¹ Bwe twamalire okulokoka ne kaisi netutegeera ng'ekizinga kyetebwa Merita. ² Banaigwanga ne batukola obusa obutali bwa bulijo: kubanga baakumire omusyo, ne batusembezia fenafena olw'amaiz agatoonyere n'olw'empewo. ³ Naye Pawulo bwe yakuŋaanyirye omuganda gw'obuku, n'aguteeka mu musyo, embalasaasi n'evaamu olw'eibbugumu n'emweripa ku mukono. ⁴ Banaigwanga bwe baboine ekyekulula nga kireebeetera ku mukono, ne bakoba bonka na bonka nti Mazima omuntu ono mwiti; waire ng'alokokere mu nyanza, omusango tegumuganisya kubba mulamu. ⁵ Naye n'akunkumulira mu musyo ekyekulula n'atabbaaku kabbiibi. ⁶ Naye badi ne balowooza nti yazimba oba yasinduka, okugwa edi nga mufu: naye bwe baalwirewo einu nga bamulingirira ne batabona kibbiibi ky'abbaireku, ne bakyuka ne bakoba nti katonda. ⁷ Wabbairewo kumpi n'ekifo ekyo ensuku g'yomuntu omukulu w'ekizinga, eriina ne Pubuliyo: oyo n'atusembezia n'atuijanjabira n'ekisa enaku isatu. ⁸ Awo Itaaye wa Pubuliyo yabbaire agalamiire, ng'alwaire omusuja n'ekiidukano ky'omusaayi: Pawulo n'ayingira mw'ali, n'asaba n'amuteekaku emikono n'amuwonya. ⁹ Ekyo bwe kyakoleibwe, abandi boona ababbaire ku kizinga ababbaire n'endwaire ne baiza ne bawonyezebwa: ¹⁰ era abo ne batuwa ekitiibwa kinene; bwe twabbaire tuvaayo ne baleeta ku lyato ebintu bye twetaaga. ¹¹ Emyezi isatu bwe gyabitirewo, ne tuviirayo mu kyombo eky'e Alegezanderiya, ekyabbaire ku kizinga mu biseera eby'omuyaga, akabonero kaakyo Ab'oluganda abalongo. ¹² Ne tubbinga mu Sulakusa ne tumalayo enaku isatu: ¹³ ne tuvaayo ne twetooloola ne tutuuka e Regio: bwe wabitirewo olunaku lumu, empewo egy'omugundu ne gikunta, ku lunaku olw'okubiri ne tutuuka e Putiyooli; ¹⁴ gye twasangire ab'oluganda ne batweta okumala wamu nabo enaku musanvu: awo tutyo ne tutuuka e Roomo ¹⁵ Ab'oluganda bwe baawuliire ebigambo byaisu ne bavaayo okutusisinkana mu Katale ka Apiyo ne mu Bisulo Ebisatu: Pawulo bwe yababoineku ne yeebalya Katonda n'aguma omwoyo. ¹⁶ Bwe twayingiire mu Rooma, Pawulo n'alagirwa okubba yenka wamu ne sirikale eyabbaire amukuuma. ¹⁷ Awo bwe wabitirewo enaku isatu, n'ayeta abakulu b'Abayudaaya: bwe baamalire okukuÅ‹aana n'abakoba nti Nze, abasaiza ab'oluganda, waire nga tinasookere kibbiibi ku bantu waire ku mpisa gya bazeiza baisu, naye nasibiibwe ne mpeebwayo mu mikono gy'Abarooma mu Yerusaalemi: ¹⁸ abo bwe baamalire okunkemererya ne bataka okunsumulula, kubanga tegwabbaire nsonga gye ndi yo kungitisya. ¹⁹ Naye Abayudaaya bwe baagaine, ne mpalirizibwa okujulira Kayisaali, Ti ng'alina ekigambo okuloopa eigwanga lyaisu. ²⁰ Kale olw'ensonga eyo mbetere okumbona n'okutumula nanze: kubanga olw'eisuubi lya Isiraeri nsibiibwe n'olujegere luno. ²¹ Ibo ne bamukoba nti Ife so tetuweebwanga bbaluwa gye bigambo byo okuva mu Buyudaaya, so wabula ku b'oluganda eyabbaire aizire n'atubuulira oba n'atumula ekigambo ekibbiiibi ku iwe. ²² Naye tutaka okuwulira okuva gy'oli eby'olowooza: kubanga ebigambo by'enjikirirya eno, tumaite nti kiwerebwa wonawona. ²³ Ne bamulaga olunaku ne baiza bangi gy'ali mu kisulo; n'abanyonyola ng'ategeeza obwakabaka bwa Katonda, era ng'abaikirizisya ebigambo bya Yesu mu mateeka ga Musa no mu bya banabbi okuva emakeeri okutuusia eigulo. ²⁴ Abamu ne baikirirya bye yatumwire, abandi ne bataikirirya. ²⁵ Bwe batatabagaine bonka na bonka, ne baaba, Pawulo bwe yamalire okutumula ekigambo kimu, nti Omwoyo Omutukuvu yakobere kusa Bazeiza banyu mu nabbi Isaaya ²⁶ ng'akoba nti Yaba eri abantu bano, otumule nti Okuwulira muliwulira, ne mutategeera; Okubona mulibona, ne muteetegeerezia: ²⁷ Kubanga omwoyo gw'abantu bano gusavuwaire, N'amatu gaabwe bawulira kubbiibi, N'amaiso gaabwe bagazibire; Baleke okubona n'amaiso, N'okuwulira n'amatu, N'okutegeera n'omwoyo gwabwe, N'okukyuka, Nze okubawonya. ²⁸ Kale mutegeere nti obulokozi bwa Katonda buno buweerezeibwe ab'amawanga : boona balibuwulira. ²⁹ Bwe yatumwire ebigambo ebyo, Abayudaaya ne baaba nga bawakana inu bonka na bonka. ³⁰ N'amalayo emyaka ibiri miramba ewuwe yenka mu nyumba gye yapangisirye, n'asembezanga bonabona abaizanga gy'ali, ³¹ ng'abuuliranga obwakabaka bwa Katonda, era ng'ayegeresyanga n'obugumu bwonabwona ebigambo bya Mukama Yesu Kristo, n'ataziyizibwanga.