¹ Awo omwezi ogw'omusanvu bwe gwatuukire, abaana ba Isiraeri nga bali mu bibuga, abantu ne bakugnaanira e Yerusaalemi ng'omuntu omumu. ² Awo Yesuwa mutaane wa Yozadaki n'ayemerera, na bagande be bakabona, ne Zerubbaberi mutaane wa Seyalutyeri, na bagande be, ne bazimba ekyoto kya Katonda wa Isiraeri okuweerangayo okwo ebiweebwayo ebyokyebwa, nga bwe kyawandiikiibwe mu mateeka ga Musa omusaiza wa Katonda. ³ Ne basimba ekyoto ku ntebe yaakyo; kubanga entiisya yababbaireku olw'abantu ab'omu nsi: ne baweerayo okwo ebiweebwayo ebyokyebwa eri Mukama, ebiweebwayo ebyokyebwa amakeeri n'akawungeezi. ⁴ Ne bakwatanga embaga ey'ekigangu nga bwe kyawandiikiibwe ne bawaayo ebiweebwayo ebyokebwa ebya buli lunaku ng'omuwendo gwabyo bwe gwabbaire, ng'ekiragiro bwe kyabbaire, ng'ebyagwaniire buli lunaku bwe byabbaire; ⁵ n'oluvanyuma ekiweebwayo ekyokyebwa eky'emirembe gyonagyona, n'ebiweebwayo eby'emyezi egyakaboneka n'eby'embaga gyonagyona eza Mukama egyalagiirwe, n'ebya buli muntu eyawaireyo ng'atakire ekiweebwayo ku bubwe eri Mukama. ⁶ Ku lunaku olw'oluberyeberye olw'omwezi ogw'omusanvu kwe baasookeire okuwaayo ebiweebwayo ebyokyebwa eri Mukama: naye emisingi gya yeekaalu ya Mukama nga gikaali kutekebwawo. ⁷ Era ne bawa abazimbi n'ababaizi efeeza; n'ebyokulya n'ebyokunywa n'amafuta ne babiwa w'e Sidoni n’ab'e Tuulo, okutooka emivule ku Lebanooni okugireta ku nyanza e Yopa nga Kuulo kabaka w'e Buperusi bwe yabalagiire. ⁸ Awo mu mwaka ogw'okubiri kasookeire baiza eri enyumba ya Katonda e Yerusaalemi, mu mwezi ogw'okubiri, Zerubbaberi mutaane wa Seyalutyeri mwe yasookeire ne Yesuwa mutaane wa Yozadaki no bagande baabwe abandi bakabona n'Abaleevi n'abo ababbaire baviire mu busibe obwo ne baiza e Yerusaalemi; ne balagira Abaleevi abaakamala emyaka asatu n'okusingawo okubonekera omulimu ogw'omu nyumba ya Mukama. ⁹ Awo Yesuwa n'ayemerera na bataabane be na bagande be, Kadumyeri na bataabane be, bataabane ba Yuda, wamu okubonekera abakozi mu nyumba ya Katonda: bataane ba Kenadadi na bataane baabwe na bawala baabwe Abaleevi. ¹⁰ Awo abazimbi bwe bateekerewo emisingi gya yeekaalu ya Mukama, ne bateeka bakabona nga bambavaire ebivaalo byabwe nga balina amakondeere, n'Abaleevi bataane ba Asafu nga balina ebitaasa, okutendereza Mukama, nga Dawudi kabaka wa Isiraeri bwe yateekereteekere. ¹¹ Ne bemberagana nga batendereza nga beebalya Mukama nga batumula nti Kubanga musa, n'okusaasira kwe kubbaawo emirembe gyonagyona eri Isiraeri. Abantu bonabona ne batumulira waigulu n'eidoboozi inene bwe baatenderezere Mukama, kubanga emisingi gy'enyumba ya Mukama gitekeibwewo. ¹² Naye bangi ku bakabona n'Abaleevi n'emitwe gy'ennyumba gya baitawabwe, abakaire aboine enyumba eyasookere, emisingi gy'enyumba eno bwe gyateekeibweyo mu maiso gaabwe, ne bakunga amaliga n'eidoboozi inene; bangi ne batumulira waigulu n'eisanyu: ¹³ abantu n'okusobola ne batasobola kwawula eidoboozi lyo kutumulira waigulu n'eisanyu n'eidoboozi ery'okukunga kw'abantu: kubanga abantu batumuliire waigulu n'eidoboozi inene, oluyoogaano ne luwulirirwa wala.