¹ Awo oluvannyuma lw'ebyo ku mirembe gya Alutagizerugizi kabaka w'e Buperusi Ezera mutaane wa Seraya mutaane wa Azaliya mutaane wa Kirukiya ² mutaane wa Salumu mutaane wa Zadoki mutaane wa Akitubu ³ mutaane wa Amaliya mutaane wa Azaliya mutaane wa Merayoosi ⁴ mutaane wa Zerakiya mutaane wa Uzi mutaane wa Buki ⁵ mutaane wa Abisuwa mutaane wa Finekaasi mutaane wa Ereyazaali mutaane wa Alooni kabona asinga obukulu: ⁶ Ezera oyo n'ayambuka ng'ava e Babulooni; era yabbaire muwandiiki mwangu mu mateeka ga Musa, Mukama Katonda wa Isiraeri ge yawaire; kabaka n'amuwa byonabyona bye yasabire, olw'omukono gwa Mukama Katonda we ogwabbaire ku iye. ⁷ Awo abamu ku baana ba Isiraeri ne bambuka no ku bakabona n'Abaleevi n'abembi n'abaigali ne Banesinimu ne baiza e Yerusaalemi mu mwaka ogw'omusanvu ogwa Alutagizerugizi kabaka. ⁸ N'aiza e Yerusaalemi mu mwezi ogw'okutaanu ogw'omu mwaka ogw'omusanvu ogwa kabaka. ⁹ Kubanga ku lunaku olw'oluberyeberye olw'omwezi ogw'oluberyeberye niikwo kwe yasookeire okwambuka okuva e Babulooni, no ku lunaku olw'oluberyeberye olw'omwezi ogw'okutaanu niikwo kwe yatuukiirie e Yerusaalemi, olw'omukono omusa ogwa Katonda we ogwabbaire ku iye. ¹⁰ Kubanga Ezera yabbaire akakasirye omwoyo gwe okusagira amateeka ga Mukama n'okugakolanga n'okwegeresyanga mu Isiraeri amateeka n'emisango. ¹¹ Era ebbaluwa eno yatoleibwe mu bbaluwa kabaka Alutagizerugizi gye yawaire Ezera kabona, omuwandiiki, omuwandiiki w'ebigambo eby'ebiragiro bya Mukama era ow'amateeka eri Isiraeri. ¹² Alutagizerugizi kabaka wa bakabaka awandiikiire Ezera kabona, omuwandiiki w'amateeka ga Katonda w'eigulu eyatuukiriire n'ebindi bityo. ¹³ Nteeka eiteeka bonabona ab'oku bantu ba Isiraeri na bakabona baabwe n'Abaleevi mu bwakabaka bwange abataka ku bwabwe dala okwaba e Yerusaalemi, baabe naiwe. ¹⁴ Kubanga otumiibwe kabaka n'abateesya naye omusanvu okubuulya ebigambo bya Yuda ne Yerusaalemi, ng'amateeka bwe gali aga Katonda wo agali mu mukono gwo; ¹⁵ n'okutwala feeza ne zaabu kabaka n'abateesya naye gye bawaireyo ku bwabwe eri Katonda wa Isiraeri, ekifo kye ky'abbairemu kiri mu Yerusaalemi, ¹⁶ ne feeza yonayona ne zaabu gy'olisanga mu isaza lyonalyona ery'e Babulooni, wamu n'ekiweebwayo ku bwabwe eky'abantu n'ekya bakabona, nga bawaayo ku bwabwe olw'enyumba ya Katonda waabwe eri mu Yerusaalemi; ¹⁷ kyoliva onyiikira inu okugula ebintu bino ente, entama enume, abaana b'entama, n'ebiweebwayo byaku eby'obwita, n'ebiweebwayo byaku ebyokunywa, era olibiweerayo ku kyoto eky'omu nyumba ya Katonda wanyu eri mu Yerusaalemi. ¹⁸ Era kyonakyona kye mulisiima okukola efeeza erifiikawo ne zaabu iwe ns bagande bo, ekyo mukikolanga nga Katonda wanyu bw'ataka. ¹⁹ N'ebintu by'oweebwa olw'okuweerezya okw'omu nyumba ya Katonda wo obiwangayo mu maiso ga Katonda w'e Yerusaalemi. ²⁰ Era byonabyona enyumba ya Katonda wo by'etaaga okusukiriryawo ebirikugwanira okuwaayo, obiwangayo ng'obitoola mu nyumba y'eigwanika lya kabaka. ²¹ Nzeena, nze Alutagizerugizi kabaka, nteeka eiteeka eri abawanika bonabona abali emitala w'omwiga, Ezera kabona omuwandiiki w'amateeka ga Katonda w'eigulu buli ky'alibasalira, kikolebwenga n'okunyiikira kwonakwona, ²² okutuusya talanta eza feeza kikumi, n'ebigero by'eŋaano kikumi, n'ebideku by'omwenge kikumi, n'ebideku by'amafuta kikumi, n'omunyu obutagutumula bwe gubba gwekankana. ²³ Buli ekyalagirwanga Katonda w'eigulu kikolerwenga dala olw'enyumba ya Katonda w'eigulu; kubanga obusungu bwandibeereirewo ki eri obwakabaka bwa kabaka na bataane be? ²⁴ Era tubanyonyola ebya bakabona n'Abaleevi, abembi, abaigali, Abanesinimu, oba abaidu b'enyumba eno eya Katonda, bonabona bwe bekankana, tekisobokenga kubasalira musolo waire ebisalirwa waire empooza. ²⁵ Weena, Ezera, ng'amagezi ga Katonda wo bwe gali agali mu mukono gwo, londa abaami n'abalamuzi balamulenga abantu bonabona abali emitala w'omwiga, bonabona abamaite amateeka ga Katonda wo; n'oyo atagamaite mumwegeresyenga. ²⁶ Era buli ataikiriryenga kukwata mateeka ga Katonda wo n'amateeka ga kabaka, omusango bagukomekereryenga ku iye n'okunyiikira kwonakwona, oba gwo kwitibwa, oba gwa kukubbingibwa, oba gwo kunyagibwaku ebibye, oba gwo kusibibwa. ²⁷ Mukama yeebazibwe Katonda wa bazeiza baisu, eyateekerewo ekigambo ekyenkaniire awo mu mwoyo gwa kabaka, okuyonja enyumba ya Mukama eri mu Yerusaalemi; ²⁸ era eyanyongeireku okusaasirwa mu maiso ga kabaka, n'abateesya naye ne mu maiso g'abakulu bonabona aba kabaka ab'amaite. Ne mpeebwa amaani olw'omukono gwa Mukama Katonda wange ogwabbaire ku nze, ne nkuŋaanya mu Isiraeri abakulu okwambuka nanze.