¹ Era ate omwoyo ne gunsitula ne guntwala eri omulyango ogw'ebuvaisana ogw'enyumba ya Mukama ogulingirira ebuvaisana: kale, bona, ku lwigi olw'omulyango nga kuliku abasaiza abiri na bataanu; ne mbona wakati mu ibo Yaazaniya mutaane wa Azuli n'o Peratiya mutaane wa Benaya, abakungu ab'omu bantu. ² N'ankoba nti mwana w'omuntu, bano niibo basaiza abagunja obutali butuukirivu, era abawa okuteesya okubbiibi mu kibuga kino: ³ abatumula nti Ekiseera tekiri kumpi okuzimba enyumba: ekibuga kino niiyo ntamu, feena nyama. ⁴ Kale obalagulireku, lagula, ai omwana w'omuntu. ⁵ Awo omwoyo gwa Mukama ne gungwaku, n'ankoba nti tumula nti ati bw'atumula Mukama nti mutyo bwe mutumwire, ai enyumba ya Isiraeri; kubanga maite ebigambo ebiyingira mu mwoyo gwanyu. ⁶ Mwairirye abanyu abaitiibwe mu kibuga kino, era mwizwirye enguudo gyakyo abo abaitiibwe. ⁷ Mukama Katonda kyava atumula ati nti Abanyu abaitibwe niibo be muteekere wakati mu ikyo, abo niiyo enyama, n'ekibuga niiyo entamu: naye imwe mulitoolebwa wakati mu ikyo. ⁸ Mutiire ekitala; nzena ndibaleetaku ekitala, bw'atumula Mukama Katonda. ⁹ Era ndibatoola wakati mu ikyo, ne mbawaayo mu mikono gya banaigwanga, era ndituukirirya mu imwe emisango. ¹⁰ Muligwa n'ekitala; ndibasalira omusango mu nsalo ya Isiraeri; kale mulimanya nga ninze Mukama. ^{11 12} Ekibuga kino ti niikyo kiribba entamu yanyu, so mwena ti niimwe mulibba enyama wakati mu ikyo; ndibasalira omusango mu nsalo ya Isiraeri; ¹³ Awo olwatuukire bwe nalagwire, Peratiya mutaane wa Benaya n'afa. Awo ne nvuunama amaiso gange, ne nkunga n'eidoboozi inene ne ntumula nti woowe, Mukama Katonda! wamalirawo dala ekitundu kya Isiraeri ekifiikirewo? ¹⁴ Awo ekigambo kya Mukama ne kingizira nga kitumula nti ¹⁵ Mwana w'o muntu, bagande bo, abasaiza ab'ekika kyanyu, n'enyumba yonayona eya Isiraeri, bonabona, niibo abo abakobeibwe abo abali mu Yerusaalemi nti Mwesambe wala Mukama: Ife ensi eno etuweereirwe okubba obutaka: ¹⁶ kale tumula nti Ati bw'atumula Mukama Katonda nti kubanga nabaijuluire ni mbatwala wala mu mawanga, era kubanga mbasaansaanirye mu nsi nyingi era naye ndibba gye bali ekifo ekitukuvu ekiseera ekitono mu nsi gye batuukire. ¹⁷ Kale tumula nti Ati bw'atumula Mukama Katonda nti ndibakuŋaanya okubatoola mu mawanga, ne mbayoola okubatoola mu nsi mwe mwasaansaanyiziibwe, era ndibawa ensi ya Isiraeri. ¹⁸ Kale baliizayo, ne batoolawo ebintu byayo byonabyona eby'ebiive n'emizizyo gyayo gyonagyona ne bagimalayo. ¹⁹ Era ndibawa omwoyo gumu, era nditeeka omwoyo omuyaka mu imwe; era nditoola omwoyo ogw'eibbaale mu mwoyo gwabwe, ne mbawa omwoyo ogw'enyama: ²⁰ Kaisi batambulirenga mu mateeka gange ne bakwata ebyo bye nateekerewo ne babikola: era babbanga bantu bange, nzena nabbanga Katonda waabwe. ²¹ Naye abo, omwoyo gwabwe gutambula okusengererya omwoyo ogw'ebintu byabwe eby'ebiive n'emizizyo gyabwe, ndireeta engira yabwe ku mitwe gyabwe ibo, bw'atumula Mukama Katonda. ²² Awo bakerubi kaisi ne bayimusya ebiwawa byabwe, ne mpanka nga bali ku mbali kwabwe; n'ekitiibwa kya Katonda wa Isiraeri kyabbaire ku ibo waigulu. ²³ N'ekitiibwa kya Mukama ne kiniina okuva wakati mu kibuga, ni kyemerera ku lusozi oluli ku luuyi lw'ekibuga olw'ebuvaisana. ²⁴ Omwoyo ne gunsitula ne guntwalira mu kwolesebwa olw'omwoyo gwa Katonda e Bukaludaaya eri ab'obusibe. Awo okwolesebwa kwe nabbaire mboine ne kuniina okunvaaku. ²⁵ Awo ne ntumula n'ab'obusibe ebigambo byonabyona Mukama bye yabbaire andagire.