¹ Okuumanga ekigere kyo bw'oyabanga mu nyumba ya Katonda; kubanga okusembera okuwulira kusinga okuwaayo Sadaaka ey'abasirusiru: kubanga tebamaite nga bakola kubbiibi. ² Omunwa gwo tegwanguyirizyanga, so n'omwoyo gwo guleke okwanguyirizyanga okutumula ekigambo kyonakyona mu maiso ga Katonda; kubanga Katonda ali mu igulu, naiwe oli ku nsi: kale ebigambo byo bibbenga bitono. ³ Kubanga ekirooto kiizira wamu n'obungi bw'emirimu; n'eidoboozi ly'omusirusiru liizira wamu n'obungi bw'ebigambo. ⁴ Bweweyamanga obweyamu eri Katonda, tolwangawo okubusasula; kubanga tasanyukira basirusiru: osasulanga ekyo kye weeyamire. ⁵ Waakiri oleke okweyama, okusinga okweyama n'oleka okusasula. ⁶ Toganyanga munwa gwo okwonoonesya omubiri gwo; so totumulanga mu maiso ga malayika nga kwabbaire kusobya: Katonda kiki ekyabba kimusunguwalirya eidoboozi lyo, n'azikirizya omulimu ogw'emikono gyo? ⁷ Kubanga bwe kituukirira kityo olw'obungi lw'ebirooto n'obutaliimu n'ebigambo ebingi: naye iwe otyanga Katonda. ⁸ Bwewabonanga abaavu nga babajooga, era nga balya ensonga olw'amaani ne banyoola omusango mu isaza, teweewuunyanga kigambo ekyo: kubanga asinga abagulumivu obugulumivu ateekayo omwoyo; era waliwo abasinga ibo obugulumivu. ⁹ Ate ekyengera eky'eitakali kibba kya bonabona: kabaka mwene enimiro emuweereza. ¹⁰ Ataka feeza taikutenga feeza; so n'oyo Ataka obusa, ekyengera tekyamwikutyenga: era n'ekyo butaliimu. ¹¹ Ebintu bwe byeyongera, n'abo ababirya ne beeyongera: kale magoba ki mwene wabyo g'afuna, wabula okubibona obuboni n'amaiso ge? ¹² Endoolo gy'omukozi w'emirimu gimuwoomera, oba nga alya bitono oba nga bingi: naye omwikuto ogw'omugaiga tegumumwikirirya kugona. ¹³ Waliwo ekibbiibi ekinene kye naboine wansi w'eigulu, niikyo kino, obugaiga mwene wabwo bw'akuuma ne yeerumya yenka: ¹⁴ obugaiga obwo ne buzikirira olw'ebigambo ebibbiibi ebiwaawo; era bw'abba ng'azaire omwana, nga mubula kintu mu mukono gwe. ¹⁵ Nga bwe yaviire mu kida kya maye, ng'ali bwereere, atyo bw'aliirayo, nga bwe yaizire, so talitwala kintu olw'okutegana kwe, ky'asobola okutwala mu mukono gwe. ¹⁶ Era n'ekyo kibibiibi kinene, ng'alyaba ng'ali atyo mu bigambo byonbyona era; nga bwe yaizire: era magoba ki g'alina n'okutegana n'ateganira mpewo? ¹⁷ Era enaku gye gyonagyona aliira mu ndikirirya, era yeeraliikirira inu, era abaaku endwaire n'obusungu. ¹⁸ Bona, ekyo kye naboine nga niikyo ekiwooma niikyo ekisaana niikyo kino, omuntu okulyanga n'okunywanga n'okusanyukiranga ebisa mu kutegana kwe kwonakwona kw'ategana wansi w'eisana enaku gyonagyona egy'obulamu bwe Katonda bwe yamuwaire: kubanga ogwo niigwo mugabo gwe. ¹⁹ Era buli muntu Katonda gw'awaire obugaiga n'ebintu, era ng'amuwaire obuyinza okulyangaku n'okukwatanga omugabo gwe n'okusanyukiranga okutegana kwe; ekyo niikyo kirabo kya Katonda. ²⁰ Kubanga taliijukira einu enaku egy'obulamu bwe; kubanga Katonda amwiramu olw'okusanyuka kw'omwoyo gwe.