¹ Awo olwatuukire bwe twamalire okwawukana nabo ne tuvaayo, ne tukwata engira engolokofu okutuuka e Koosi, ku lunaku olw'okubiri ne tutuuka e Rodo, ne tuvaayo ne tutuuka e Patala. ² Bwe twasangire ekyombo nga kiwunguka okwaba e Foyiniiki, ne tusaabala ne twaba. ³ Bwe twalengeire Kupulo, ne tukireka ku mukono omugooda ne twaba e Busuuli, ne tugoba e Tuulo: kubanga eyo ekyombo gye kyatakire okusiikululira ebintu. ⁴ Bwe twaboineyo abayigirizwa ne tumalayo enaku musanvu. Abo ne bakoba Pawulo mu Mwoyo aleke okuniina mu Yerusaalemi. ⁵ Awo bwe twamalireyo enaku egyo ne tuvaayo ne twaba; bonabona ne batuwerekeraku n'abakali n'abaana abatobato okutuuka ewanza w'ekibuga: ne tufukamira ku lubalama lw'enyanza, ne tusaba; ⁶ ne tusiibulagana, ne tusaabala mu kyombo, naye ibo ne bairayo eika. ⁷ Feena bwe twamalire olugendo lwaisu okuva e Tuulo ne tutuuka e Potolemaayi; ne tusugieya ab'oluganda ne tumala nabo olunaku lumu. ⁸ Ku lunaku olw'okubiri ne tuvaayo ne tutuuka e Kayisaliya: ne tuyingira mu nyumba ya Firipo, omubuulizi w'enjiri, omumu ku badi omusanvu, ne tutyama naye. ⁹ Naye oyo yabbaire n'abawala bana abatamaite musaiza abaalagulanga. ¹⁰ Bwe twalwireyo enaku nyingi, e Buyudaaya n'evaayo omuntu nabbi eriina lye Agabo. ¹¹ N'aiza gye tuli n'akwata olukoba lwa Pawulo ne yeesiba amagulu ge n'emikono gye n'akoba nti atyo bw'atula Omwoyo Omutukuvu nti Abayudaaya bwe balisiba batyo mu Yerusaalemi omuntu mwene lukoba luno, balimuwaayo mu mikono gy'ab'amawanga. ¹² Bwe Twawuliire ebyo, ife era n'abantu ab'omu kifo kidi ne tumwegayirira aleke okuniina mu Yerusaalemi. ¹³ Awo Pawulo Kaisi nairamu nti Mukola ki okukunga n'okumenya omwoyo gwange? Kubanga nze tinetegekere kusibibwa busibibwi era naye n'okufiira mu Yerusaalemi olw'erinnya lya Mukama waisu Yesu. ¹⁴ Bwe yalemere okuwulira ne tulekayo nga tukoba nti Mukama waisu ky’ataka kikolebwe. ¹⁵ Awo oluvanyuma lw'enaku egyo ne tusitula emigugu ne tuniina e Yerusaalemi. ¹⁶ Era n'abayigirizwa abaviire e Kayisaliya ne baaba naife, ne baleeta omuntu Munasoni ow'e Kupulo omuyigirizwa ow'eira, ayaba okutusuzia. ¹⁷ Bwe twatuukiire mu Yerusaalemi ab'oluganda ne batusembezia n'eisanyu. ¹⁸ Ku lunaku olw'okubiri Pawulo n'ayingira wamu naife omwa Yakobo; era n'abakaire bonabona baaliwo. ¹⁹ Bwe yamalire okubalamusa n'ababuulira kimu Ku kimu Katonda bye yakolanga mu mawanga mu kuweereza kwe. ²⁰ Boona bwe baawuliire ne bagulumiza Katonda; ne bamukoba nti Obona, ow'oluganda, enkumi bwe giri mu Bayudaaya abantu abaikirirya; bonabona babbaire neiyali olw'amateeka: ²¹ abo babuuliirwe ebigambo byo nti iwe oyegeresya Abayudaaya bonabona abali mu mawanga okuleka Musa, ng'okoba baleke okukomolanga abaana abatobato waire okutambuliranga mu mpisa. ²² Kale kiki kino? Tebaaleke kuwulira ng'oizire. ²³ Kale kola nga bwe tukukoba: tulina Abasaiza bana abeerayirira ekirayiro; ²⁴ obatwale abo otukuzibwe wamu nabo, obawe efeeza beemwe emitwe: bonabona bategeera ng'ebigambo bye babuuliirwe ku iwe bibulamu; naye nga weena mwene weegendereza ng'okwata amateeka. ²⁵ Naye ab'amawanga abaikirirya twawandiike ne tusala omusango nti beekuumenga mu bintu ebiweebwa eri ebifaananyi n'omusaayi n'ebitugiibwe n'obwenzi. ²⁶ Awo Pawulo kaisi n'atwala abantu, ku lunaku olw'okubiri n'atukuzibwa wamu nabo n'ayingira mu yeekaalu okulaga enaku ez'okutukuza bwe gituukire, okutuusia ekiweebwayo lwe kyaweebwayo olwa buli mumu ku ibo. ²⁷ Awo enaku omusanvu bwe gyabbaire giri kumpi okutuuka, Abayudaaya abaaviire mu Asiya ne bamubona mu yeekaalu ne basasamalya ekibiina kyonakyona ne bamukwata, ²⁸ nga batumulira waigulu nti Abasaiza Abaisiraeri, mutuyambe: ono niiye muntu odi ayegeresya bonabona buli kifo Obubbiibi ku bantu no ku mateeka ne ku kifo kino: era ate aleetere Abayonaani mu yeekaalu, ayonoonere ekifo ekitukuvu. ²⁹ Kubanga babbaire bamalire okubona Tulofiimo Omuwefeso ng'ali naye mu kibuga: ne bateerera nti Pawulo amuleetere mu yeekaalu. ³⁰ Ekibuga kyonakyona ne kyegugumula, abantu ne bakuÅ‹aana mbiro; ne bakwata Pawulo ne bamuwalula okumufulumya ewanza we yeekaalu: amangu ago enjigi ne giigalwawo. ³¹ Bwe babbaire basala amagezi okumwita, ebigambo ne bituuka ku mwami omukulu w'ekitongole ekya basirikale nti Yerusaalemi kyonakyona kyefuukwire. ³² Amangu ago n'atwala basirikale n'abaami n'aserengetere gye baali mbiro: boona bwe baboine omwami omukulu n'abasirikale ne baleka okukubba Pawulo. ³³ Awo omwami omukulu kaisi n'asembera n'amukwata n'alagira okumusibisya enjegere ibiri; n'abuulya nti niiye ani, ne ky'akolere kiki? ³⁴ Abamu ab'omu kibiina ne batumurira waigulu bundi abandi bundi: bw'atasoboire kutegeera mazima olw'okuleekaana, n'alagira okumutwala mu kigo. ³⁵ Bwe yatuukire ku madaala, kaisi n'asitulibwa basirikale olw'amaani g'ekibiina: ³⁶ kubanga ekibiina ky'abantu babbaire basengererya nga batumurira waigulu nti Mwite. ³⁷ Pawulo bwe yabbaire ng'ali kumpi okuyingizibwa mu kigo n'akoba omwami omukulu nti Kisa mbeeku kye nkukobera? N'akoba nti Omaite Oluyonaani? ³⁸ Kale ti niiwe Mumisiri odi mu naku egyabitire eyajeemeserye abantu enkumi eina ku Batemu badi, n'abatwala mu idungu? ³⁹ Naye Pawulo n’akoba nti Nze ndi muntu Muyudaaya, ow’e Taluso eky’omu Kirukiya, ti wo mu kibuga ekitali kimanyifu: era nkwegayirire, ndeka ntumule n'abantu. ⁴⁰ Bwe yamwikiriirye, Pawulo n'ayemera ku madaala n'awenya n'omukono abantu: bwe baamalire okusiriikirira dala, n'atumula mu lulimi Olwebbulaniya ng'akoba nti