¹ Era n'atuuka e Derube ne Lusitula: bona, yabbaireyo omuyigirizwa eriina lye Timoseewo, omwana w'omukali Omuyudaaya eyaikirirye: naye Itaaye Muyonaani; ² eyasiimiibwe ab'oluganda abbbaire mu Lusitula ne Ikonio. ³ Oyo Pawulo n'ataka okwaba naye; n'amutwala n'amukomola olw'Abayudaaya abbbaire mu bifo ebyo: kubanga bonabona baamumanyire nga Itaaye yabbaire Muyonaani. ⁴ Bwe babbaire nga babita mu bibuga ne babawa okukwatanga ebyalagiirwe abatume n'abakaire abbbaire mu Yerusaalemi. ⁵ Awo ekanisa ne gigumira mu kwikirirya, ne gyeyongeranga ku muwendo buli lunaku. ⁶ Ne babita mu nsi y'e Fulugiya ne Galatiya, kubanga baagaaniibwe Omwoyo Omutukuvu okutumula ekigambo mu Asiya; ⁷ bwe baatuukiire okumpi ne Musiya, ne bagezyaku okugenda mu Bisuniya, n'Omwoyo gwa Yesu n'atabaikirirya; ⁸ ne beekooloobya Musiya, ne batuuka e Tulowa. ⁹ Pawulo n'abona okwolesewa obwire, omuntu Omumakedoni ng'ayemereire era ng'amwegayirira ng'akoba nti Wunguka okutuuka e Makedoni otuyambe. ¹⁰ Bwe yamalire okubona okwolesewa, amangu ago ne tusala amagezi okusitula okwaba e Makedoni, nga tutegeera nti Katonda atwetere okubabuulira enjiri. ¹¹ Kyetwaviire tusaabala okuva e Tulowa ne tukwata engira engolokofu okutuuka e Samoserakiya, ku lunaku olw'okubiri ne tutuuka e Neyapoli; ¹² ne tuvaayo okutuuka e Firipi, kye kibuga eky'e Makedoni ekisookerwaku mu njuyi egyo, ekyazimbiibwe Abaruumi: ne tubba mu kibuga omwo ne tulwamu enaku. ¹³ Awo ku lunaku lwa sabbiiti ne tufuluma mu mulyango gw'ekibuga okwaba ku mwiga bwe twalowoozerye nga yabbaireyo ekifo eky'okusabirangamu: ne tutyama ne tutumula n'abakali ¹⁴ Awo omukali eriina lye Ludiya, omutungi w'engoye egye'fulungu, wo mu kibuga Suwatira, eyasinzanga Katonda, n’atuwulira: Mukama waisu n'amubikula omwoyo gwe okuwulira Pawulo bye tumula. ¹⁵ Bwe yabatiziibwe iye n'enyumba ye, n'atwegayirira ng'akoba nti Oba nga munsiimire okubba omwesigwa eri Mukama waisu, muyingire mu nyumba yange mubbe omwo. N'atuwalirizia. ¹⁶ Awo olwatuukire bwe twabbaire twaba wadi awaasabirwanga, omuwala eyabbaireku dayimooni alagula n'atukyanga, eyafuniranga bakama be ebintu ebingi olw'okulagula. ¹⁷ Oyo bwe yabasengereirye Pawulo naife n'atumulira waigulu ng'akoba nti Abantu bano baidu ba Katonda Ali waigulu einu, abababuulira engira ey'obulokozi. ¹⁸ N'akolanga atyo enaku nyingi. Naye Pawulo, bwe yanakuwaire einu, n'akyuka n'akoba dayimooni nti Nkulagira mu liina lya Yesu Kristo omuveeku. N'amuvaaku mu kiseera ekyo. ¹⁹ Naye bakama be bwe baboine ng'eisuubi ly'ebintu byabwe liweirewo, ne bakwata Pawulo ne Siira ne babawalula okubatwala mu katale eri abakulu, ²⁰ ne babatwala eri abalamuzi ne bakoba nti Abantu bano basasamaza inu ekibuga kyaisu, kubanga Bayudaaya ²¹ era begeresya empisa egy'omuzizo ife okugikwatanga waire okugikolanga kubanga tuli Barooma. ²² Ekibiina ne kibagolokokeraku wamu: abalamuzi ne babakanulira engoye gyabwe, ne balagira okubakubba emiggo. ²³ Bwe baabakubbire emiggo emingi ne babasindikira mu ikomera, ne balagira omukuumi okubakuuma einu: ²⁴ oyo bwe yalagiirwe atyo n'abasindiikirirya mu ikomera ery'omukati, n'akomerera ebigere byabwe mu nvuba. ²⁵ Naye obwire mu itumbi Pawulo no Siira ne basaba ne bayembera Katonda, abasibe ne babawulira; ²⁶ amangu ago ne wabbaawo ekikankano kinene n'emisingi gy'eikomera ne gikankana: amangu ago enjigi gyonagyona ne giguka; n'ebyabbaire bibasibire bonabona ne bisumulukuka. ²⁷ Omukuumi w'eikomera n'azuuka, bwe yaboine enjigi gy'eikomera nga giigukire n'asowola ekitala kye n'ayaba okweita, kubanga ng'alowooza nti abasibe babombere. ²⁸ Naye Pawulo n'atumulira waigulu n'eidoboozi inene ng'akoba nti Teweekola kabbiibi: kubanga fenafena tuli wano. ²⁹ N'asaba etabaaza n'airuka n'ayingira, n'afukamirira Pawulo ne Siira, ng'akankana, ³⁰ N'abafulumya ewanza n'akoba nti Basebo, kiÅ‹waniire kukola ntya okulokolebwa? ³¹ Ne bakoba nti Ikirirya Mukama waisu Yesu, walokoka iwe n'enyumba yo. ³² Ne bamubuulira ekigambo kya Mukama waisu ne bonabona ababbaire mu nyumba ye. ³³ N'abatwala mu kiseera ekyo obwire n'abanaabya emiigo; n'abatizibwa iye n'enyumba ye yonayona amangu ago. ³⁴ N'abaniinisia mu nyumba ye, n'abaleetera emeeza, n'asanyuka inu n'enyumba ye yonayona ng'aikirirye Katonda. ³⁵ Naye bwe bwakyeire amakeeri, abalamuzi ne batuma basirikale baabwe nga bakoba nti Musumulule abantu abo. ³⁶ Omukuumi w'eikomera n'abuulira Pawulo ebigambo ebyo nti Abalamuzi batumire okubasumulula: kale Atyanu mufulume, mwabe n'emirembe. ³⁷ Naye Pawulo n'abakoba nti Batukubbire mu maiso ga bantu nga tukaali kusalirwa musango, nga tuli Bantu Barooma ne batusindiikirirya mu ikomera; ne batutoolamu kyama? Bbe; naye baize beene batufulumye. ³⁸ Basirikale ne bakobera abalamuzi ebigambo bino: ne batya bwe baawuliire nga Baroomo: ³⁹ ne baiza ne babeegayirira, ne babafulumya, ne bataka bave mu kibuga. ⁴⁰ Ne bafuluma mu ikomera, ne bayingira mu nyumba ya Ludiya, ne babona ab'oluganda ne babasanyusia ne bavaayo.