¹ Ibulayimu yabbaire akairikire, ng'abitiriire obukaire: era Mukama yawanga Ibulayimu omukisa mu bigambo byonabyona. ² Ibulayimu n'akoba omwidu we, omukulu w'enyumba ye, eyafuganga byonabyona bye yabbaire, nti Nkwegayiriire, teeka omukono gwo wansi w'ekisambi kyange; ³ nzeena nakulayirya Mukama, Katonda w'eigulu era Katonda w'ensi, nga tolikwera mwana wange omukali aliva mu bawala aba Bakanani, be ntyamamu: ⁴ naye olyaba mu nsi yange, era eri bagande bange, omukwere omwana wange Isaaka omukali. ⁵ Omwidu n'amukoba nti Koizi omukali talikirirya kwiza nanze okutuuka mu nsi eno: kirignwanira okutoola omwana wo mu asi gye waviiremu? ⁶ Ibulayimu n'amukoba nti Toiryangayo mwana wange n'akatono. ⁷ Mukama, Katonda w'eigulu, eyatoire mu nyumba ya itawange, no mu nsi mwe nazaalirwe, era eyatumwire nanze, nandayirira, ng'akoba nti Eizaire lyo ndiriwa ensi eno; oyo alituma malayika we okuntangira, weena olikwera omwana wange omukali aliva eyo. ⁸ N'omukali bw'alibba nga taikirirya kwiza naiwe, kale nga bulaku musango olw'ekirayiro kyange kino; kino kyonka, obutamwiryayo mwana wange. ⁹ Omwidu n'ateeka omukono gwe wansi w'ekisambi kya Ibulayimu mukama we, n'amulayirira mu kigambo ekyo. ¹⁰ Omwidu n'atwala eŋamira ikumi, egy'omu ŋamira gya mukama we, ne yeyabira; ng'alina ebintu byonabyona ebisa ebya mukama we mu ngalo gye: n'agolokoka, n'ayaba mu Mesopotamiya, mu kibuga kya Nakoli. ¹¹ N'afukamirya eŋamira ewanza w'ekibuga awali ensulo y'amaizi obwire nga buwungeera, obwire nga butuukire abakali we bafulumiranga okusena amaizi. ¹² N'atumula nti Ai Mukama, Katonda wa mukama wange Ibulayimu, ompe, nkwegayiriire, omukisa atyanu, olage ekisa mukama wange Ibulayimu. ¹³ Bona, nyemereire ku nsulo gy'amaizi; n'abaana abawala b'ab'omu kibuga bafuluma okusena amaizi: ¹⁴ kale kibbe kiti; omuwala gwe nakoba nti Sena ensuwa yo, nkwegayiriire, nywe; naye anakoba nti Nywa, nzeena naanywisya n'egamira gyo: oyo abbe oyo gwe walagirira omwidu wo Isaaka; era ntyo bwe naategeera ng'olagire ekisa mukama wange. ¹⁵ Kale olwatuukire, bwe yabbaire ng'akali atumula, laba, Lebbeeka n'afuluma, eyazaaliirwe Besweri omwana wa Mirika; omukali wa Nakoli, mugande wa Ibulayimu, ng'alina ensuwa ye ku kibega kye. ¹⁶ N'omuwala yabbaire musa inu okubona, omuwala omutomuto, so nga wabula musaiza eyamumaite: n'aserengeta ku nsulo, n'aizulya ensuwa ye, n'ayambuka. ¹⁷ Omwidu n'airuka mbiro okumusisinkana, n'atumula nti Onywisye, nkwegayiriire, otwizi mu nsuwa yo. ¹⁸ N'atumula nti Nywa, mukama wange: n'ayanguwa n'ateeka ensuwa ye ku mukono gwe, n’amunywisya. ¹⁹ Awo bwe yamalire okumunywisya, n'atumula nti Nasenera n'eŋamira gyo ginywe giikute. ²⁰ N'ayanguwa n'afuka ensuwa ye mu kyesero, n'airuka ate ku nsulo okusena, n'asenera eŋamira gye gyonagyona. ²¹ Omusaiza n'amwekalirizya amaiso, ng'asirikire, okutegeera nga Mukama awaire olugendo Iwe omukisa oba nga tawaire. ²² Awo okwatuukire, eŋamira bwe gyamalire okunywa, omusaiza n’akwata empeta eya zaabu obuzito bwayo kitundu kya sekeri, n'emisaaga egy'okubanga ku mikono gye obuzito bwagyo sekeri ikumi egya zaabu; ²³ n'atumula nti Iwe oli mwana w'ani? Nkobera, nkwegayiriire. Mu nyumba ya itaawo mulimu eibbanga ife okugona omwo? ²⁴ N'amukoba nti Nze ndi mwana wa Besweri omwana wa Mirika, gwe yazaaliire Nakoli. ²⁵ Era ate n'amukoba nti Tulina eisubi era n'ebyokulya ebyagimala, era n'eibbanga ery'okugonamu ²⁶ Omusaiza n'akutama, n'asinza Mukama. ²⁷ N'atumula nti Mukama yebazibwe, Katonda wa mukama wange Ibulayimu, ataleka kusaasira kwe n'amazima ge eri mukama wange: nze, Mukama anuŋamirye mu ngira eri enyumba ya bagande ba mukama wange. ²⁸ Omuwala n'airuka, n'akobera ab'omu nyumba ya maye ng'ebigambo ebyo bwe biri. ²⁹ Era Lebbeeka yabbaire n'omwainyina, eriina lye Labbaani: Labbaani, n'afuluma n'airuka okusisinkana omusaiza awali ensulo. ³⁰ Awo olwatuukire, bwe yaboine empeta, n'emisaaga egyabbaire ku mikono gya mwainyina, era bwe yawuliire ebigambo bya Lebbeeka mwainyina, ng'atumula nti atyo omusaiza bw'ankobere; n'aiza eri omusaiza; era, bona, yabbaire ng'ayemereire mu mpete gy'eŋamira awali ensulo. ³¹ N'atumula nti Yingira iwe Mukama gw'awaire omukisa; kiki ekikwemererya ewanza? kubanga nteekereteekere enyumba, n'ekifo eky'eŋamira. ³² Omusaiza n'ayingira mu nyumba, n'asumulula eŋamira; n'awa eisubi n'ebyokulya eby'engamira, n'amaizi okunabya ebigere bye n'ebigere by'abasaiza ababbaire naye. ³³ Ne bateeka emere mu maiso ge alye: naye n'atumula nti Tindye nga nkaali kutumula bye natumiibwe. N'atumula nti Tumula. ³⁴ N'atumula nti Nze ndi mwidu wa Ibulayimu ³⁵ Era Mukama yawanga mukama wange omukisa mungi; era afuukire omukulu: era yamuwaire embuli n'ente, ne feeza ne zaabu, n'abaidu n'abazaana, n'eŋamira n'endogoyi. ³⁶ No Saala mukali wa mukama wange n’azaalira! mukama wange omwana bwe yabbaire ng'akairikire: era oyo n'amuwa. byonabyona by'alina. ³⁷ No mukama wange n'andayirya, ag'atumula nti Tolikwera mwana wange mukali aliva mu bawala aba Abakanani, be ntyama mu nsi yaabwe: ³⁸ naye olyaaba eri enyumba ya itawange, n'eri bagande bange, okwere omwana wange omukali. ³⁹ Ne nkoba mukama wange nti Koizi omukazi talikkirirya kwiza nanze. ⁴⁰ N'ankoba nti Mukama, gwe ntambulira, mu maiso ge, alituma malayika we wamu naiwe, aIiwa olugendo lwo omukisa; weena olikwera omwana wange omukali aliva mu bagande bange, no mu nyumba ya itawange: ⁴¹ Otyo tolibbaaku musango olw'ekirayiro kyange, bw'olituuka mu bagande bange; boona bwe batalikuwa mukali, iwe nga bulaku musango olw'ekirayiro kyange. ⁴² Watyanu ne ngiza awali ensulo, ne ntumula nti Ai Mukama, Katonda wa mukama wange Ibulayimu, bwe waawa atyanu omukisa olugendo lwange lwe njaba: ⁴³ bona, nyemereire awali ensulo y'amaizi; kale kibbe kiti; omuwala eyafuluma okusena, gwe nakoba nti Ompe, nkwegairiire, otwizi mu nsuwa yo nywe: ⁴⁴ yeena eyankoba nti nywa iwe, era nze nasenera n'eŋamira gyo: oyo abbe oyo Mukama gwe yalagiriire omwana wa mukama wange. ⁴⁵ Bwe mbaire nga nkaali ntumula mu mwoyo gwange, bona, Lebbeeka n'afuluma ng'alina ensuwa ye ku kibega kye: n'aserengeta ku nsulo, n’asena: ne mukoba nti Nywe, nkwegayiriire. ⁴⁶ N'ayanguwa, n'ateeka ensuwa ye okuva ku kibega kye, n'atumula nti Nywa, nzeena nanywisya n'eŋamira gyo: ne nywa, yeena n'anywisya n'eŋamira. ⁴⁷ Ne mubuulya ne ntumula nti Iwe oli mwana w'ani? N'atumula nti Mwana wa Besweri, omwana wa Nakoli, Mirika gwe yamuzaaliire: ne naanika empeta mu nyindo ye, n'emisaaga ku mikono gye. ⁴⁸ Ne nkutama, ne nsinza Mukama, ne neebalya Mukama, Katonda wa mukama wange Ibulayimu, eyanuŋamirye mu ngira iye gwe ndikwera omwana we omwana wa mwainyina mukama wange. ⁴⁹ Ne watyanu bwe mwaikirirya okukolera mukama wange eby'ekisa n'eby'amazima, munkobere; era bwe mutaikirirye, munkobere; Kaisi nkyukire ku mukono omulyo, oba ku omugooda. ⁵⁰ Labbaani no Besweri kaisi ne bairamu ne batumula nti Ekigambo ekyo kiviire eri Mukama: tetusobola kukukoberaa bibbiibi waire ebisa. ⁵¹ Bona, Lebbeeka ali mu maiso go, mutwale, oyabe, abbe mukali w'omwana wa mukama wo, Mukama aga bw'atumwire. ⁵² Awo olwatuukire, omwidu wa Ibulayimu bwe yawuliire ebigambo ebyo, n'avuunama eri Mukama, ⁵³ Omwidu n'aleeta amakula aga feeza n'amakula age zaabu n'ebivaalo, n'abiwa Lenbeeka: era n'awa no mwainyina no maye ebintu eby'omuwendo omungi. ⁵⁴ Ne balya ne banywa; iye n'abasaiza ababbaire naye, ne bagona ne bakyeesya obwire; ne bagolokoka Amakeeri, n'atumula nti Munseebule njabe eri mukama wange. ⁵⁵ No mwainyina no maye ne batumula nti Omuwala abbe naife amale enaku ti nyingi, eikumi oba kusingawo; kaisi ayabe. ⁵⁶ N'abakoba nti Tondwisya, kubanga Mukama awaire omukisa olugendo lwange; munseebule njabee eri mukama wange. ⁵⁷ Ne batumula nti Twayeta omuwala, tumubuulye mu munwa gwe. ⁵⁸ Ne ayeta Lebbeeka, ne bamukoba wayaba n'omusaiza ono? N'atumula nti Nayaba. ⁵⁹ Ne baseebula Lebbeeka mwainyina wabwe, n'omulenzi we, n'omuddu wa Ibulayimu, n'abasaiza be. ⁶⁰ Ne basabira Lebbeeka omukisa, ne bamukoba nti Mwaina waisu, bbanga waye w’abantu emitwaalo enkumi n’eizaire lyo liryenga omulyango gw’abo ababakyawa. ⁶¹ Lebbeeka n’agolokoka n’abazaana be, ne beebagala ku ŋamira ne baaba n’omusaiza: omwidu n’atwala Lebeeka ne yeeyabira. ⁶² Isaaka naiza ng’ava mu ngira ey’e Beerirakairoi: kubanga yabbaire atyama mu nsi ey’obukiika obulyo. ⁶³ Isaaka n'afuluma okufumiintirirya mu nimiro akawungeezi : n'ayimusya amaiso ge, n'atyama, era, bona, eŋamira nga giiza. ⁶⁴ Lebbeeka n'ayimusya amaiso ge, era bwe yaboine Isaaka, n'ava kuŋamira. ⁶⁵ N'akoba omwidu nti Musaiza ki oyo atambulira mu niniro okutusisinkaana? Omwidu n’atumula nti Niiye mukama wange: n’atoola olugoye lwe olubiika mu maiso ne yeebiikaku. ⁶⁶ Omwidu n’abuulira Isaaka byonabyona bye yakolere ⁶⁷ Isaaka n'amuleeta mu nyumba maye Saala, n'akwa Lebbeeka, n'abba mukali we; n'amutaka: Isaaka n'asanyusibwa maye bwe yamalire okufa.