¹ Mukama n'aizira Saala nga bwe yatumwire, era Mukama n’akola Saala nga bwe yakobere. ² Saala n'abba ekida, n'azaalira Ibulayimu omwana ow'obwisuka ng'akairikire, mu biseera ebyo ebyateekeibwewo Katonda bye yamukobereku. ³ lbulayimu n'atuuma omwana we eyamuzaaliirwe, Saala gwe yamuzaalire, eriina lye Isaaka. ⁴ Ibulayimu n'akomola omwana we Isaaka nga yaakamala enaku munaana, nga Katonda bwe yamulagiire. ⁵ Era Ibulayimu yabbaire yaakamala emyaka kikumi, omwana we Isaaka bwe yamuzaaliirwe. ⁶ Katonda n'atumula nti, Niiwo awo eibbanga wakati mu maizi, lyawulenga amaizi n'amaizi. ⁷ N'atumula nti Aliwa oyo eyandikobere Ibulayimu nga Saala aliyonsa abaana be? kubanga muzaaliire omwana ow'obulenzi ng'akairikire. ⁸ Omwana n'akula, n'ava ku mabeere: Ibulayimu n'afumba embaga enene ku lunaku Isaaka lwe yaviiriireku ku mabeere. ⁹ Saala n'abona omwana wa Agali Omumisiri, gwe yazaaliire Ibulayimu, ng'aduula. ¹⁰ Kyeyaviire akoba Ibulayimu nti Bbinga omuzaana ono n'omwana we: kubanga omwana w'omuzaana ono taiza kubba musika wamu n'omwana wange, niiye Isaaka. ¹¹ N'ekigambo ekyo ne kibba kizibu inu mu maiso ga Ibulayimu olw'omwana we. ¹² Katonda n'akoba Ibulayimu nti Kireme okubba ekizibu mu maiso go olw'omulenzi, n'olw'omuzaana wo; mu byonabyona Saala by'akukoberanga, owuliranga eidoboozi lye; kubanga mu Isaaka ezairee lyo mwe lyayeterwanga. ¹³ Era no mu mwana w'omuzaana ndimuviisyaamu eigwanga, kubanga iye niilyo eizaire lyo. ¹⁴ Ibulayimu n'agolokoka amakeeri mu makeeri, N'akwata emere n'ensawo ey'oluwu ey'amaizi, n'abiwa Agali, ng'abiteeka ku kibega kye, n'omwana, n'amusindika: n'ayaba, n'atambuliratambulira mu idungu ery'e Beeruseba; ¹⁵ N'amaizi ag'omu luwu ne gawaamu, n’azazika omwana wansi w'ekisaka ekimu. ¹⁶ N'ayaba, n'atyama wansi ng'amulingirira walaku, ng'eibbanga akasaale we kagwa: kubanga yatumwire nti Ndeke okubona omwana ng'afa. N'atyama ng'amulingirira, n'ayimusya eidoboozi lye, n'akunga. era n'emunyenye. ¹⁷ Katonda n'awulira eidoboozi ly'omwisuka; no malayika wa Katonda n'ayeta Agali ng'ayema mu igulu, n’amukoba nti Obbaire otya, Agali? totya; kubanga Katonda awuliire eidoboozi ly'omulenzi w'ali. ¹⁸ Golokoka, oyimusye omulenzi, omukwate mu ngalo gyo; kubanga ndimufuula eigwanga einene. ¹⁹ Katonda n'azibula amaiso ge, n'abona ensulo y'amaizi n'ayaba, n'aizulya oluwu amaizi, n'anywisya omwisuka. ²⁰ Katonda n'abba wamu n'omwisuka, n'akula; n'atyamanga mu idungu, n'afuuka omulasi w'obusaale. ²¹ N'atyamanga mu idungu ery'e Palani: no maye n'amukwera Omukali mu nsi y'e Misiri. ²² Awo mu biseera ebyo Abimereki no Fikoli omukulu w'eigye ne bakoba Ibulayimu nti Katonda ali wamu naiwe mu byonabyona by'okola: ²³ kale, ndayirira wano Katonda nga tonkuusekuusenga nze; waire omwana wange, waire omwana w'omwana wange: naye ng'ekisa bwe kiri kye nkukolere, weena wakolanga otyo nze, n'ensi gye watyaimemu. ²⁴ Ibulayimu n'atumula nti Naalayiire. ²⁵ Ibulayimu n'anenya Abimereki olw'ensulo y'amaizi abaidu ba Abimereki gye bamutoireku olw'amaani. ²⁶ Abimereki n'atumula nti Simumaite bw'ali eyakolere atyo; so tonkoberangaku, so timpulirangaku era, wabula watyanu. ²⁷ Ibulayimu n'akwata entama n'ente, n'abiwa Abimereki, ne balagaana endagaanu bombiri. ²⁸ Ibulayimu n'ateeka entama enduusi musanvu egy'omu kisibo wamu gyonka. ²⁹ Abimereki n'akoba Ibulayimu nti Entama egyo enduusi omusanvu gyoteekere awamu gyonka amakulu gagyo ki? ³⁰ N'atumula nti Entama egyo enduusi omusanvu wagiweebwa mu mukono gwange, ekyo kibbe omujulizi gye ndi, nga nze nasimire ensulo eyo. ³¹ Kyeyaviire ayeta ekifo ekyo Beeruseba; kubanga eyo gye baalayiriire bombiri. ³² Batyo ne balagaanira endagaanu mu Beeruseba: Abimereki n'agolokoka ne Fikoli omukulu w'eigye lye, ne bairayo mu nsi eya Abafirisuuti. ³³ (Ibulayimu) n'asimba omumyulira mu Beeruseba, n'akoowoolera eyo eriina lya Mukama, Katonda atawaawo. ³⁴ Ibulayimu n'amala enaku nyingi mu nsi eya Abafisuuti.