¹ Awo oluvannyuma n'a ntwala eri omulyango, omulyango ogwo ogulingirira obuvaisana: ² kale, bona, ekitiibwa kya Katonda wa Isiraeri nga kiiza nga kiva mu ngira ey'e buvaisana: n'e idoboozi lye lyabbaire ng'o kuwuuma kw'a maizi amangi: ensi n'e masamasa olw'e kitiibwa kye. ³ Era kyabbaire ng'embala ey'o kwolesebwa kwe nabona, ng'o kwolesebwa kwe n'abona bwe naiza okuzikirirya ekibuga: era okwolesebwa kwabbaire ng'o kwolesebwa kwe naboine ku lubalama lw'o mwiga Kebali: awo ne nvuunama amaiso gange. ⁴ Awo ekitiibwa kya Mukama ne kiyingira mu nyumba nga kifuluma mu ngira ery'o mulyango ogulingirira ebuvaisana. ⁵ Omwoyo ni gunsitula ne gundeeta mu luya olw'o munda; kale, bona, ekitiibwa kya Mukama ne kiizula enyumba. ⁶ Awo ne mpulira atumula nanze ng'ayema mu nyumba; omusaiza n'ayemerera ku mbali kwange. ⁷ Awo n'a nkoba nti Mwana w'o muntu, kino niikyo kifo eky'e ntebe yange, n'e kifo ebigere byange we biniina, we nabbanga wakati mu baana ba Isiraeri emirembe gyonagyona: so n'e nyumba ya Isiraeri terigwagwawalya ate eriina lyange eitukuvu, bo waire kabaka waabwe, olw'o bwenzi bwabwe n'o lw'emirambo gya bakabaka baabwe mu bifo byabwe ebigulumivu; ⁸ nga bateeka omulyango gwabwe ku mbbali kw'o mulyango gwange, n'o mufuubeeto gwabwe ku mbali kw'o mufuubeeto gwange, ekisenge ekyereere n'ikyawula nze nabo; era bagwagwawairye eriina lyange eitukuvu n'e mizizo gyabwe gye bakola: kyenaviire mbamalawo n'o busungu bwange. ⁹ Atyanu batoolewo obwenzi bwabwe n'e mirambo gya bakabaka baabwe okubba ewala nanze, nzena nabbanga wakati mu ibo emirembe gyonagyona. ¹⁰ Iwe omwana w'o muntu, laga enyumba ya Isiraeri enyumba, bakwatiirwe ensoni obutali butuukirivu bwabwe: era bagere ekyokuboneraku. ¹¹ Awo bwe bakwatirwa ensoni ebyo byonabyona bye bakolere, bategeeze enyumba bw'e faanana n'e ngeri yaayo n'a wafulumirwa n'a wayingirirwa n'e mbala gyayo gyonagyona n'e biragiro byayo byonabyona n'e mbala gyayo gyonagyona n'a mateeka gaayo gonagona, ogiwandiike ibo nga babona: Kaisi bagikwate yonayona: nga bw'e faanana n'e biragiro byayo byonabyona, babikolenga. ¹² Lino niilyo iteeka ery'e nyumba: ku ntiiko y'o lusozi embbiibi yaayo yonayona enjuyi gyonagyona eribba ntukuvu inu. Bona, eryo niilyo eiteeka ery'e nyumba. ¹³ Era kuno niikwo kugerebwa kw'e kyoto ng'e mikono bwe gyekankana: (omukono gwe mukono ko oluta:) entobo eribba y'o mukono gumu, n'o bugazi mukono gumu, n'o mwigo gwakyo ku munwa gwakyo okwetooloola gulibba gwo luta: era eyo niiyo yabba entobo y'e kyoto. ¹⁴ N'o kuva ku ntobo wansi okutuuka ku mwigo ogwe wansi walibba emikono ibiri n'o bugazi omukono gumu; n'o kuva ku mwigo omutono okutuuka ku mwigo omunene walibba emikono ina n'o bugazi omukono gumu. ¹⁵ N'e kyoto ekya waigulu kiribba kye mikono ina: n'o kuva ku kyoto wansi n'o kwambukayo walibba amaziga ana. ¹⁶ N'e kyoto wansi kiribba emikono ikumi n'a ibiri obuwanvu n'e ikumi n'e ibiri obugazi, enjuyi gyakyo ina nga gyekankana. ¹⁷ N'omwigo gulibba emikono ikumi n'a ina obuwanvu n'e ikumi n'e ina obugazi, mu njuyi gyagwo ina; n'o mwigo ogugwetooloola gulibba kitundu kye mukono; n'e ntobo yaagwo eribba omukono gumu enjuyi gyonagyona; n'a madaala gaagwo galiringira ebuvaisana. ¹⁸ N'a nkoba nti mwana w'o muntu, Ati bw'atumula Mukama Katonda nti bino niibyo biragiro eby'e kyoto ku lunaku lwe balikikola, okuweerangayo, okwo ebiweebwayo ebyokyebwa n'o kumansirangaku omusaayi. ¹⁹ Bakabona, Abaleevi ab'o ku izaire lya Zadoki abandi okumpi, olibawa ente okubba ekiweebwayo olw'e kibbiibi, okumpeererya, bw'atumula Mukama Katonda. ²⁰ Era olitoola ku musaayi gwayo n'o guteeka ku maziga gaakyo ana n'o ku nsonda ina egy'o mwigo n'o ku mwigo ogwetooloola; otyo bwe kirongoosyanga n'okitangirira. ²¹ Era otwalanga ente ey'e kiweebwayo olw'e kibbiibi, n'agyokyerya mu kifo eky'enyumba ekyalagiirwe ewanza w'a watukuvu. ²² Awo ku lunaku olw'o kubiri n'o wangayo embuli enume ebulaku buleme okubba ekiweebwayo olw'e kibbiibi; ni balongoosya ekyoto nga bwe bakirongoosya n'e nte. ²³ Bw'olimala okukirongoosya, owangayo ente envubuka ebulaku buleme n'e ntama enume ebulaku buleme etooleibwe mu kisibo. ²⁴ N'obisemberya mu maiso ga Mukama, bakabona ne babisuulaku omunyu ne babiwaayo okubba ekiweebwayo ekyokyebwa eri Mukama. ²⁵ Mu naku omusanvu wategekerangamu buli lunaku embuli okubba ekiweebwayo olw'e kibbiibi era bategekenga ente envubuka n'e ntama enume ebulaku buleme etooleibwe mu kisibo. ²⁶ Enaku musanvu batangirirenga ekyoto bakirongoosye; batyo bwe babba bakyawula: ²⁷ Awo bwe balimala enaku egyo, olulituuka ku lunaku olw'o munaana n'o kweyongerayo, bakabona baweerengayo ku kyoto ebiweebwayo byanyu ebyokyebwa n'e biweebwayo byanyu olw'emirembe; nzena ndibaikirirya, bw'atumula Mukama Katonda.