¹ Awo ni moga, era, bona, mu ibbanga eryabbaire waigulu w'omutwe gwa bakerubi ne waboneka waigulu wabwe ng'eibbaale erya safiro ng'embala ey'ekifaananyi eky'entebe. ² N'ankoba omusaiza avaire bafuta n'atumula nti Yingira wakati w'empanka egyetooloola abawulukuka, wansi we kerubi, oizulye ebibatu byo byombiri ebisiriirya eby'omusyo ebiva wakati wa bakerubi, obimansire ku kibuga. Awo n'ayingira nze nga mbona. ³ Era bakerubi babbaire bemereire ku luuyi olw'enyumba olulyo omusaiza bwe yayingiire; ekireri ne kizulya oluya olw'omunda. ⁴ Ekitiibwa kya Mukama ne kiniina okuva ku kerubi, ne kyemerera waigulu ku mulyango ogw'enyumba; enyumba n'eizula ekireri, oluya ne lwizulya okumasamasa okw'ekitiibwa kya Mukama. ⁵ N'okuwuuma kw'ebiwawa bya kerubi ne kuwulirwa okutuuka n'o mu luya olw'ewanza, ng'eidoboozi lya Katonda omuyinza w'ebintu byonabyona bw'atumula. ⁶ Awo olwatuukire bwe yalagiire omusaiza avaire bafuta ng'atumula nti toola omusyo wakati we mpanka egyetooloola abavulukuka wakati wa bakerubi, n'ayingira n'ayemerera ku mbali kwe mpanka. ⁷ Awo kerubi n'agolola omukono gwe ng'ayema wakati wa bakerubi eri omusyo ogwabbaire wakati wa bakerubi n'atwalaku, n'aguteeka mu mikono gy'oyo avaire bafuta, oyo n'agutoola n'afuluma. ⁸ Awo ne waboneka mu bakerubi embala ey'omukono gw'omuntu wansi w'ebiwawa byabwe. ⁹ Awo ne ntyama, era, bona, empanka ina nga giri ku mbali ga bakerubi, olupanka lumu ng'aluli ku mbali kwa kerubi mumu, n'o namuziga ogondi ng'ali ku mbali kwa kerubi ogondi: n'embala eyo lupanka yabbaire ng'eibala ery'eibbaale erya berulo. ¹⁰ N'embala yaabwe, abo abana babbaire n'ekifaananyi kimu, kwekankana olupanka ng'aluli munda w'o lupanka. ¹¹ Bwe baatambulanga, ne batambulira ku mpete gyabwe eina: tebaakyukire bwe batambwire, naye mu kifo omutwe gye gwalinganga, ne bagusengereryanga tebaakyukire bwe baatambwire. ¹² N'omubiri gwabwe gwonagwona n'amabega gabwe n'emikono gyabwe n'ebiwawa byabwe ne mpanka byabbaire bizwire amaiso enjuyi gyonagyona, empanka egyo eina niigyo gyabbaire. ¹³ Empanka, bagyetere nze nga mpulira empanka gyetooloire abawulukuka. ¹⁴ Era buli mumu yabbaire n'obweni buna: obweni obw'oluberyeberye bwabbaire bweni bwa kerubi, n'obweni obw'okubiri bwabbaire bweni bw'o muntu, n'obweni obw'okusatu bweni bw'e mpologoma, n'obw'okuna bweni bw'eikookooma. ¹⁵ Era bakerubi baniinire waigulu: ekyo niikyo ekiramu kye naboneire ku mbali kw'omwiga Kebali. ¹⁶ Era bakerubi bwe batambulanga, empanka ne gitambulira ku mbali kwabwe: era bakerubi bwe bayimusyanga ebiwawa byabwe okuniina okuva ku Itakali, so ne mpanka tigyakyukanga okuva ku mbali kwabwe. ¹⁷ Abo bwe bayemereranga, na bano ne bemerera; era ibo bwe baniinanga waigulu, ne bano ne baniinira wamu nabo: kubanga omwoyo gw'ekiramu gwabbaire mu ibo. ¹⁸ Awo ekitiibwa kya Mukama ne kifuluma okuva waigulu ku mulyango gw'enyumba ne kyemerera waigulu wa bakerubi. ¹⁹ Era bakerubi bayimusya ebiwawa byabwe ne baniina okuva ku itakali nze nga mbona bwe baafuluma, ne mpanka ku mbali kwabwe: era beemereire ku lwigi olw'omulyango ogw'ebuvaisana ogw'enyumba ya Mukama; era ekitiibwa kya Katonda wa Isiraeri kyabbaire ku ibo waigulu. ²⁰ Ekyo niikyo kiramu kye naboina wansi wa Katonda wa Isiraeri ku mbali k'omwiga Kebali; ne manya nga niibo bakerubi. ²¹ Buli mumu yabbaire n'obweni buna mumu ku mumu, era buli mumu ebiwawa bina; n'ekifaananyi eky'emikono gy'omuntu kyabbaire wansi w'ebiwawa byabwe. ²² Era ekifaananyi eky'obweni bwabwe, bwe bwabbaire obweni bwe naboneire ku mbali kw'omwiga Kebali, embala gyabwe bona beene; bonabona batambulanga nga beesimba. Ezekyeri