¹ Era bano niigyo emitwe gy'enyumba gya baitawabwe, era kuno niikwo kuzaalibwa kw'abo abaayambukire nanze okuva e Babulooni ku mirembe gya Alutagizerugizi kabaka. ² Ku bataabane ba Finekaasi, Gerusomu: ku bataabane ba Isamali, Danyeri: ku bataabane ba Dawudi, Katusi. ³ Ku bataabane ba Sekaniya; ku bataabane ba Palosi, Zekaliya; era wamu naye ne wabalibwa ng'okuzaalibwa kw'abasaiza bwe kwabbaire, kikumi mu ataano. ⁴ Ku bataabane ba Pakasumowaabu, Erwenayi mutaane wa Zerakiya; era wamu naye abasaiza ebikumi bibiri. ⁵ Ku bataane ba Sekaniya, mutaane wa Yakazyeri; era wamu naye abasaiza ebikumi bisatu. ⁶ No ku bataabane ba Adini, Ebedi mutaane wa Yonasaani; era wamu naye abasaiza ataanu. ⁷ Ne ku bataabane ba Eramu, Yesaya mutaane wa Asaliya, era awamu naye abasaiza nsanvu. ⁸ No ku batane ba Sefatiya, Zebadiya mutaane wa Mikayiri; era wamu naye abasajja kinaana. ⁹ Ku bataane ba Yowaabu, Obadiya mutaane wa Yekyeri; era wamu naye abasaiza bibiri mu ikumi na munaana. ¹⁰ No ku bataane ba Seromisi, mutaane wa Yosifiya; era wamu naye abasaiza kikumi mu nkaaga. ¹¹ No ku bataane ba Bebayi, Zekaliya mutaane wa Bebayi; era wamu naye abasaiza abiri mu munaana. ¹² No ku bataabane ba Azugadi, Yokanani mutaane wa Kakatani; era wamu naye abasaiza kikumi na ikumi. ¹³ No ku bataane ba Adonikamu ab'oluvanyuma; era gano niige maina gaabwe, Erifereti, Yeweri, no Semaaya, era wamu nabo abasaiza nkaaga. ¹⁴ No ku bataane ba Biguvayi, Usayi ne Zabudi; era wamu boona abasaiza nsanvu. ¹⁵ Ne mbakuŋaanyirya ku mwiga ogwaba e Yakava; ne tusiisira ne tumalayo enaku isatu: ne neetegerezya abantu na bakabona, ne ntabonayo n'omumu ku bataane ba Leevi. ¹⁶ Awo ne ntumya Eryeza, Alyeri, Semaaya, no Erunasani, no Yalibu, no Erunasani, ne Nasani, ne Zekaliya, ne Mesulamu, abasaiza abakulu: era ne Yoyalibu ne Erunasani, abegeresya. ¹⁷ Ne mbatuma okwaba eri Ido, omukulu w'ekifo Kasifiya; ne mbakobera bye babba bakoba Ido na bagande be Abanesinimu, mu kifo ekyo Kasifiya, baleete gye tuli abaweereza ab'omu nyumba ya Katonda waisu. ¹⁸ Awo olw'omukono omusa ogwa Katonda waisu ogwabbaire ku ife ne batuleetera omusaiza ow'amagezi, ow'oku bataane ba Makuli, mutaane wa Leevi, mutaane wa Isiraeri; ne Serebiya na bataane be ne bagande be, ikumi na munaana; ¹⁹ ne Kasabiya, era wamu naye Yesaya ow'oku bataabane ba Merali, bagande be na bataabane baabwe, abiri; ²⁰ no ku Banesinimu, Dawudi n'abakulu be baawaireyo olw'okuweereza Abaleevi, Abanesinimu ebikumi bibiri mu abiri: bonabona ne baatulwa amaina gaabwe. ²¹ Awo ne nangirira okusiiba eyo, ku mwiga Akava, twetoowazye mu maiso ga Katonda waisu, okusagira gy'ali engira engolokofu, eyaisu, era ey'abaana baisu abatobato, era ey'ebintu byaisu byonabyona. ²² Kubanga ensoni gyankwaite okusaba kabaka ekitongole ky'abasirikale n'abeebagala embalaasi okutuyamba eri abalabe mu ngira: kubanga twabbaire tutumwire no kabaka nti Omukono gwa Katonda waisu gubba ku abo bonabona abamusagira olw'obusa; naye obuyinza bwe n'obusungu bwe buli eri abo bonabona abamuleka. ²³ Awo ne tusiiba ne tusaba Katonda ekigambo kino: ne tumwegayirira. ²⁴ Awo ne njawula ikumi na babiri ku bakulu ba bakabona, Serebiya, Kasabiya, n'eikumi ku bagande baabwe wamu nabo, ²⁵ ne mbagerera efeeza n'ezaabu n'ebintu, niikyo kiweebwayo olw'enyumba ya Katonda waisu, kabaka n'ebateesya naye n'abakungu be ne Isiraeri yenayena ababbaire eyo bye baawaireyo: ²⁶ nze ne ngerera dala mu mukono gwabwe talanta egya feeza lukaaga mu ataano, n'ebintu ebya feeza talanta kikumi; zaabu talanta kikumi; ²⁷ n'ebibya ebya zaabu amakumi abiri, ebya daliki lukumi; n'ebintu bibiri eby'ebikomo ebisa ebizigule, eby'omuwendo nga zaabu. ²⁸ Ne mbakoba nti Muli batukuvu eri Mukama, n'ebintu bitukuvu; ne feeza ne zaabu niikyo kiweebwayo ku bwanyu eri Mukama wa bazeiza banyu. ²⁹ Mumoge mubikuume okutuusya lwe mulibipima mu maiso g'abakulu ba bakabona n'Abaleevi n'abakulu b'enyumba gya baitawabwe egya Isiraeri mu Yerusaalemi mu bisenge eby'omu nyumba ya Mukama. ³⁰ Awo bakabona n'Abaleevi ne batoola feeza ne zaabu n'ebintu ng'obuzito bwabyo bwe bwabbaire okubireeta e Yerusaalemi mu nyumba ya Katonda waisu. ³¹ Awo ne tuvaayo ku mwiga Akava ku lunaku olw'eikumi n'eibiri olw'omwezi ogw'oluberyeberye okwaba e Yerusaalemi: n'omukono gwa Katonda waisu gwabbaire ku ife, n'atuwonya mu mukono gw'omulabe n'omutegi mu ngira. ³² Ne twiza e Yerusaalemi ne tumalayo ennaku isatu. ³³ Awo ku lunaku olw'okuna ne bapimira feeza ne zaabu n'ebintu mu nyumba ya Katonda waisu okubikwatisya mu mukono gwa Meremoosi mutaane wa Uliya kabona; era wamu naye wabbairewo Ereyazaali mutaane wa Finekaasi; era wamu nabo wabbairewo Yozabadi mutaane wa Yeswa, no Nowadiya mutaane wa Binuyi, Abaleevi; ³⁴ byonabyona ng'omuwendo gwabyo era ng'obuzito bwabyo bwe byabbaire; obuzito bwonabwona ne buwandiikibwa mu biseera ebyo. ³⁵ Abaana b'obusibe abairire ewaabwe gye babbingiirwe ne bawaayo ebiweebwayo ebyokyebwa eri Katonda wa Isiraeri, ente ikumi na ibiri olwa Isiraeri yenayena, entama enume kyenda mu mukaaga, abaana b'entama nsanvu mu musanvu, embuli enume ikumi na ibiri okubba ekiweebwayo olw'ekibbiibi: egyo gyonagyona ne gibba ekiweebwayo ekyokebwa eri Mukama. ³⁶ Ne bawa abaamasaza ebiragiro bya kabaka n'abo abafuga emitala w'omwiga: ne bayamba abantu n'enyumba ya Katonda.