¹ Awo Ibulayimu n'akwa Omukali ogondi, eriina lye Ketula. ² Yeena n'amuzaalira Zimulaani, no Yokusaani, no Medani, no Midiyaani, no Isubaki, no Suwa. ³ Yokusaani n'azaala Seeba, no Dedani. N'abaana ba Dedani abasaiza babbaire Asulimu, no Letusimu, no Leumimu. ⁴ N'abaana ba Midiyaani abasaiza; Efa, no Eferi, no Kanoki, no Abida, ne Erudaa. Abo bonabona baana ba Ketula. ⁵ Ibulayimu n'awa Isaaka byonabyona bye yabbaire nabyo. ⁶ Naye abaana abasaiza ab'abazaana, Ibulayimu be yabbaire nabo, Ibulayimu n'abawa ibo ebirabo; n'abasindika okuva eri Isaaka omwana we, bwe yabbaire ng'akaali mulamu, baabe ebuvaisana, mu nsi ey'ebuvaisana. ⁷ N'enaku egy'emyaka egy'obulamu bwa IbuIayimu bwe yamalire niigyo gino, emyaka kikumi mu nsanvu na itaano. ⁸ Ibulayimu n’alekula omwoka n'afa ng'amalire okuwangaala okusa, nga mukaire emyaka gye nga gituukiriire: n'atwalibwa eri abantu be. ⁹ Isaaka no Isimaeri bataane be ne bamuziika mu mpuku ya Makupeera, mu Iusuku lwa Efulooni omwana wa Zokali Omukiiti, olulingiriira Mamule; ¹⁰ olusuku abaana ba Keesi lwe baagulirye Ibulayimu: Ibulayimu mwe baamuziikire omwo ni Saala mukali we. ¹¹ Awo olwatuukire Ibulayimu ng'amalire okufa Katonda n'awa Isaaka omwana we omukisa; Isaaka n'atyamanga ku Beerirakairoi. ¹² Era okuzaala kwa Isimaeri, omwana wa Ibulayimu Agali Omamisiri, omuzaana wa Saala, gwe yazaaliire Ibulayimu, niikwo kuno: ¹³ n'abaana ba Isimaeri, amaina gaabwe nga bwe gaali, nga bwe baazaaliibwe, amaina gaabwe niigo gano: omuberyeberye wa Isimaeri, Nebayoosi; no Kedali, no Adubeeri, no Mibusamu, ¹⁴ no Misuma, no Duma, n Masa; ¹⁵ Kadadi no Teenna, Yetili, Nafisi, ne Kedema: ¹⁶ abo niibo abaana ba Isimaeri, era ago niigo maina gaabwe, ng'ebyalo byabwe bwe byabbaire, era nga bwe baakubbire eweema gyabwe; abalangira ikumi na babiri ng'amawanga gaabwe bwe gaali. ¹⁷ N'emyaka gya Isimaeri gye yamalire, emyaka kikumi mu asatu mu musanvu: n'alekula omwoka n'afa; n'atwalibwa eri abantu be. ¹⁸ Ne batyama okuva ku Kavira okutuuka ku Suuli ekiringirira Misiri, ng'oyaba e Bwasuli: yatyamanga mu maiso ga bagande be bonabona. ¹⁹ N'okuzaala kwa Isaaka, omwana wa Ibulayimu, niikwo kuno: Ibulayimu yazaaire Isaaka: ²⁰ era Isaaka yabbaire yaakamala emyaka ana bwe, yakweire Lebbeeka, omwana wa, Besweri Omusuuli ow'e Padanalaamu, mwainyina was Labbaani Omusuuli, okubba mukali we. ²¹ Isaaka ne yeegayiririra Mukama omukali we, kubanga yabbaire mugumba: Mukama n'awulira okwegayirira kwe, no Lebbeeka mukali we n'abba ekida. ²² Abaana ne bawakanira mu nda ye; n'atumula nti Bwe kiri kityo, kyenva mba, omulamu kiki? N'ayaba okubuulya Mukama. ²³ Mukama n'amukoba nti Amawanga mabiri gali mu kida kyo. N'ebika ebibiri biryawukana n'okuva mu byenda byo: N'eigwanga erimu lyasinganga eigwanga erindi amaani; N'omukulu yaweerelyanga omutomuto. ²⁴ Awo enaku gye bwe gyatuukiriire okuzaala, bona ne babba balongo mu kida kye. ²⁵ N'omubereberye n'avaamu nga mumyofu, omubiri gwe gwonagwona nga gufaanana ekivaalo eky'ebyoya: ne bamutuuma eriina lye Esawu. ²⁶ Mugande we n'amwiririra n'avaamu, omukono gwe nga gukwitte ekityero kye Esawu; n'eriina lye ne bamutuuma Yakobo: era Isaaka yabbaire yaakamala emyaka nkaaga, mukali we bwe yabazaaliire. ²⁷ Abalenzi ne bakula: Esawu n'abbanga omuyigi ow'amagezi, omusaiza ow'omu nsiko; no Yakobo yabbaire musaiza muteefu, eyatyamanga mu weema. ²⁸ Era Isaaka n'ataka Esawu, kubanga yalyanga ku muyiigo gwe: no Lebbeeka n'ataka Yakobo. ²⁹ Yakobo n'afumba omugoyo: Esawu n'ayingira ng'a viire mu nsiko, ng'akoowere nga ngabula maani: ³⁰ Esawu n'akoba Yakobo nti Ndiisya, nkwegairiire, omugoyo ogwo omumyofu; kubanga mbula maani: eriina lye kye lyaviire lyetebwa Edomu. ³¹ Yakobo n'atumula nti Ngulya watyanu eby'obukulu bwo. ³² Esawu n'atumula nti Bona, mbulaku katono okufa: n'eby'obukulu biringasa bitya? ³³ Yakobo n'amukoba nti Ndayirira watyanu; n'amulayirira: n'agulya Yakobo eby'obukulu bwe. ³⁴ Yakobo n'awa Esawu emere n'omugoyo gw'ebijanjaalo; n'alya, n'anywa, n'agolokoka, ne yeyabira: atyo Esawu n'anyooma eby'obukulu bwe.