¹ Awo n'atumulira waigulu n'eidoboozi inene mu matu gange ng'atumula nti Semberya abo abakulira ekibuga, buli muntu ng'akwaite ekyokulwanisya kye ekizikirirya mu mukono gwe. ² Kale, bona, abasaiza mukaaga ne baiza nga bafuluma mu ngira ey'omulyango ogw'engulu ogwolekera obukiika obugooda, buli muntu ng'akwaite ekyokulwanisya kye ekiita mu mukono gwe; n'omusaiza omumu wakati mu ibo avaire bafuta ng'alina ekikompe ky'o bwino eky'omuwandiiki mu nkende. Ne bayingira ne bemerera ku mbali kw'ekyoto eky'ekikomo. ³ Awo ekitiibwa kya Katonda wa Isiraeri kyabbaire kiniinire okuva ku kerubi kwe kyabbaire okutuuka ku mulyango ogw'enyumba: n'ayeta omusaiza ayavaire bafuta eyabbaire n'ekikompe kya bwino eky'omuwandiiki mu nkende. ⁴ Awo Mukama n'amukoba nti yaba obite wakati mu kibuga, wakati mu Yerusaalemi, oteeke akabonero ku byeni by'abantu abaweera ebiikowe era abakungira emizizyo gyonagyona egikolerwa wakati mu ikyo. ⁵ N'abandi n'abakoba nze nga mpulira nti imwe mubite mu kibuga nga mumuvaaku enyuma musumite: eriiso lyanyu lireke okusonyiwa so timubbanga ne kisa: ⁶ mwitiire dala omukaire n'omwisuka n'omuwala n'abaana abatobato n'abakali: naye timusembereranga muntu yenayena aliku akabonero era musookere ku watukuvu wange. Awo ne basookera ku bakaire ababbaire mu maiso g'enyumba ⁷ N'abakoba nti enyumba mugyonoone, mwizulye empya abaitiibwe: mufulume. Awo ni bafuluma ne basumitira mu kibuga. ⁸ Awo olwatuukukire bwe babbaire nga basumita nzena nga tinjigairewo, ni vuunama amaiso gange ni nkunga ni ntumula nti Woowe, Mukama Katonda! wazikirirya Isiraeri yenayena afiikirewo, ng'ofukira dala ekiruyi kye ku Yerusaalemi? ⁹ Awo n'ankoba nti obutali butuukirivu bw'enyumba ya Isiraeri ne Yuda bungi inu nyini, n'ensi eizwire omusaayi, n'ekibuga kizwire okulya ensonga: kubanga batumula nti Mukama yalekere ensi, so Mukama tabona. ¹⁰ Era nzena eriiso lyange tiririsonyiwa so tindisaasira, naye ndireeta engira yabwe ku mutwe gwabwe. ¹¹ Kale, bona, Omusaiza avaire bafuta eyabbaire n'ekikompe ekya bwino mu nkende n'airya ebigambo ng'atumula nti nkolere nga bw'ondagiire.