¹ Awo banabbi, Kagayi nabbi ne Zekaliya mutaane wa Ido, ne balagulira Abayudaaya ababbaire mu Yuda ne Yerusaalemi; mu liina lya Katonda wa Isiraeri mwe baabalaguliriire. ² Awo Zerubbaberi mutaane wa Seyalutyeri n'agolokoka no Yesuwa mutaane wa Yozadaki, ne batandiika okuzimba enyumba ya Katonda eri mu Yerusaalemi: era wamu nabo wabbairewo banabbi Katonda nga babayamba. ³ Mu biseera ebyo ne baiza gye bali Tatenayi owessaza ly'emitala w'omwiga no Sesalubozenayi no bannaabwe ne babakoba batyo nti Yani eyabawaire eiteeka okuzimba enyumba eno n'okumala bugwe ono? ⁴ Awo ne tubakoba tutyo nti Abasaiza abakola enyumba eno amaina gaabwe niibo b'ani? ⁵ Naye amaiso ga Katonda waabwe gabbaire ku bakaire b'Abayudaaya, ne batabalekesyayo okutuusya ekigambo lwe kirituuka eri Daliyo eby'okwiramu ne biiribwa mu bbaluwa olw'ekigambo ekyo. ⁶ Ebbaluwa etoleibwe mu bbaluwa Tatenayi owessaza ly'emitala w'omwiga no Sesalubozenayi na bainaye, Abafalusaki, ababbaire emitala w'omwiga, gye baaweerezerye Daliyo kabaka: ⁷ ne bamuweerezya ebbaluwa eyawandiikiibwe eti nti Eri Daliyo kabaka mirembe myereere. ⁸ Kabaka ategeere nga twaizire mu isaza lya Yuda mu nyumba ya Katonda omukulu ezimbibwa n'amabbaale amanene, era emisaale giteekebwa mu bisenge, n'omulimu guno gwabe nga gweyongera n'okunyiikira mu mikono gyabwe. ⁹ Awo ne tubuulya abakaire abo ne tubakoba tutyo nti Yani eyabawaire eiteeka okuzimba enyumba eno n'okumala bugwe ono? ¹⁰ Era ne tubabuulya n'amaina gaabwe; okukutegeeza, tuwandiike amaina g'abasaiza ababakulira. ¹¹ Kale ne bairamu batyo nti Tuli baidu ba Katonda w'eigulu n'ensi, era tuzimba enyumba eyazimbiibwe eira emyaka gidi emingi kabaka wa Isiraeri omukulu gye Yazimba n'amala. ¹² Naye oluvannyuma baiza baisu bwe babbaire basunguwazirye Katonda w'eigulu, n'abagabula mu mukono gwa Nebukaduneeza kabaka w'e Babulooni Omukaludaaya, eyazikirizirye enyumba eno n'atwala abantu e Babulooni. ¹³ Naye mu mwaka ogw'olubereberye ogwa Kuulo kabaka w'e Babulooni, Kuulo kabaka n'ateeka eiteeka okuzimba enyumba eno eya Katonda. ¹⁴ Era n'ebintu eby'omu nyumba ya Katonda ebya zaabu n'ebya feeza, Nebukadduneeza bye yatoire mu yeekaalu eyabbaire mu Yerusaalemi n'abireeta mu yeekaalu ey'e Babulooni, ebyo Kuulo kabaka n’abitoola mu yeekaalu ey'e Babulooni, ne babiwa omuntu eriina lye Sesubazali gwe yabbaire afiire oweisaza; ¹⁵ n'amukoba nti Twala ebintu bino, oyabe obiteeke mu yeekaalu eri mu Yerusaalemi, enyumba ya Katonda ezimbibwe mu kifo kyayo. ¹⁶ Awo Sesubazali oyo n'aiza n'ateekawo emisingi gy'enyumba ya Katonda edi mu Yerusaalemi: kale okuva ku biseera ebyo na buli atyanu nga bagizimba, era naye Ekaali a kugwa. ¹⁷ Kale oba nga kabaka asiima basagire mu igwanika lya kabaka eriri eyo e Babulooni, oba nga bwe biri bityo, ng'eiteeka lyateekeibwe erya Kuulo kabaka okuzimba enyumba eno eya Katonda e Yerusaalemi, kabaka atutumire atutegeeze bw'eyasiimire mu kigambo kino.