¹ Mukama n'amubonekera awali emivule gya Mamule, bwe yabbaire ng'atyaime mu mulyango mu ituntu; ² n'ayimusya amaiso ge n'alinga, era, bona, Abasaiza basatu nga bemereire mu maiso ge: awo bwe yababoine, n'ava mu mulyango gw'eweema n'airuka mbiro okubasisinkana, n'avuunama, ³ n'atumula nti Mukama wange, oba nga atyanu mboine ekisa mu maiso go, tova wali mwidu wo, nkwegayiriire: ⁴ kale baleete otwizi, munaabe ebigere, muwumulire wansi w'omusaale: ⁵ Nzeena naaleeta akamere, musanyuke emyoyo gyanyu; Kaisi mwaba: kubanga mutuukire eri omwidu wanyu. Ne batumula nti Kola otyo, nga bw'otumwire. ⁶ Ibulayimu n'ayanguwa n'ayingira mu weema eri Saala n'atumuka nti Teekateeka mangu ebigero bisatu eby'obwita, obudyokole, ofumbe emere. ⁷ Ibulayimu n'airuka mbiro eri ekisibo, n'asyoma enyana eŋondi ensa, n'agiwa omwidu; n'ayanguwa okugifumba. ⁸ N'akwata omuzigo, n'amata, n'enyana gy'afumbire, n'abiteeka mu maiso gaabwe; n'ayemerera ku mbali kwabwe wansi w'omusaale, ne balya. ⁹ Ne bamukoba nti Ali waina Saala mukali wo? N'atumula nti Bona, ali mu weema. ¹⁰ N'atumula nti tindirema kwira w'oli ekiseera bwe kiriira; era, bona, Saala mukali wo alizaala omwana ow'obwisuka. Saala n'awulira mu mulyango gw'eweema, eyabbaire enyuma we. ¹¹ Ibulayimu no Saala babbaire bakairikire, era nga babitiriire obukaire; so nga Saala takaali abba ng'empisa ey'abakali bw'eri. ¹² Saala n'aseka munda ye, ng'atumula nti Nga malire okukairika ndisanyuka, era no mukama wange ng'akairikire? ¹³ Mukama n'akoba Ibulayimu nti Kiki ekimuseserye Saala, ng'atumula nti Mazima ndizaala omwana nga nkairikire? ¹⁴ Waliwo ekirema Mukama? Mubiseera ebyateekeibwewo ndiira w'oli, ekiseera bwe kiriira, no Saala alizaala omwana ow'obwisuka. ¹⁵ Saala kaisi yeegaana, ng'atumula nti Tinsekere: kubanga yatiire: N'atumula nti Bbe; naye okuseka osekere. ¹⁶ Abasaiza ne bagolokoka okuva eyo, ne balingirira e Sodoma: Ibulayimu n'ayaba nabo okubawerekeraku. ¹⁷ Mukama n'atumula nti Ibulayimu namugisa kye nkola ¹⁸ kubanga Ibulayimu talireka kufuuka igwanga inene ery'amaani, era amawanga gonagona ag'omu nsi galiweerwa omukisa mu iye. ¹⁹ Kubanga kyenaviire mumanya, kaisi abalagire abaana be n'enyumba ye eriirawo, okukwatanga engira ya Mukama, okukolanga eby'obutuukirivu n'eby'ensonga; Mukama kaisi aleete ku Ibulayimu bye mutumulaku. ²⁰ Mukama n'atumula nti Kubanga okukunga okw'e Sodoma ne Gomola kunene, era kubanga okwonoona kwabwe kwe kitalo: ²¹ naika kaakano mbone nga bakolera dala ng'okukunga kwayo bwe kuli, okwatuukire eri nze; era obanga tekyabbaire kityo, namanya. ²² Abasaiza ne bava eyo, ne bagenda e Sodoma: naye Ibulayimu ng'akaali ayemereire mu maiso ga Mukama. ²³ Ibulayimu n'asembera, n'atumula nti Olizikirirya abatuukitivu awamu n'ababbiibi? ²⁴ Koizi mu kibuga mulimu abatuukirivu ataanu: olizikirirya ekifo n'otokisonyiwa ku bwa batuukirivu ataanu abakirimu? ²⁵ Kitalo okole otyo, okwita abatuukirivu awamu n'ababbiibi, n'okwekankana abatuukirivu ne bekankana n'ababbiibi; kitalo ekyo: Omulamuzi w'ensi gyonagyona talikola byo butuukirivu? ²⁶ Mukama n'atumula nti Bwe nabona mu Sodoma abatuukirivu ataanu mukati mu kibuga, kaisi ne nsonyiwa ekifo kyonakyona ku bwabwe. ²⁷ Ibulayimu n'airamu n'atumula nti bona, ngezerye nze okutumula no Mukama waire nga ndi nfuufu bu fuufu n'eikoke: ²⁸ koizi ku batuukirivu ataanu kwagotaku abataanu: olizikirirya ekibuga kyonakyona kubanga abataanu babulaku? N'atumula nti Tindizikiriya bwe nabonayo ana mu abataanu. ²⁹ N'atumula naye ate era nti Koizi mwabonekamu ana. N'atumula nti Tindikola ntyo ku bw'ana. ³⁰ N'atumula nti Nkwegayiriire, Mukama tasunguwala, nanze kantumule: Koizi mwabokamu asatu. N'atumula nti Tindikola ntyo, bwe nabonayo asatu. ³¹ N'atumula nti Bona, ngezerye nze okutumula no Mukama: Koizi mwabonekkamu abiri. N'atumula nti Tindikizikirirya, ku bw'abiri abo. ³² N'atumula nti Nkwegayiriire, Mukama tasunguwala, Nzena ka ntumule ate omulundi guno ogumu gwonka : koizi mwabonekamu eikumi. N'atumula nti Tindikizikirirya ku bw'eikumi abo. ³³ Mukama ne yeyabira, bwe yamalire okutumula no Ibulayimu: Ibulayimu n'airayo mu kifo kye.