¹ Awo bwe kyalagiirwe ife okuwanika amatanga okwaba Italiya, ne bawaayo Pawulo n'abasibe abandi abamu eri omwami, eriina lye Yuliyo, ow'ekitongole kya Augusito. ² Ne tusaabala mu kyombo eky'e Adulamutiyo ekyabbaire kyaba ku njuyi gy'e Asiya, ne tuvaayo, Alisutaluuko ow'e Makedoni ow'omu Sesalonika yeena ng'ali naife. ³ Ku lunaku olw'okubiri ne tugoba e Sidoni: Yuliyo n'akola kusa Pawulo n'amwikirisya okwaba eri mikwanu gye okumulabirira. ⁴ Ne tuvaayo ne tubita ku mbali kwa Kupulo kubanga omuyaga gwabbaire gutuva mu bwengula. ⁵ Bwe twabitire mu nyanza ey'e Kirukiya n'e Panfuliya; ne tutuuka e Mula eky’e Lukiya. ⁶ Omwami n'abonayo ekyombo eky'e Alegezanderiya nga kigenda Italiya; n'atusaabalya mu ekyo. ⁷ Bwe twayabire empola enaku nyingi ne tutuuka lwe mpaka ku Kunido, omuyaga bwe gwatulobeire, ne tubita ku mbali ga Guleete mu maso ga Salumone; ⁸ ne tukibitaku lwe mpaka ne tutuuka mu kifo ekyetebwa Emyalo Emisa; awaliraine ekibuga Lasaya. ⁹ Bwe bwetwabitirewo ebiseera bingi, obubbiibi bwabbaire bumalire okubbaawo okwaba mu nyanza kubanga enaku eg'yOkusiiba gyabbaire gibitire, Pawulo n'abalabula ¹⁰ ng'abakoba nti Abasaiza, mbona nti olugendo luno lulibbaamu okwonoonekerwa n'okufiirwa kungi ti kwe bintu byonka n'ekyombo, era naye n'obulamu bwaisu. ¹¹ Naye omwami n'aikirirya omubbinga no mwene we kyombo okusinga Pawulo by'atumwire. ¹² Kubanga omwalo tegwabbaire musa okwewogomamu omuyaga, abamu bangi ne bateesia okuvaayo, koizi kaisi batuuke e Foyiniiki okwewogoma omuyaga; niigwo mwalo ogw'e Kuleete ogulingirira wakati w'obukiika n'ebuvaisana, no wakati w'obukiika obundi n'ebuvaisana. ¹³ Empewo egy'omuigundu bwe gyakuntire empola, ne balowooza nti bafunire kye babbaire bataka, ne basimbula esiika ne babita kumpi inu ne Kuleete. ¹⁴ Naye oluvanyuma lw'ebiseera ti bingi omuyaga ogulimu kibuyaga ogwaviireyo ogwetebwa Ewulakulo ne gukunta: ¹⁵ ekyombo bwe kyakwatiibwe ne kitasobola kwolekera muyaga, ne tukireka ne tutwalibwa omuyaga. ¹⁶ Ne tweyuna mu mbali g'akazinga aketebwa Kawuda, ne tutegana okukwata eryato: ¹⁷ bwe baamalire okuliniinisia, ne kwata emiguwa egy'okunywezia ekyombo ne bakisiba wansi. Bwe batiire okusuulibwa mu Suluti, ne baikya ebyabbaire waigulu, ne batwalibwa omuyaga. ¹⁸ Bwe twateganire einu n'omuyaga, ku lunaku olw'okubiri ne basiikulula ebintu, ¹⁹ era ku lw'okusatu ne basuula n'emikono gyabwe ebitwala ekyombo. ²⁰ Era eisana waire emunyenye mu naku nyingi nga tebyaka, era n'omuyaga ti mutono ogwatukwaite, oluvannyuma eisuubi lyonna ery'okulokoka ne rituwaamu. ²¹ Enjala bwe yabbaire enyingi, awo Pawulo kaisi n'ayemerera wakati waabwe n'akoba nti Kyabagwaniire, abasaiza, okumpulira obutava mu Kuleete, obutabona kwonoonekerwa kuno n'okufiirwa. ²² Era atyanu mbabuulirira okuguma emyoyo; kubanga tewaabbe mu imwe eyafiirwa obulamu n'akatono wabula ekyombo. ²³ Kubanga we ndi wemereire obwire buno malayika wa Katonda, niinze owuwe, gwe mpeereza, ²⁴ ng'akoba nti Totya, Pawulo; kikugwaniire okwemerera awali Kayisaali; era, bona, Katonda akuwaire bonabona abaaba awamu naiwe. ²⁵ Kale mugume emyoyo, abasaiza; kubanga ngikirirya Katonda nga kiribba nga bwe yankobere. ²⁶ Naye kitugwaniire okusuulibwa ku kizinga. ²⁷ Naye obwire ebw'eikumi n'eina bwe bwatuukire, nga tusuukundirwa eruuyi n'eruuyi mu Aduliya, mu itumbi abalunyanza ne bateeberezerye nti balikumpi okusemberera eitale; ²⁸ ne bagera ne babona ebifubba abiri: bwe twayabireku katono, ne bagera era, ne babona ebifubba ikumi na bitaanu. ²⁹ Bwe batiire okutyerera awali amabbaale, ne basuula amasiika ana ku kiwenda ne balindirira bukye. ³⁰ Abalunyanza bwe babbaire bataka okwiruka mu kyombo ne bamala okuteeka eryato mu nyanza ng'abaaba okusuula amasiika ku nsanda, ³¹ Pawulo n'akoba omwami n'abasirikale nti Bwe bataabbe bano mu kyombo, imwe temwasobole kulokoka. ³² Basirikale kaisi ne basala emiguwa egy'eryato ne balireka okwaba. ³³ Awo bwe bwabbaire bulikumpi okukya, Pawulo n'abeegayirira bonabona okulya ku mere, ng'akoba nti Atyanu lunaku lwe ikumi na ina gye mwakalindiririra nga musiiba ne mutalya kantu. ³⁴ Kyenva mbeegayirira okulya ku mere: kubanga okwo kwabalokola: kubanga tewaabule luziiri ku mitwe gyanyu n'omumu. ³⁵ Bwe yamalire okutumula atyo n'akwata omugaati, ne yeebalirya Katonda mu maiso ga bonabona n'agumenyamu n'atandiika okulyaku. ³⁶ Bonabona ne baguma emyoyo, boona ne balyaku. ³⁷ Ne tuba fenafena abaali mu kyombo emyoyo bibiri mu nsanvu mu mukaaga. ³⁸ Bwe baamalire okwikuta emere, ekyombo ne bakiwewula nga basuula eŋaanu mu nyanza. ³⁹ Bwe bwakyeire amakeeri, nga tebamaite gye bali: naye ne babona ekikono ekiriku omusenyu; ne bateesia, oba nga kisoboka, okuseezia omwo ekyombo. ⁴⁰ Ne bakutula amasiika, ne bagaleka mu nyanza, mu kiseera ekyo bwe baasumulwire emigwa egy'enkasi ebbinga, ne bawanika eitanga edi mu maiso eri empewo ne boolekera ku itale. ⁴¹ Naye bwe baatuukiire mu kifo amayengo mabiri we gaasisinkana, ne baseezia ekyombo; ensanda n'eseera n'eguma n'etanyeenya, naye ekiwenda ne kizibikuka n'amaani g'amayengo. ⁴² Basirikale ne bateesia abasibe baitibwe baleke okugwera okwiruka. ⁴³ Naye omwami bwe yatakire okuwonya Pawulo, n'abaziyizia okukola kye bateeserye; n'alagira abasoboire okugwera okwesuulamu basooke okutuuka ku itale; ⁴⁴ n'abandi abaasigairewo, abamu ku mpero, n'abamu ku bintu by'ekyombo. Awo bwe batyo bonabona ne batuuka ku itale emirembe.