¹ Abasaiza ab'oluganda ne basebo, muwulire ensonga gye mbawozerya atyanu. ² Bwe baawuliire ng'abakobere mu lulimi Olwebbulaniya ne beeyongera okusirika: n'akoba nti ³ Nze ndi muntu Muyudaaya, eyazaaliibwe mu Taluso eky'omu Kirukiya, naye eyalereirwe mu kibuga muno ku bigere bya Gamalyeri, eyayegereseibwe einu mu mpisa gy'amateeka ga bazeiza, ne mbanga n'eiyali lya Katonda nga imwe mwenamwena bwe muli atyanu: ⁴ ne njiganyanga ab'Engira eno n'okubaita, nga mbasibanga era nga mbateekanga mu makomera abasaiza n'abakali; ⁵ era no kabona asinga obukulu niiye mujulirwa wange ow'ebyo n'abakaire bonabona: era boona ne bampa ebbaluwa eri ab'oluganda, ne ntambula okwaba e Damasiko abo ababbaire eyo baleetebwe mu Yerusaalemi nga basibe babonerezebwe. ⁶ Awo olwatuukire bwe nabbaire nga ntambula nga ndikumpi okutuuka e Damasiko, nga mu ituntu, amangu ago omusana mungi ogwava mu igulu ne gwaka ne guneetooloola; ⁷ ne ngwa wansi, ne mpulira eidoboozi nga linkoba nti Sawulo, Sawulo, onjiganyilya ki? ⁸ Nze ne ngiramu nti Niiwe ani, Mukama wange? N'ankoba nti Niinze Yesu Omunazaaleesi gw'oyigganya iwe. ⁹ Ababbaire awamu nanze ne babona omusana, naye ne batawulira idoboozi ly'oyo eyatumwire nanze. ¹⁰ Ne nkoba nti Nakola ntya, Mukama wange? Mukama waisu n'ankoba nti Golokoka, oyabe e Damasiko, wabuulirirwa eyo ebigambo ebyo byonabyona by'olagiibwe okukola. ¹¹ Bwe ntasoboire kubona olw'ekitiibwa ky'omusana gudi, ne nkwatibwa ku mukono abo abaali nanze ne ntuuka mu Damasiko. ¹² Omuntu omumu eriina lye Ananiya atya Katonda mu mateeka, eyasiimiibwe Abayudaaya bonabona abatyama eyo, ¹³ n'aiza gye ndi n'ayemerera we ndi n'ankoba nti Ow'oluganda Sawulo, zibula. Mu kiseera ekyo ne nzibula okumulingirira. ¹⁴ N'ankoba nti Katonda wa bazeiza baisu yakulondere ida otegeere ebyo by'ataka, era obone Omutuukirivu odi, era owulire eidoboozi eriva mu munwa gwe. ¹⁵ Kubanga wabbanga mujulizi we eri abantu bonabona ow'ebigambo by'oboine ne by'owuliire. ¹⁶ Kale atyanu ekikulwisia ki? Golokoka, obatizibwe onabye ebibbiibi byo, nga weegayirira eriina lye. ¹⁷ Awo olwatuukire bwe nairire e Yerusaalemi, bwe nabbaire nga nsaba mu yeekaalu, omwoyo gwange ne guwaanyisibwa ¹⁸ ne mubona ng'ankoba nti Yanguwa ove mangu mu Yerusaalemi; kubanga tebaliikirirya kutegeezia kwo ku nze. ¹⁹ Nzeena ne nkoba nti Mukama wange, ibo beene bamaite nti nze nabateekanga mu makomera era nga nabakubbiranga mu buli ikuŋaaniro abakwikiriirye: ²⁰ era n'omusaayi ogw'omujulizi wo Suteefano bwe gwayiribwe, nanze mwene nabbaire nga nyemereire awo, nga nsiimire, nga nkuuma ebivaalo byabwe abaamwitire. ²¹ N'ankoba nti Yaba: kubanga nze njaba kukutuma wala mu b'amawanga. ²² Ne bamuwulisisya okutuusia ku kigambo kino, ne bayimusa amaloboozi gaabwe nga bakoba nti Atoolebwe mu nsi afaanana atyo: kubanga ti kisa abbe mulamu. ²³ Bwe babbaire nga batumulira waigulu era nga bakasuka engoye gyabwe, era nga bafuumuulira waigulu enfuufu, ²⁴ omwami omukulu n'alagira okumuleeta mu kigo, ng'akoba okumukemererya n'emiigo kaisi ategeere ensonga gye bamulangire okutumulira waigulu ku iye batyo. ²⁵ Bwe babbaire nga bamalire okumusibisya enkoba, Pawulo n'akoba omwami eyabbaire amwemereire okumpi nti Ti kyo muzizo imwe okukubba omuntu Omurooma nga akaali okusalirwa musango? ²⁶ Omwami bwe yawulire n'ayaba eri omwami omukulu n'amukobera ng'akoba nti Oyaba kukola ki? kubanga omuntu ono Murooma. ²⁷ Omwami omukulu n'ayaba gy'ali, n'amukoba nti Nkobera, iwe oli Murooma? N'akoba nti Yee. ²⁸ Omwami omukulu n'airamu nti Nze nafunire Oburooma buno n'ebintu bingi. Pawulo n'akoba nti Naye nze mwe nazaaliirwe. ²⁹ Awo amangu ago kaisi ne bamuleka ababbaire baaba okumukemererya: era n'omwami omukulu n'atya bwe yamalire oku tegeera nga Murooma, era kubanga amusibire. ³⁰ Naye ku lunaku olw'okubiri, bwe yatakire okumanya amazima ensonga Abayudaaya gye bamulangire okumuloopa, n'amusumulula n'alagira bakabona abakulu n'olukiiko lwonalwona okukuÅ‹aana, n'aleeta Pawulo n'amuteeka mu maiso gaabwe.