¹ Awo Ibulaamu bwe yabbaire yaakamala emyaka kyenda mu mwenda, Mukama n'abonekera Ibulaamu, n'amukoba nti Ninze Katonda Omuyinza w'ebintu byonabyona; tambuliranga mu maiso gange, obbeenga mutuukirivu. ² Nzena ndiragaana endagaano yange nze naiwe, era ndikwalya inu. ³ Ibulaamu n'avuunama amaiso ge: Katonda n'atumula naye nti ⁴ Nze, bona, endagaano yange eri naiwe, weena olibba Itaaye w'amawanga amangi. ⁵ So tokaali oyetebwanga ate eriina lyo Ibulaamu, naye eriina lyo lyabbanga Ibulayimu; kubanga nkufiire itaaye w'amawanga amangi. ⁶ Era ndikwalya inu, era ndikufuula amawanga, na bakabaka baliva mu iwe. ⁷ Era ndinywezya endagaanu yange nze naiwe n'eizaire lyo eririirawo okutuusya emirembe gyabwe gyonagyona okubba endagaanu eteridiba, okubba Katonda eri iwe n'eri ezaire lyo eririirawo. ⁸ Era ndikuwa igwe n'ezaire lyo eririirawo ensi gye watambulirangamu, ensi yonayona eya Kanani, okugirya emirembe gyonagyona; era nze, naabbanga Katonda waabwe. ⁹ Katonda n'akoba Ibulayimu nti weena, iwe olikwata endagaanu yange, iwe n'ezaire lyo eririirawo okutuusya emirembe gyabwe gyonagyona. ¹⁰ Eno niiyo ndagaanu yange, gye mwakwatanga, eri nze naimwe n'eizaire lyo eririirawo; buli musaiza mu imwe yakomolwanga. ¹¹ Era mwakomolwanga omubiri gw'ekikuta kyanyu; era kwabbanga kabonero ak'endagaano eri nze naimwe. ¹² Yamalanga enaku omunaana yakomolwanga mu imwe, buli musaiza mu mirembe gyanyu gyonagyona, eyazaalirwanga mu nyumba, era n'oyomunaigwanga yenayena gw'eyabagulyanga n'ebintu, atali wo ku izaire lyanyu. ¹³ Yazaalirwanga mu nyumba yo, n'oyo yagulibwanga n'ebintu byo, kibagwanira okumukomolanga: n'endagaanu yange yabbanga mu mubiri gwanyu okubba endagaanu eteridiba. ¹⁴ N'omusaiza atali mukomole atakomolwanga mu mubiri gw'ekikuta kye, obulamu obwo bwazikirizibwanga mu bantu be; ng'amenyere endagaanu yange. ¹⁵ Katonda n'akoba Ibulayimu nti Salaayi mukali wo, tokaali omweta eriina lye Salaayi, naye Saala niilyo lyabbanga eriina lye. ¹⁶ Nzena ndimuwa omukisa, era ate ndikuwa omwana mu iye: niiwo awo, ndimuwa omukisa, yeena alibba maye w'amawanga; bakabaka b'abantu baliva mu iye. ¹⁷ Ibulayimu kaisi n'avuunama amaiso ge, n'aseka, n'atumula mu mwoyo gwe nti Omwana alizaalirwa oyo eyaakamala emyaka ekikumi? era no Saala, eyaakamala emyaka ekyenda, alizaala? ¹⁸ Ibulayimu n'akoba Katonda nti Singa Isimaeri yabbanga mulamu mu maiso go! ¹⁹ Katonda n'atumula nti Bbe, naye Saala mukali wo alikuzaalira omwana; weena olimutuuma eriina lye Isaaka: Nzena nanywezanga endagaanu yange naye okubba endagaanu eteridiba eri ezaire lye eririirawo. ²⁰ N'ebya Isimaeri, nkuwuliire: bona, muwaire omukisa, era ndimwalya, era ndimwongera inu; alizaala abakungu ikumi na babiri, era ndimufuula eigwanga einene. ²¹ yeena endagaanu yange naginywezanga eri Isaaka, Saala gw'alikuzaalira mu biseera ebyo ebyateekeibwewo mu mwaka ogwaba okwiza. ²² N'aleka okutumula naye, Katonda n’aniina n'ava eri Ibulayimu. ²³ Ibulayimu n'atwala Isimaeri omwana we, ne bonabona abaazaaliirwe mu nyumba ye, ne byonabyona abaaguliibwe n'ebintu bye, buli musaiza mu bantu ab'omu nyumba ya Ibulayimu, n'abakomolera ku lunaku olwo omubiri gw'ekikuta kyabwe, nga Katonda bwe yamukobere. ²⁴ Ibulayimu yabbaire yaakamala emyaka kyenda mu mwenda, bwe yakomoirwe omubiri gw'ekikuta kye. ²⁵ No Isimaeri omwana we yabbaire yaakamala emyaka ikumi n'aisatu, bwe yakomoirwe omubiri gw'ekikuta kye. ²⁶ Ku lunaku lumu Ibulayimu n'akomolebwa no Isimaeri omwana we. ²⁷ N'abasaiza bonabona ab'omu nyumba ye, abo abaazaaliirwe mu nyumba, n'abo munaigwanga yenayena be yamugulirye n'ebintu, ne bakomolwa wamu naye