¹ No Sawulo yasiimire okwitibwa kwe. Ne wabaawo ku lunaku olwo okuyigganyizibwa kunene ku kanisa eyabbaire mu Yerusaalemi. Bonabona ne basaansaanira mu nsi gy'e Buyudaaya n'e Samaliya, wabula abatume. ² Abantu abaatya Katonda ne baziika Suteefano, ne bamukungira inu. ³ Naye Sawulo n'akolera ekanisa ekyeju kingi, ng'ayingira mu buli nyumba, ng'awalula abasaiza n'abakali n'abateeka mu ikomera. ⁴ Awo abo abaasaansaanire ne baaba nga babuulira ekigambo. ⁵ Firipo n'aserengeta mu kibuga eky'e Samaliya, n'ababuulira Kristo. ⁶ Ebibiina ne biwulira n'omwoyo gumu ebigambo Firipo by'aytumwire, bwe baawuliire ne babona eby'amagero ge yakolanga. ⁷ Kubanga bangi ku ibo ababbaireku dayimooni, ne babavangaku nga bakunga n'eidoboozi inene: ne bawonanga bangi ababbaire balwaire okukoozimba n'abaleme. ⁸ Eisanyu lingi ne libba mu kibuga omwo. ⁹ Naye waaliwo omuntu omumu, eriina lye Simooni, eyakolanga eirogo eira mu kibuga omwo n'awuniikirizanga eigwanga ly'e Samaliya, ng'akoba nti niiye mukulu; ¹⁰ ne bamuwuliranga bonabona okuva ku mutomuto okutuuka ku mukulu, nga bakoba nti Omuntu ono niigo amaanyi ga Katonda ageetebwa Amangi. ¹¹ Ne bamuwuliranga, kubanga enaku nyingi yabawuniinkirizianga n'okuloga kwe. ¹² Naye bwe baikirirye Firipo ng'abuulira enjiri ey'obwakabaka bwa Katonda n'erinnya lya Yesu Kristo, ne babatizibwa abasaiza n'abakali. ¹³ Era ne Simooni mwene n'aikirirya: bwe yamalire okubatizibwa n'abbanga wamu no Firipo; bwe yabonanga eby'amagero n'obubonero obunene obwakolebwanga ne yeewuunya. ¹⁴ Awo abatume ababbaire mu Yerusaalemi bwe baawuliire nga e Samaliya baikirirye ekigambo kya Katonda, ne babatumira Peetero no Yokaana. ¹⁵ Boona bwe batuukire ne babasabira okuweebwa Omwoyo Omutukuvu: ¹⁶ kubanga yabbaire akaali okubaikaku n'omumu ku ibo: naye baabatizibwe bubatizibwi okuyingira mu liina lya Mukama waisu Yesu. ¹⁷ Awo ne babateekaku emikono, ne baweebwa Omwoyo Omutukuvu. ¹⁸ Naye Simooni bwe yaboine ng'olw'okuteekebwaku emikono gy'abatume baaweebwa Omwoyo Omutukuvu, n'abaleetera feeza ¹⁹ ng'akoba nti Mumpe nzeena obuyinza buno buli gwe nateekangaku emikono aweebwenga Omwoyo Omutukuvu. ²⁰ Naye Peetero n'amukoba nti Efeeza yo ezikirire naiwe, kubanga olowoozerye okufuna ekirabo kya Katonda n'ebintu. ²¹ Obula mugabo waire okugabana mu kigambo kino: kubanga omwoyo gwo ti mugolokofu mu maiso ga Katonda. ²² Kale weenenye obubbiibi bwo obwo, osabe Mukama waisu, koizi olisonyiyibwa ekirowoozo eky'omu eky'omu mwoyo gwo. ²³ Kubanga nkubona oli mu mususa ogukaawa no mu nvuba y'obubbiibi. ²⁴ Simooni n'airamu n'akoba nti Munsabire imwe eri Mukama ebigambo ebyo bye mutumwire bireke okumbaaku n'ekimu. ²⁵ Awo bwe bamalire okutegeezia n'okubuulira ekigambo kya Mukama waisu, ne bairayo e Yerusaalemi, ne babuulira enjiri mu mbuga nyingi egy'Abasamaliya. ²⁶ Naye malayika wa Mukama n'akoba Firipo ng'atumula nti Golokoka, oyabe obukiika obw'omuliiro okutuuka mu ngira eserengeta okuva mu Yerusaalemi okutuuka e Gaaza: engira eyo ye idungu. ²⁷ N'agolokoka n'ayaba: kale, bona, omuntu Omuwesiyopya, omulaawe omukungu wa Kandake kabaka Omukali ow'Abaesiyopya, eyabbaire omuwanika w'ebintu bye byonabyona, yabbaire aizire e Yerusaalemi okusinza, ²⁸ yabbaire airayo n'atyama mu gaali ye, n'asoma nabbi Isaaya. ²⁹ Omwoyo n'akoba Firipo nti Sembera, weegaite n'egaali eyo. ³⁰ N'airuka Firipo n'amuwulira ng'asoma nabbi Isaaya, n'akoba nti Obitegeire by'osoma? ³¹ N'akoba nti Nsobola ntya, wabula nga waliwo eyandagirira? Ne yeegayirira Firipo aniine atyame naye. ³² Mu kifo awaawandiikiibwe we yabbaire asoma niiwo awakoba nti Yatwalibwe okwitibwa ng'entama, Era ng'omwana gw'entama mu maiso g'omusali w'ebyoya bwe gusirika, Kityo teyayasamirye omunwa gwe: ³³ Mu kwetoowazia kwe omusango gwe gwatooleibwewo: Ekika kye yani alikinyonnyola? Kubanga obulamu bwe butolebwa mu nsi. ³⁴ Omulaawe n'airamu Firipo n'akoba nti Nkwegayirire, nabbi yatumwire ku yani ebigambo bino? Bibye yenka oba byo muntu gondi? ³⁵ Firipo n'ayasama amunwa gwe n'asookera ku kyawandiikibwa kino n'amubuulira Yesu. ³⁶ Awo bwe babbaire batambula mu ngira ne batuuka awali amaizi; omulaawe n'akoba nti Bona, amaizi; kiki ekindobera okubatizibwa? ³⁷ (Firipo n'akoba nti Oba ng'oikirirya n'omwoyo gwo gwonagwona, kisa. N'airamu n'akoba nti Ngikirirya Yesu Kristo nga niiye Mwana wa Katonda.) ³⁸ N'alagira egaali okwemerera: ne bakka bombiri mu maizi. Firipo n'omulaawe; n'amubatiza. ³⁹ Bwe baviire mu maizi, Omwoyo gwa Mukama n'atwala Firipo, omulaawe n'atamubona ate: kubanga yaabire ng'asanyuka. ⁴⁰ Naye Firipo yabonekeire mu Azoto: bwe yabitire n'abuulira mu bibuga byonabyona okutuuka e Kayisaliya.