¹ Na Bamalayika babiri ne batuuka e Sodomu olw'eigulo; no Luuti yabbaire atyaime mu mulyango ogw'e Sodoma: Luuti n'ababona, n'agolokoka okubasisinkana; n'avuunama amaiso ge ² n'atumula nti Bona, bakama bange, mwekooloobye, mbegayiriire, mu nyumba ey'omwidu wanyu, mugone okukyeesya obwire, munaabe ebigere, muwune makeeri okugolokoka, mweyabire. Ne batumula nti Bbe; naye twagona mu luguudo okukyeesya obwire. ³ N'abawaliriza inu; ne beekooloobya ewuwe, ne bayingira mu nyumba ye; n'abafumbira embaga, n'ayokya omugaati ogutazimbulukuswa, ne, balya. ⁴ Naye nga bakaali kugona, abasaiza ab'omu kibuga, ab'e Sodoma, ne bazingizya enyumba, abatobato era n'abakulu, abantu bonnabona nga baviire mu bifo byonabyona: ⁵ ne beeta Luuti, ne bamukoba nti Abasaiza bali waina abayingiire ewuwo obwire buno? obafulumye gye tuli, tubamanye. ⁶ Luuti n'afuluma gye bali mu mulyango, n'aigalawo olwigi enyuma we. ⁷ N'atumula nti Mbeegayiriire, bagande bange, temukola kubbiibi obwenkanire wano. ⁸ Bona, ndina abaana abawala babiri, abatamanyanga musaiza; ka mbafulumye abo gye muli, mbeegayiriire, mweena mubakole nga bwe kiri ekisa mu maiso ganyu: naye abasaiza abo temubakola kigambo; kubanga batuukire wansi w'ekiwolyo eky'akasulya kange. ⁹ Ne batumula nti Vaawo. Ne batumula nti Olusaiza luno lwayingiire okubba Omugeni, naye kirugwanira okubba omulamuzi: atyanu twakukola iwe kubbiibi okusinga abo. Ne bamunyigirirya inu omusaiza, iye Luuti, ne basembera okumenya olwigi. ¹⁰ Naye abasaiza ne bagolola emikono, ne bayingirya Luuti mu nyumba mwe babbaire, ne baigalawo olwigi. ¹¹ Ne bazibya amaiso g'abasaiza abaali ku lwigi, abatobato era n'abakulu: n'okwekooya ne beekooya nga basagira olwigi. ¹² Abasaiza ne bakoba Luuti nti Olina ate wano abandi? Omuko wo, n'abaana bo, ab'obwisuka n'ab'obuwala, ne bonabona b'olina mu kibuga; bafulumye mu kifo muno: ¹³ kubanga twazikirirya ekifo kino, kubanga okukunga kwabwe kweyongeire inu mu maiso ga Mukama; era Mukama yatutumire okukizikirirya. ¹⁴ Luuti n'afuluma n'atumula na bako be, abakweire abawala be, n'akoba nti Mugolokoke, muve mu kifo kino; kubanga Mukama yazikirirya ekibuga. Naye yabbaire sooti asaaga eri abako be. ¹⁵ Awo bwe bwakyeire emakeeri, bamalayika ne bamwanguyirirya Luuti, nga batumula nti Golokoka, otwale mukali wo, n'abaana bo abawala bombiri abali wano: oleke okuzikirizibwa mu butali butuukirivu obw'ekibuga. ¹⁶ Naye n’alwa; abasaiza ne bamukwata ku mukono gwe, no ku mukono gwo mukali we, no ku mukono gw'abaana be abawala bombiri; Mukama ng'atusaasira: ne bamutoolamu, ne bamuleeta ewanza w'ekibuga. ¹⁷ Awo bwe baamalire okubatooleramu dala, n'atumula nti Iruka oleke okufa; tolinga enyuma wo, so tolwa mu lusenyu lwonalwona; irukira ku lusozi, oleke okuzikirizibwa. ¹⁸ Luuti n'abakoba nti Bbe, mukama wange, nkwegayiriire: ¹⁹ Bona, omwidu wo aboine ekisa mu maiso go, era ogulumizirye okusaasira kwo, kw'ondagire ng'omponya ndeke okufa; ne ntasobola kwirukira ku lusozi luno, akabbiibi kaleke okuntuukaku ne nfa: ²⁰ Bona, ekibuga ekyo niikwo kumpi okukirukiramu, era niikyo ekibuga ekitono: nkwegayiriire, ngirukire omwo, (ti kitono?), n'obulamu bwange buliwona. ²¹ N'amugamba nti Era nkwikiriirye no mu kigambo ekyo, obutasuula kibuga ky'otumwireku. ²² Yanguwaku, oirukire omwo; kubanga tinsobola kukola kigambo, nga okaali kutuuka omwo. Eriina ly'ekibuga kyeryaviire lyebwa Zowaali. ²³ Eisana lyabbaire ng'alimalire okuvaayo ku nsi Luuti bwe yatuukire mu Zowaali. ²⁴ Mukama kaisi atonyesya ku Sodoma ne ku Gomola omusyo n'ekibiriiti nga biva mu igulu; ²⁵ n'asuula ebibuga ebyo, n'olusenyi lwonalwona, n'abo bonnabona abaatyaanga mu bibuga, n'ebyo ebyamerere ku itakali. ²⁶ Naye mukali we n'alinga enyuma we ng'amuvaaku enyuma, n'afuuka empagi ey'omunyu. ²⁷ Ibulayimu n'agolokoka amakeeri pwi n'ayaba mu kifo mwe yayemereire mu maiso ga, Mukama: ²⁸ n'alingirira e Sodoma n'e Ggomola, n'edi ensi yonayona ey'olusenyu, n'alengera, era, bona, omwoka ogw'ensi ne gunyooka ng'omwoka ogw'ekikoomi. ²⁹ Awo, Katonda bwe yazikirizirye ebibuga eby'omu lusenyu, Katonda n'aijukira Ibulayimu n'asindika Luuti ave wakati mu bibuga ebyasuuliibwe, bwe yaswire ebibuga Luuti mwe yabbaire atyama. ³⁰ Luuti n'aniina n'ava mu Zowaali, n'atyama ku lusozi, n'abaana be abawala bombiri naye; kubanga yatiire okutyama mu Zowaali: n'atyama mu mpuku, n'abaana be abawala bombiri. ³¹ N'omuberyeberye n'akoba omutomuto nti Itawaisu akairikire, so wabulala musaiza mu nsi aliyingira gye tuli ng'empisa y'ensi gyonagyona bw'eri: ³² kale, tunywesye Itawaisu omwenge, feena twagona naye, tukuume eizaire lya Itawaisu. ³³ Ne banywisya itawabwe omwenge obwire obwo; n'omuberyeberye n'ayingira, n'agona no itaaye; n'atamanya bwe yagalamiriire, waire bwe yagolokokere. ³⁴ Awo ku lunaku olwairireku, omuberyeberye n'akoba omutomuto nti Bona, obwire nagonere no itawange: era tumunywisye omwenge n'obwire buno; weena wayingira, n'ogona naye, tukuume eizaire lya itawaisu. ³⁵ Era ne banywisya itawabwe omwenge n'obwire obwo: omutomuto n'agolokoka, n'agona naye; n'atamanya bwe yagalamiriire, waire bwe yagolokokere. ³⁶ Batyo abaana ba Luuti bombiri abawala ne babba ebida bya itawabwe. ³⁷ Omubereberye n'azaala omwana ow'obwisuka, n'amutuuma eriina Moabu: oyo niiye zeiza w'Abamoabu ne atyanu. ³⁸ Era n'omutomuto yeena n'azaala omwana ow'obwisuka, n'amutuuma eriina Benami: oyo niiye zeiza w'abaana ba Amoni ne atyanu.