n'ava mu Beeruseba n'ayaba eri Kalani. ¹¹ N'atuuka mu kifo, n'agonawo n'akyeesya obwire, kubanga eisana lyabbaire ligwire; n'atwala erimu ku mabbaale ag'omu kifo, n'alyesigika wansi w'omutwe gwe, n'agalamirira mu kifo ekyo okugona. ¹² N'aloota ekirooto, era, bona, amadaala agaasimbibwa ku itakali, n'entikko yaago ng'etuukire mu igulu: era bona bamalayika ba Katonda nga baniina era nga baika ku igo. ¹³ Era, bona, Mukama ng'ayimireire waigulu waago, n'atumula nti Niinze Mukama, Katonda wa Ibulayimu zeizawo, era Katonda wa Isaaka: ensi gy'ogalamiireku, ndigikuwa iwe n'eizaire lyo; ¹⁴ n'eizaire lyo lyabbanga ng'enfuufu ey'oku nsi, era olibuna ebugwaisana, n'ebuvaisana, n'obukiika obugooda, n'obulyo: ne mu iwe ne mu izaire lyo ebika byonabyona eby'omu nsi niimwo mwe biriweerwa omukisa. ¹⁵ Era, bona, nze ndi wamu naiwe, era nakukuumanga gy'ewayabanga yonayona, era ndikwiryawo mu nsi eno; kubanga tindikuleka okutuusya lwe ndimala okukola bye nkukobereku. ¹⁶ Yakobo n'azuuka mu ndoolo, n'atumula nti Mazima Mukama ali mu kifo kino; nzeena mbaire timaite ¹⁷ N'atya, n'atumula nti Ekifo kino nga kye ntiisya (ekifo) kino niiyo enyumba ya Katonda dala mazima, era niigwo mulyango gw'eigulu. ¹⁸ Yakobo n'agolokoka amakeeri mu makeeri, n'akwata eibbaale lye yesigikire wansi w'omutwe gwe, n'alisimba okubba empagi, n'alifukaku amafuta ku ntiiko yaalyo. ¹⁹ N'atuuma ekifo ekyo eriina lyakyo Beseri naye eriina ly'ekibuga oluberyeberye lyabbaire Luzi. ²⁰ Yakobo ne yeeyama obweyamu, ng'atumula nti Katonda bw'eyabbanga awamu nanze era bw'eyankuumiranga mu ngira eno gye njabamu, era bw'eyampanga emere ey'okulya, n'engoye egy'okuvaala, ²¹ n'okwira ne ngira mu nyumba ya itawange n'emirembe, Mukama kaisi n'abba Katonda wange, ²² n'eibbale lino, lye nsimbire okubba empagi, liriibba enyumba ya Katonda: era ku byonabyona by'ewampanga tinalemenga kukuwa iwe ekitundu eky'eikumi.