¹ Akacwanu bwe kamalire okwikaikana, Pawulo n'abita abayigirizwa n'ababuulirira n'abasiibula, n'avaayo okwaba e Makedoni. ² Bwe yabitire mu njuyi gidi n'abategeeza ebigambo bingi, n'atuuka e Buyonaani. ³ Bwe yamalire emyezi eisatu, era Abayudaaya bwe baamusaliire olukwe, bwe yabbaire ng'ayaba okubita mu nyanza okwirayo mu Makedoni. ⁴ Ne baaba naye okutuuka mu Asiya Sopateri Omuberoya mutaane wa Puulo; n'Abasesaloniika Alisutaluuko no Sekundo; no Gayo Omuderube no Timoseewo; n'AbasiyaTukiko no Tulofiimo. ⁵ Bano ne batangira ne batulindirira mu Tulowa. ⁶ Ife ne tuva mu Firipi ne tuwanika amatanga oluvanyuma lw'enaku egy'emigaati egitazimbulukuswa, ne tubatuukaku mu Tulowa mu naku itaanu; gye twamalire enaku omusanvu. ⁷ Awo ku lunaku olw'oluberyeberye mu sabbiiti, bwe twakuŋaanire okumenya emigaati, Pawulo n'aloogya nabo, ng'ataka okusitula amakeeri, n'alwawo mu kutumula okutuusia eitumbi. ⁸ Ne wabbaawo etabaaza nyingi mu kisenge ekya waigulu, mwe twakuŋaaniire. ⁹ Omulenzi eriina lye Yutuko n'atyama mu dirisa, n'akwatibwa endoolo nyingi; awo Pawulo bwe yalwirewo ng'akaali aloogya, ng'akwatiibwe endoolo nyingi n'ava mu nyumba ey'okusatu, n'agwa, n'alondebwa ng'afiire. ¹⁰ Pawulo n'aika n'amugwaku n'amuwambaatira n'akoba nti Temukubba ebiwoobe; obulamu bwe bulimu mukati. ¹¹ N'aniina n'amenya omugaati n'alyaku n'alwawo ng'akaali aloogya okutuusia amakeeri, kaisi n'avaayo. ¹² Ne baleeta omulenzi nga mulamu, ne basanyuka ti katono. ¹³ Naye ife ne tutangira okutuuka ku kyombo ne twaba okutuuka Aso, nga tutaka eyo okusiika Pawulo: kubanga yabbaire alagiire atyo, ng'ataka iye mwene okubita ku itale. ¹⁴ Bwe yatusangire mu Aso ne tumusika, ne twiza e Mituleene. ¹⁵ Ne tuwanika amatanga okuvaayo ku lunaku olw'okubiri ne tutuuka mu maiso ga Kiyo; ku Iw'okusatu ne tugoba ku Samo; ku lw'okuna ne tutuuka mu Mireeto. ¹⁶ Kubanga Pawulo yasiima okubitira mu Efeso mu kyombo, aleke okulwa mu Asiya; kubanga yabbaire ayanguwa, oba nga kiyinzika okubba mu Yerusaalemi ku lunaku lwa Pentekoote. ¹⁷ Bwe yabbaire mu Mireeto n'atuma, mu Efeso n'ayeta abakaire b'ekanisa. ¹⁸ Bwe baatuukire gy'ali n'abakoba nti Imwe mumaite okuva ku lunaku olw'oluberyeberye bwe naninire mu Asiya, bwe n'abbanga naimwe mu biseera byonabyona, ¹⁹ nga mpeerezia Mukama waisu n'obuwombeefu bwonabwona n'amaliga n'okukemebwa kwe naboine mu nkwe gy'Abayudaaya: ²⁰ bwe seekangire kubabuulira kigambo kyonakyona ekisaana, n'okubeegeresyanga mu maiso g'abantu ne mu buli nyumba, ²¹ nga ntegeeza Abayudaaya era n'Abayonaani okwenenya eri Katoada n'okwikirirya Mukama waisu Yesu Kristo. ²² Atyanu, bona, bwe nsibiibwe mu mwoyo, njaba Yerusaalemi nga timaite bye ndibona eyo, ²³ wabula nga Omwoyo Omutukuvu antegeeza mu buli kibuga; ng'ankoba nti okusibibwa n'okubonyaabonyezebwa binindiriire. ²⁴ Naye obulamu bwange timbulowooza nga kintu, nga bwo muwendo gye ndi, kaisi ntuukirirye olugendo lwange n'okuweereza kwe naweweibwe Mukama waisu Yesu, okutegeezanga enjiri ey'ekisa kya Katonda. ²⁵ Atyanu, bona, nze maite nga temukaali mumbona maiso gange imwe mwenamwena be nabitangamu nga mbuulira obwakabaka. ²⁶ Kyenva mbategeezia atyanu nti nze ndi mulongoofu olw'omusaayi gwa bonabona, ²⁷ kubanga tinegisanga kubabuulira kuteesia kwa Katonda kwonakwona. ²⁸ Mwekuumenga imwe mwenka n'ekisibo kyonakyona Omwoyo Omutukuvu mwe yabateekere imwe okubba abalabirizi, okuliisyanga ekanisa ya Katonda gye yeeguliire n'omusaayi gwe meene. ²⁹ Nze maite nga bwe ndimala okuvaawo emisege emikambwe giriyingira mu imwe, tegirisaasira kisibo; ³⁰ era mu imwe mwenka muliva abantu ngabatumula ebigambo ebikyamire, okuwalula abayigirizwa enyuma waabwe. ³¹ Kale mumoge, mwijukire nga tinalekanga kulabula n'amaliga buli muntu mu myaka eisatu emisana n'obwire. ³² Era ne atyanu mbasigira Katonda n'ekigambo eky'ekisa kye ekiyinza okuzimba n'okugaba obusika mu abo bonabona abatukuzibwa. ³³ Tinegombanga feeza yo muntu yenayena waire zaabu waire ekivaalo. ³⁴ Imwe mumaite ng'emikono gino niigyo gyakolanga bye neetaaga n'abo abali nanze. ³⁵ Mbalagire mu byonabyona bwe kibagwanira okukolanga emirimu mutyo okuyambanga ababula maani, n'okwijukiranga ebigambo bya Mukama waisu Yesu bwe yakobere iye mwene nti Okugaba kwo mukisa okusinga okufuna. ³⁶ Bwe yatumwire atyo n'afukamira n'asabira wamu nabo bonabona. ³⁷ Ne bakakunga inu bonabona, ne bamugwa mu ikoti Pawulo ne bamunywegera, ³⁸ nga banakuwala okusinga byonabyona olw'ekigambo kye yatumwire nti tebakaali bairayo kumubona. Ne bamuwerekeraku okutuuka ku kyombo.