¹ Awo abalabe ba Yuda ne Benyamini bwe bawuliire ng'abaana b'obusibe bazimbira yeekaalu Mukama Katonda wa Isiraeri; ² kaisi ne basemberera Zerubbaberi, n'emitwe gy'enyumba gya baitawabwe ne babakoba nti Ka tuzimbire wamu naimwe: kubanga tusagira Katonda wanyu era nga mweena; era tuwaayo saddaaka eri iye okuva ku mirembe gya Esaludadoni kabaka w'e Bwasuli eyatuniinisirye wano. ³ Naye Zerubbaberi no Yesuwa n'emitwe gy'enyumba gya baitawabwe egya Isiraeri abandi ne babakoba nti Mubula kigambo naife okuzimba enyumba eri Katonda waisu; naye ife fenka wamu tulizimba eri Mukama Katonda wa Isiraeri nga kabaka Kuulo Kabaka w'e Buperusi bwe yatulagiire. ⁴ Awo abantu ab'omu nsi ne banafuya emikono gy'abantu ba Yuda ne babatawanya mu kuzimba, ⁵ ne bagulirira ab'okusala amagezi okubaziyizya okwita okuteesya kwabwe emirembe gyonagyona egya Kuulo kabaka w'e Buperusi okutuusya Daliyo kabaka w'e Buperusi lwe yaliire obwakabaka. ⁶ No ku mirembe gya Akaswero nga yakaiza alye obwakabaka ne bawandiika okuloopa ababbaire mu Yuda no Yerusaalemi. ⁷ Ku mirembe gya Alutagizerugizi Bisulamu n'awandiika ne Misuledasi ne Tabeeri na bainaye abandi eri Alutagizerugizi kabaka w'e Buperusi: era ebbaluwa yawandiikirwe mu nyukuta egy'e Kisuuli, no mu lulimi Olusuuli. ⁸ Lekumu ow’essaza no Simusaayi omuwandiiki ne bawandiika ebbaluwa eri Alutagizerugizi kabaka okuloopa Yerusaalemi bati: ⁹ awo Lekumu oweisaza no Simusaayi omuwandiiki na bainaabwe abandi ne bawandiika; Abadinayi n'Abafalasasuki n'Abataluperi n'Abafalusi n'Abalukevi n'Abababulooni n'Abasusanuki n'Abadekayi n'Abaweramu, ¹⁰ n’amawanga gonagona agandi Osunapali omukulu ow'ekitiibwa ge yasomokerye n'ateeka mu kibuga ky'e Samaliya no mu nsi egendi eri emitala w'omwiga, n'ebindi bityo. ¹¹ Ebbaluwa eno etooleibwe mu bbaluwa gye baaweereirye Alutagizerugizi kabaka; Abaidu bo abasaiza abali emitala w'omwiga n'ebindi bityo. ¹² Kabaka ategeere nga Abayudaaya abaaviire gy'oli ne bambuka batuukye gye tuli e Yerusaalemi; bazimba ekibuga ekyo ekijeemu ekibbiibi, era bamalire bugwe, era bamalire okudaabiriza emisingi. ¹³ Kabaka ategeere ekibuga ekyo bwe kirizimbibwa no bbugwe bw'aliwa okukola, nga tebaliwa musolo, ebisalibwa, waire empooza, kale enkomerero bakabaka balifiirwa. ¹⁴ Kale kubanga tulya omunyu ogw'omu lubiri, so tetugwana kubona kabaka ng'anyoomebwa, Kyetwaviire tutuma ne tutegeeza kabaka; ¹⁵ basaagire mu kitabo eky'okwijukirya ekya bazeizabo: otyo bw'olisanga mu kitabo eky'okujukirya, n'otegeera ng'ekibuga ekyo kibuga kijeemu, era nga kyonoona bakabaka n'amasaza era nga baajeemyanga abantu mu ekyo mu biseera eby'eira: ekibuga ekyo Kyeyaviire kizikirizibwa. ¹⁶ Tutegeeza kabaka, ekibuga ekyo bwe kirizimbibwa no bugwe bw'aliwa okukola, nga olw'ekyo tolibba ne kitundu emitala w'omwiga. ¹⁷ Awo kabaka n'atumira Lekumu oweisaza no Simusaayi omuwandiiki na bainaabwe abandi ababbaire mu Samaliya no mu nsi egendi edi emitala w'omwiga n'airamu nti Emirembe n'ebindi bityo. ¹⁸ Ebbaluwa gye mwatuweerezerye esomeibwe mu maiso gange ne ngitegeera. ¹⁹ Ne nteeka eiteeka, ne basaagira, era baboine ng'ekibuga ekyo okuva mu biseera eby'eira kyasaliranga bakabaka enkwe, n'obujeemu n'ekyeju byakolerwanga omwo. ²⁰ Era waabbangawo bakabaka ab'amaani abaakulira Yerusaalemi abaafuganga ensi yonayona eri emitala w'omwiga: era baaweebwanga omusolo, ebisalibwa, n'empooza. ²¹ Muteeke eiteeka abasaiza bano balekere awo, ekibuga ekyo kireke okuzimbibwa okutuusya lwe nditeeka eiteeka erindi. ²² Era mwekuume muleke okutenguwa mu kino: akabbiibi kandikuliire ki bakabaka ne bafiirwa? ²³ Awo ebbaluwa etoleibwe mu bbaluwa ya kabaka Alutagizerugizi bwe yasomeirwe mu maiso ga Lekumu no Simusaayi omuwandiiki ne bainaabwe, ne kaisi ne banguwa ne baaba e Yerusaalemi eri Abayudaaya, ne babalekesyayo n'amaani n'amawagali. ²⁴ Awo omulimu ogw'omu nyumba ya Katonda eri mu Yerusaalemi ne gulekebwayo; gwalekeibweyo okutuusya omwaka ogw'okubiri ogw'okufuga kwa Daliyo kabaka We Buperusi.