¹ Kabona asinga obukulu n'atumula nti Ebyo bwe biri bityo? ² Suteefano n'akoba nti Abasaiza ab'oluganda era basebo, muwulire. Katonda ow'ekitiibwa yabonekeire zeiza waisu Ibulayimu ng'ali e Mesopotamiya, nga akaali kubba Kalani, ³ n'amukoba nti Va mu nsi yanyi no mu kika kyo, oyabe mu nsi gye ndikulaga. ⁴ Awo n'ava mu nsi y'Abakaludaaya, n'abba mu Kalani: oluvanyuma itaaye bwe yamalire okufa, n'amutoolayo n'amuleeta mu nsi eno mwe mutyaime imwe atyanu; ⁵ so teyamuwaire butaka muno waire awaninibwa ekigere: n'asuubizia okugimuwa okugitoola, iye n'eizaire lye oluvanyuma lwe, nga kaali nokumuwa mwana. ⁶ Katonda n'atumulira wakati ati ng'eizaire lye baliba bagenyi mu nsi y'abandi; balibafuula abaidu, balibakolera Obubbiibi emyaka bina. ⁷ N'eigwanga eriribafuula abaidu nze ndisala omusango gwalyo, bwe yatumwire Katonda: n'oluvanyuma balivaayo balinsinzizia mu kifo kino. ⁸ N'amuwa endagaanu ey'okukomola: awo Ibulayimu n'azaala Isaaka, n'amukomolera ku lunaku olw'omunaana: ne Isaaka n'azaala Yakobo: ne Yakobo n'azaala bazeiza abakulu eikumi n'ababiri. ⁹ Bazeiza abakulu bwe baakwatiirwe Yusufu eiyali ne bamutunda mu Misiri. Katonda n'abbanga naye, ¹⁰ n'amulokola mu naku gye gyonagyona, n'amuwa okuganja n'amagezi mu maiso ga Falaawo kabaka w’e Misiri, n'amufuula omufuzi mu Misiri no mu nyumba ye yonayona. ¹¹ Enjala n'egwa ku nsi yonayona ey'e Misiri n'eya Kanani, n'enaku nyingi, so ne batabona mere bazeiza baisu. ¹² Naye Yakobo bwe yawuliire ng'emere enkalu eri Misiri, n'atuma bazeiza baisu omulundi ogw'oluberyeberye: ¹³ n'omulundi ogw'okubiri Yusufu bagande ne bamutegeera: ekika kya Yusufu ne kimanyibwa Falaawo. ¹⁴ Yusufu n'atuma n'ayeta Yakobo Itaaye na bagande bonabona, abantu nsanvu na bataanu. ¹⁵ Yakobo n'aikirira e Misiri, n'afiirayo, iye na bazeiza baisu; ¹⁶ ne batwalibwa e Sekemu; ne baziikibwa mu ntaana Ibulayimu gye yagulire omuwendo gw'efeeza ku baana ba Kamoli mu Sekemu. ¹⁷ Naye Ng'ebiseera eby'okusuubizia bwe byabbaire okumpi, Katonda kwe yayatuliire Ibulayimu, abantu ne beeyongera ne baala mu Misiri, ¹⁸ okutuusia kabaka ogondi lwe yabbairewo ku Misiri ataamanyire Yusufu. ¹⁹ Oyo bwe yasaliire amagezi eigwanga lyaisu, n'akola Obubbiibi bazeiza baisu, ng'abasuuzianga abaana baabwe abawere baleke okubba abalamu. ²⁰ Mu biseera ebyo Musa n'azaalibwa, n'abba musa eri Katonda, ne bamuliisirya emyezi isatu mu nyumba ya itaaye. ²¹ Bwe yasuuliibwe, muwala wa Falaawo n'amutwala n'amulera ng'omwana we. ²² Musa n'ayigirizibwa mu magezi gonagona ag'e Misiri; n'abba wa maani mu bigambo bye no mu bikolwa bye. ²³ Naye obukulu bwe yabbaire ali kumpi okutuusia emyaka ana, n'alowooza mu mwoyo gwe okubona bagande, abaana ba Isiraeri. ²⁴ Bwe yaboine omuntu akolwa Obubbiibi, n'amutaasia, n'amuwoolera eigwanga omuntu eyabbaire akolwa Obubbiibi, n'akubba Omumisiri. ²⁵ N'alowooza nti baganda be bategeera nga Katonda ayaba okubawa obulokozi mu mikono gye: naye tebaategeire. ²⁶ Ate ku lunaku olw'okubiri n'abasanga nga balwana, n'ageziaku okubatabaganya, ng'akoba nti Abasaiza, imwe muli bo luganda: kiki ekibakozia Obubbiibi mwenka na mwenka? ²⁷ Naye odi eyabbaire akola mwinaye Obubbiibi n'amusindika edi, ng'akoba nti Yani eyakufiire iwe omukulu n'omulamuzi waisu? ²⁸ Otaka kungita nze nga bwe waitire Omumisiri eizo? ²⁹ Musa n'airuka olw'ekigambo ekyo, n'abba mugeni mu nsi ya Midiyaani, gye yazaaliire abaana babiri ab'obulenzi. ³⁰ Awo emyaka ana bwe gyatuukire, malayika wa Mukama n'amubonekera mu nimi gy'omusyo nga gwaka mu kisaka, bwe yabbaire mu idungu ku lusozi Sinaayi. ³¹ Musa bwe yaboine ne yeewuunya ky'aboine. Bwe yasembeire okwetegerezia, ne wabbaawo eidoboozi lya Mukama nti ³² Niinze Katonda wa bazeiza bo, Katonda wa Ibulayimu, era owa Isaaka, era owa Yakobo. Musa n'akankana, so teyagumire kulingirira. ³³ Mukama n'amukoba nti Sumulula engaito egiri mu bigere byo: kubanga mu kifo wano w'oyemereire watukuvu. ³⁴ Okkubona mboine okukolwa Obubbiibi abantu bange abali mu Misiri, ne mpulira okusinda kwabwe, ne njika okubawonya. Kale atyanu iza, nakutuma mu Misiri. ³⁵ Oyo Musa gwe baagaine nga bakoba nti Yani eyakufiire omukulu era omulamuzi? oyo Katonda gwe yatumire okubba omukulu era omununuzi mu mukono gwa malayika eyamubonekeire mu kisaka. ³⁶ Oyo n'abaggyawo bwe yamalire okukola amagero n'obubonero mu Misiri, no mu Nyanza Emyufu, ne mu idungu emyaka ana. ³⁷ Oyo niiye Musa odi eyakobere abaana ba Isiraeri nti Katonda alibaleetera nabbi aliva mu bagande banyu nga nze. ³⁸ Oyo niiye yabbaire mu kanisa mu idungu, wamu no malayika eyayogerera naye ku lusozi Sinaayi, era wamu na bazeiza baisu; eyaweweibwe ebigambo eby'obulamu okutuwa ife: ³⁹ bazeiza baisu gwe batatakire kuwulira, naye baamusindiike edi, ne bairayo e Misiri mu myoyo gyabwe, ⁴⁰ nga bakoba Alooni nti Tukolere bakatonda abalitutangira: kubanga Musa oyo, eyatutoire mu nsi y'e Misiri, tetumaite ky'abbaire. ⁴¹ Ne bakola enyana mu naku gidi, ekifaananyi ne bakireetera sadaaka, ne basanyukira emirimu gy'emikono gyabwe. ⁴² Naye Katonda n'akyuka, n'abawaayo okusinzanga eigye ery'omu igulu; nga bwe kyawandiikiibwe mu kitabo kya banabbi nti Mwampeeranga nze ensolo egyaitibwanga ne sadaaka Emyaka ana mu idungu, enyumba ya Isiraeri? ⁴³ Ne musitula eweema ya Moloki, N'emunyenye ya katonda Lefani, Ebifaananyi bye mwakolere okubisinzanga: Nzeena ndibatwala enyuma w’e Babbulooni. ⁴⁴ N'eweema ey'obujulirwa yabbaire na bazeiza baisu mu idungu, nga bwe yalagiire eyakobere Musa okugikola ng'engeri gye yaboine bwe yabbaire: ⁴⁵ bazeiza bwe bagiweweibwe ne bagireeta wamu no Yoswa bwe baliire amatwale g'ab'amawanga, Katonda be yagobanga mu maiso ga bazeiza baisu okutuusya mu naku gya Dawudi; ⁴⁶ eyasiimiibwe mu maiso ga Katonda, n'asaba okumusagirira aw'okutyamisya Katonda wa Yakobo. ⁴⁷ Naye Sulemaani n'amuzimbira enyumba. ⁴⁸ Naye Ali waigulu einu tatyama mu nyumba egyakoleibwe n'emikono; nga nabbi bw'atumula nti ⁴⁹ Eigulu niiyo entebe yange, N'ensi niiyo entebe y'ebigere byange: Nyumba ki gye mulinzimbira? bw'atumula Mukama: Oba kifo ki mwe ndiwumulira? ⁵⁰ Omukono gwange ti niigwo gwabikolere ebyo byonabyona? ⁵¹ Imwe abalina eikoti eikakanyavu, abatakomolebwa mu myoyo no mu matu, imwe muziyizia buliijo Omwoyo Omutukuvu; nga bazeiza banyu, Mweena mutyo. ⁵² Nabbi ki gwe bataayigganyirye bazeiza banyu? Baitanga abaasookere okubuulira ebigambo eby'okwiza kwe Omutuukirivu, gwe mumalire okuwaayo atyanu okumwita; ⁵³ imwe abaaweweibwe amateeka nga bwe gaalagirwa bamalayika, so temwagakwaite. ⁵⁴ Awo bwe baawuliire ebyo ne balumwa mu myoyo gyabwe, ne bamulumira ensaya. ⁵⁵ Naye bwe yaizwire Omwoyo Omutukuvu, n'akalirizia amaiso mu igulu, n'abona ekitiibwa kya Katonda, no Yesu ng'ayemereire ku mukono omuliiro ogwa Katonda; ⁵⁶ n'akoba nti bona, ningiriire eigulu nga libikukire n'Omwana w'Omuntu ng'ayemereire ku mukono omuliiro ogwa Katonda. ⁵⁷ Ne baleekaana N'eidoboozi inene, ne baziba amatu gaabwe, ne bamweyiwaku n'omwoyo gumu, ⁵⁸ ne bamusindiikirirya ewanza w'ekibuga, ne bamukubba amabbaale. Abajulizi ne bateeka engoye gyabwe ku bigere by'omulenzi, eriina lye Sawulo. ⁵⁹ Ne bakubba amabbaale Suteefano bwe yasabiire n'akoba nti Mukama wange Yesu, twala omwoyo gwange. ⁶⁰ N'afukamira n'akunga n'eidoboozi inene nti Mukama wange, tobabalira kibbiibi kino. Bwe yamalire okutumula ebyo n'agona.