¹ Ibulayimu n'ava eyo n'atambula okwaba mu nsi ey'obukiika obulyo, n'atyama wakati we Kadesi ne Suuli; n'abba mu Gerali. ² Ibulayimu n'atumula ku Saala mukali we nti Niiye mwainyinawe: ne Abimereki kabaka w'e Gerali n'atuma, n'atwala Saala. ³ Naye Katonda n'aizira Abimereki mu kirooto eky'obwire, n'amukoba nti Bona, iwe oli mufu bufu, olw'omukali gwe watwaire; kubanga alina ibaye. ⁴ Era Abimereki yabbaire nga akaali kumusemberera: n'atumula nti Mukama, oliita eigwanga waire nga ituukirivu? ⁵ Teyankobere iye mweene nti niiye mwainyina wange? naye omukali, omukali mweene n'atumula nti Niiye mwainyina wange: nga ndina Omwoyo omutuukirivu n'engalo egibulaku kabbiibi bwe nakolere ekyo. ⁶ Katonda n'amukoba mu kirooto nti Niiwo awo, maite nga Wakolere ekyo ng'olina Omwoyo omutuukirivu, era nzeena ne nkuziyizya okunyonoona: kyenaviire ndeka okukuganya okumukwataku. ⁷ Kale iryayo mukali w'omusaiza; kubanga niiye nabbi, yeena alikusabira, weena olibba mulamu: era bw'otoomwiryeyo, tegeera nga tolirema kufa, iwe, n'ababo bonabona. ⁸ Abimereki n'agolokoka amakeeri mu pwi, n'ayeta abaidu be bonabona, n'abuulira ebyo byonabyona mu matu gaabwe: Abasaiza ne batya inu. ⁹ Abimereki kaisi ayeta Ibulayimu, n'amukomba nti Onkolere ki? nzeena nakwonoona ntya, iwe okundeetera nze n'obwakabaka bwange okwonoona okunene? Onkolere ebikolwa ebitagwana kukola. ¹⁰ Abimereki n'akoba Ibulayimu nti Waboine ki, ekyakukoleserye ekyo? ¹¹ Ibulayimu n'atumula nti Kubanga nalowoozere nti Mazima okutya Katonda mubulamu kifo kino; nzeena balingita olwo mukali wange. ¹² Era naye mazima niiye mwainayinanze, mwana wa itawange, naye ti mwana wa mawange; n'afuuka mukali wange: ¹³ kale, Katonda bwe yantambwiryetambwirye okuva mu nyumba ya itawange, kaisi ne mukoba nti Kino niikyo kisa kyo kyewanjolesyanga; mu buli kifo mwe twayabanga, otumulanga ku nze nti Niiye e mwainyina wange. ¹⁴ Ne Abimereki n'atwala entama n'ente, n'abaidu n'abazaana, n'abiwa Ibulayimu, n'amwirirya Saala mukali we. ¹⁵ Abimereki n'atumula nti Ensi yange eri mu maiso go: tyama gy'ewataka. ¹⁶ N'akoba Saala nti bona, mpaire mwanyoko ebitundu lukumi ebya feeza: bona, niikyo ky'okubiika ku maiso gy'oli eri abo bonabona abali naiwe; no mu bigambo byonabyona ogaitiibwe. ¹⁷ Ibulayimu n'asaba Katonda: Katonda n'awonya Abimereki, no mukali we, n'a bazaana be; ne bazaala abaana. ¹⁸ Kubanga Mukama yabbaire asibiire dala ebida byonabyona eby'omu nyumba ya Abimereki, olwa Saala mukali wa Ibulayimu.