¹ Katonda n'akoba Yakobo nti Golokoka, oyambuke e Beseri, otyame eyo: ozimbire eyo ekyoto eri Katonda, eyakubonekeire bwe waiukire amaiso ga Esawu mugande wo. ² Yakobo kaisi n'akoba ab'omu nyumba ye n'abo bonabona ababbaire naye nti Mutoolewo bakatonda abandi abali mu imwe, mwetukulye, muwaanyisye ebivaalo byanyu: ³ tugolokoke, twambuke e Beseri: nzeena ndizimbira eyo ekyoto eri Katonda, eyangiriremu ku lunaku olw'okweraliikirira kwange, era eyabbanga nanze mu ngira gye natambuliiremu. ⁴ Ne bawa Yakobo bakatonda abandi bonabona ababbaire mu mukono gwabwe, n'empeta egyabbaire mu matu gaabwe; Yakobo n'abigisa wansi w'omwera ogwabbaire mu Sekemu. ⁵ Ne batambula: n'entiisya nyingi n'egwa ku bibuga ebyabeetooloire, ne batasengererya baana ba Yakobo. ⁶ Awo Yakobo n'atuukire e Luzi, ekiri mu nsi ye Kanani (niiyo Beseri), iye n'abantu bonabona ababbaire naye. ⁷ N'azimbira eyo ekyoto, n'ayeta ekifo Erubeseri: kubanga eyo Katonda gye yamubiikuliirwe, bwe yairukire amaiso ga mugande we. ⁸ Debola, omuleli wa Lebbeeka, n'afa, ne bamuziika eizuli we Beseri wansi w'omwera: ne bagutuuma eriina Alooninakusi. ⁹ Katonda n'abonekera ate Yakobo, bwe yaviire mu Padanalaamu, n’amuwa omukisa. ¹⁰ Katonda n'amukoba nti Eriina lyo Yakobo: eriina lyo tokaali oyetebwa ate Yakobo, naye Isiraeri niilyo lyabanga eriina lyo: n'amutuuma eriina Isiraeri. ¹¹ Katonda n'amukoba nti Niinze Katonda Omuyinza w'ebintu byonabona: oyale weeyongerenga; eigwanga n'ekibiina eky'amawanga biriva mu niiwe, na bakabaka baliva mu ntumbu gyo; ¹² n'ensi gye nawaire Ibulayimu no Isaaka, ndigikuwa iwe, n'eizaire lyo eririirawo ndiriwa ensi. ¹³ Katonda n'ava gy'ali n'aniina, mu kifo mwe yatumuliire naye. ¹⁴ Yakobo n'asimba empagi mu kifo mwe yatumuliire naye, empagi ey'amabbaale: n'agifukaku ekiweebwayo ekyokunywa, n'agifukaku amafuta. ¹⁵ Yakobo n'atuuma ekifo Katonda mwe yatumuliire naye eriina lyakyo Beseri. ¹⁶ Ne bava mu Beseri ne batambula; babbaire babulaku ekiseera batuuke e Efulasi: Laakeeri n'ataka okuzaala, n'alumwa inu. ¹⁷ Awo okwatuukire, bwe yabbaire alumwa inu, omuzaalisya n'amukoba nti Totya; kubanga atyanu wazaala omwana ow'obwisuka Ogondi. ¹⁸ Awo okwatuukire, obulamu bwe bwabbaire nga bulikumpi okwaba (kubanga yafiire), n'amutuuma eriina Benoni: naye itaaye n'amutuuma Benyamini. ¹⁹ Laakeeri n'afa, ne bamuziika mu ngira eyaba e Efulasi (niiyo Besirekemu). ²⁰ Yakobo n'asimba empagi ku magombe ge: eyo niiyo empagi ey'amagombe ga Laakeeri ne watyanu. ²¹ Isiraeri n'atambula, n’asimba eweema ye ng'abitire ku kigo kya Ederi. ²² Awo olwatuukire, Isiraeri bwe yabbaire ng'atyaime mu nsi eyo, Lewubeeni n'ayaba n'agona no Bira omuzaana wa itaaye: Isiraeri n'akiwuliraku. Bataane ba Yakobo babbaire ikumi na babiri: ²³ abaana ba Leeya; Lewubeeni, omubereberye wa Yakobo, no Simyoni, no Leevi, no Yuda, no Isakaali, no Zebbulooni: ²⁴ abaana ba Laakeeri; Yusufu, no Benyamini: ²⁵ n'abaana ba Bira, omuzaana wa Laakeeri; Daani no Nafutaali: ²⁶ n'abaana ba Zirupa, omuzaana wa Leeya; Gaadi no Aseri: abo niibo bataane ba Yakobo, abaamuzaaliirwe mu Padanalaamu. ²⁷ Yakobo n'aiza eri Isaaka kitaawe mu Mamule, mu Kiriasualaba (niiyo Kebbulooni), Ibulayimu no Isaaka mwe baatyamanga. ²⁸ N'enaku gya Isaaka niigyo emyaka kikumi mu kinaana. ²⁹ Isaaka n'alekula omwoka, n'afa, n'atwalibwa eri abantu be, ng'akairikire, ng'awererye enaku nyingi: Esawu no Yakobo abaana be ne bamuziika.