¹ Awo olwatuukire Isaaka bwe yamalire okukairiwa, n'amaiso ge nga gayimbaire n'okusobola nga takaali asobola okubona, n'ayeta Esawu omwana we omuberyeberye, n'amukoba nti Mwana wange: n'amukoba nti Niize ono. ² N'atumula nti Bona, nze nkairikire, timaite lunaku lwe ndifiiraku. ³ Kale atyanu nkwegayirira, kwata by'oyiigisya, omufuko gwo n'omutego gwo, oyabe mu nsiko, onjinjigire omuyigo; ⁴ era onongoosesye enyama ey'akawoowo, nga bwe ntaka, ogindeetere, ndye; obulamu bwange bukusabire omukisa nga nkaali kufa. ⁵ Lebbeeka n'awulira Isaaka bwe yatumwire ne Esawu omwana we. Esawu n'ayaba mu nsiko okuyiiga omuyiggo, n'okuguleeta. ⁶ Lebbeeka n'akoba Yakobo omwana we nti bona, mpuliire itaawo ng'akoba Esawu mugande wo nti ⁷ Ndeetera omuyigo, onongooserye enyama ey'akawoowo, ndye, nkusabire omukisa mu maiso ga Mukama nga nkaali kufa. ⁸ Kale atyanu, mwana wange, wulira eidoboozi lyange ng'ebyo bwe biri bye nkulagira. ⁹ Yaba atyanu eri embuli, onsyomereyo abaana b'embuli abasa babiri; nzeena nagirongooserya itaawo okubba enyama ey'akawoowo, nga bw'ataka: ¹⁰ weena wagitwalira iitaawo, alye, kaisi akusabire omukisa nga akaali kufa. ¹¹ Yakobo n'akoba Lebbeeka maye nti bona, Esawu mugande wange niiye musaiza ow'obwoya, nzeena omubiri gwange gutyerera. ¹² Koizi itawange yampeeweetaku, nzeena naafaanana gyali ng'omubbeyi; era neereetaku okukolimirwa, so ti mukisa. ¹³ Maye namukoba nti Okukolimirwa kwo kubbe ku nze, mwana wange: kino kyonka, wulira eidoboozi lyange, oyabe obinsyomere. ¹⁴ N'ayaba, n'abisyoma, n'abireetera maye : nalongosya n'alongoosya enyama ey'akawoowo, nga itaaye bwe yatakire. ¹⁵ Lebbeeka n'akwata ebivaalo ebisa ebya Esawu omwana we omuberyeberye, ebyabbaire naye mu nyumba, n'avaalisya ebyo Yakobo omwana we omutomuto: ¹⁶ n'ateeka amawu g'abaana b'embuli ku ngalo gye, no ku ikoti awatyeerera: ¹⁷ n'awa omwana we Yakobo mu ngalo gye enyama ey'akawoowo n'emere bye yabbaire aloagooserye. ¹⁸ N'aiza eri itawage, n'atumula nti itawange: n'atumula nti Niinze ono; niiwe ani, mwana wange? ¹⁹ Yakobo n'akoba itaaye nti Niinze Esawu omwana wo omuberyeberye; era nkolere nga bw'ondagiire: golokoka, nkwegayirira, otyame olye ku muyiigo gwange, obulamu bwo bunsabire omukisa. ²⁰ Isaaka n'akoba omwana we nti Kiki ekikuguboneserye amangu kityo, mwana wange? N'atumula nti Kubanga Mukama Katonda wo ambereire. ²¹ Isaaka n'akoba Yakobo nti Sembera, nkwegayiriire, nkuweeweeteku, mwana wange, oba niiwe mwana wange Esawu dala dala oba ti niiye oyo. ²² Yakobo n'asemberera Isaaka itaaye; n'amuweeweetaku, n'atumula nti Eidoboozi niiryo eidoboozi lya Yakobo, naye engalo niigyo engalo gya Esawu. ²³ N'atamwekaanya, kubanga engalo gye gyabbaireku obwoya, ng'engalo gya mugande we Esawu: kale n'amusabira omukisa. ²⁴ N'atumula nti iwe mwana wange Esawu dala dala? N'atumula nti Niize oyo. ²⁵ N'atumula nti Gunsembererye, nzeena n'alya ku muyigo ogw'omwana wange, obulamu bwange bukusabire omukisa. N'agusemberya gy'ali, n'alya; n'amuleetera omwenge, n'anywa. ²⁶ Itaaye Isaaka n'amukoba nti Sembera atyanu nywegere, mwana wange ²⁷ N’asembera, n'amunywegera n'awulira akaloosa ek'ebivaalo bye, n'amusabira omukisa, n'atumula nti bona, akaloosa ak'omwana wange Kali sooti kaloosa ak'enimiro Mukama gy'awaire omukisa: ²⁸ Era Katonda akuwenga ku musulo oguva mu igulu, No ku bugimu obw'ensi, N'entalaano nyingi n'omwenge mungi: ²⁹ Abantu bakuweerezenga N'amawaanga gakuvuunamirenga: Ofugenga bagande bo, N'abaana ba mawo bakuvuunamirenga: Alaamibwenga buli akulaama, Era aweebwenga omukisa buli akusabira omukisa. ³⁰ Awo olwatuukire, Isaaka bwe yabbaire nga yakamala okusabira Yakobo omukisa, no Yakobo ng'akaali aliwo akaali kuviira dala eri Isaaka iitaaye, Esawu mugande we kaisi ayingira ng'aviire okuyiiga. ³¹ Era yeena n'alongoosya enyama ey'akawoowo, n'agireetera itaaye; n'akoba iitaaye nti Itawange agolokoke, alye ku muyiigo ogw'omwana we, obulamu bwo bunsabire omukisa. ³² Isaaka kitaaye n'amukoba nti Niiwe ani? N'atumula nti Niinze mwana wo, omuberyeberye wo, Esawu. ³³ Isaaka n'atengera inu dala, nti Kale yani oyo eyigire omuyigo n’agundeetera, nzeena ndiire ku byonabyona nga okaali kwiza, ne musabira omukisa? era yeena n'okuweebwa aliweebwa omukisa. ³⁴ Esawu bwe yawuliire ebigambo bya itaaye, n'akunga okukunga okunene einu era okw'enaku enyingi, n'akoba itaaye nti Nsabira nze, era nzeena, ai itawange. ³⁵ N'atumula nti Mugande wo aizire ng'abbeeya, era akutoireku omukisa gwo. ³⁶ N'atumul nti Teyatuumiibwe kusa eriina lye Yakobo? kubanga anyingiriire mu byange emirundi gino gyombiri: yantoireku eby'obukulu bwange; ne atyanu, bona antoireku omukisa gwange. N'atumula nti Tongisiire nzeena mukisa? ³⁷ Isaaka n'airamu n'akoba Esawu nti Bona, muwaire okukufuganga iwe, na bagande be bonabona mbawaire eri iye okumuweerezyanga; era mujaanjabire n'eŋaanu n'omwenge: kale kiki kye naakukolera iwe, mwana wange? ³⁸ Esawu n'akoba itaaye nti Olina omukisa gumu gwonka, itawange? nsabira nze, era nzeena, ai itawange. Esawu n'ayimusya eidoboozi lye, n'akunga. ³⁹ Isaaka itaaye n'airamu n'amukoba nti Bona, enyumba yo yabbbanga yo bugimu bwe nsi, Era yo musulo oguva mu igulu waigulu; ⁴⁰ N'ekitala kyo niikyo ekyakuwanga obulamu, era waweerezanga mugande wo; Era olulituuka bw'olyesumatula, Olikunkumula egyooko ye okuva mu ikoti lyo. ⁴¹ Esawu n'akyawa Yakobo olw'omukisa itaaye gwe yamusabiire: Esawu n'atumula mu mwoyo gwe nti enaku egy'okukungira itawange girireta okutuuka; kaisi ne ngita mugande wange Yakobo. ⁴² Ne babuulira Lebbeeka ebigambo bya Esawu omwana we omuberyeberye; n'atuma n'ayeta Yakobo omwana we omutomuto, n'amukoba nti Bona, mugande wo Esawu, mu bigambo byo, yeesanyusya, ng'ateesya okukwita. ⁴³ Kale atyanu, mwana wange, wulira eidoboozi lyange; ogolokoke, oirukire eri Labbaani mwainyoko wange mu Kalani: ⁴⁴ omaleyo naye enaku ti nyingi, okutuusya obukambwe bwa mugande wo lwe bulyekooloobya; ⁴⁵ obusungu bwa mugande wo lwe bulyekooloobya gy'oli, naye lw'alyerabira kye wamukolere: kaisi ne ntuma, ne nkutoolayo: kiki ekyandinfiikiryeku imwe mwembiri ku lunaku olumu? ⁴⁶ Lebbeeka n'akoba Isaaka nti Obulamu bwange bunkooweserye olw'abawala ba Keesi: Yakobo bw'alikwa omukazi ku bawala ba Keesi, abali nga abo, ku bawala ab'omu nsi eno, obulamu bwange bulingasa butya?