¹ Awo abantu ne bava e Buyudaaya ne begeresya ab'oluganda nti Bwe mutaakomolebwenga ng'empisa ya Musa bw'eri, temuyinza kulokoka. ² Bwe wabbaire empaka enyingi n'okwawukana kw'endowooza wakati wa Pawulo no Balunabba, ku luuyi olumu, boona abaaviire e Buyudaaya, ne balagira Pawulo no Balunabba n'abandi ku ibo okwaba e Yerusaalemi eri abatume n'abakaire ³ Awo abo bwe baamalire okusibirirwa ab'ekanisa ne babita mu Foyiniiki ne Samaliya, nga banyonyolera dala okukyuka kw'ab'amawanga: ne basanyukirya dala ab'oluganda bonabona. ⁴ Bwe baatuuka e Yerusaalemi, ab'ekanisa n'abatume n'abakaire ne babasembelya, ne babuulira byonabyona Katonda bye yakoleranga awamu nabo. ⁵ Naye ne bagolokoka abamu ab'omu kitundu ky'Abafalisaayo abaikirirya, nga bakoba nti Kigwana okubakomolanga n'okubalagira okukwatanga amateeka ga Musa. ⁶ Abatume n'abakaire ne bakuŋaana okwetegerezia ekigambo ekyo. ⁷ Bwe wabbaire okwawukana kw'endowooza kungi, Peetero n'ayemerera n'abakoba nti Abasaiza ab'oluganda, imwe mumaite nti okuva mu naku egy'eira Katonda yalondere mu imwe ab'amawanga bawulire mu munwa gwange ekigambo eky'enjiri ne baikirirya. ⁸ No Katonda amaite emyoyo n'abategeeza bwe yabawa Omwoyo Omutukuvu era nga ife; ⁹ n'atayawula ife nabo, bwe yalongooserye emyoyo gyabwe olw'okwikirirya. ¹⁰ Kale Atyanu mukemera ki Katonda, okuteeka ekikoligo mu ikoti lyabayigirizwa bazeiza baisi kye batasoboire kutwala waire ife? ¹¹ Naye twikirirya okulokolebwa lwe kisa kya Mukama waisu Yesu, era boona batyo. ¹² Ekibiina kyonakyona ne kisirika; ne bawulira Balunabba no Pawulo nga banyonyola obubonero n'eby'amagero byonabyona Katonda bye yabakolanga mu mawanga. ¹³ Abo bwe baamalire okusirika Yakobo n'airamu ng'akoba nti Abasaiza ab'oluganda, mumpulire. ¹⁴ Simyoni anyonyoire Katonda bwe yasookere okulingirira amawanga okutooleramu eriina lye abantu. ¹⁵ Ebigambo bya banabbi bitabagana n'ebyo nga bwe kyawandiikiibwe nti ¹⁶ Oluvannyuma lw'ebyo ndikyuka, Ndizimba ate eweema ya Dawudi eyagwire; Okumenyeka kwayo ndikuzimba ate, Era ndigigolokosia: ¹⁷ Abantu abasigalawo basagire Mukama, N'amawanga gonagona abeetebwa eriina lyange ku ibo, ¹⁸ Bw'atumula Mukama, ategeeza ebyo byonabyona okuva ku luberyeberye lw'ensi. ¹⁹ Kyenva nsalawo tuleke okudagisya abava mu mawanga okukyukira Katonda; ²⁰ naye tubawandiikire beewalenga obugwagwa bw'ebifaananyi, n'obwenzi, n'ebitugiibwe, n'omusaayi. ²¹ Kubanga okuva eira Musa alina mu buli kibuga abamubuulira, ng'asomebwa mu makuŋaaniro buli sabbiiti. ²² Awo ne bakisiima abatume n'abakaire wamu n'ekanisa yonayona okulonda abantu mu ibo n'okubatuma Antiyokiya n Pawulo n Balunabba; Yuda ayetebwa Balusaba n Siira, abantu abakulu mu b'oluganda: ²³ ne bawandiika ne bagikwasya mu mikono gyabwe nti Abatume n'ab'oluganda abakaire tusugiirye ab'oluganda abali mu Antiyokiya no Busuuli ne Kirukiya abali mu mawanga: ²⁴ kubanga tuwuliire nti abantu abaava ewaisu baabasasamalya n'ebigambo nga bakyusia emeeme gyanyu, be tutalagiranga; ²⁵ tusiimire, bwe tutabagaine n'omwoyo gumu, okulonda abantu okubatuma gye muli wamu n'abatakibwa baisu Balunabba no Pawulo, ²⁶ abantu abaasingirewo obulamu bwabwe olw'eriina lya Mukama waisu Yesu Kristo. ²⁷ Kyetuviire tutuma Yuda no Siira era abalibabuulira obumu beene n'omunwa. ²⁸ Kubanga Omwoyo Omutukuvu yasiimire feena tuleme okubatika omugugu omunene gwonagwona wabula bino ebigwana, ²⁹ okwewalanga ebiweebwa eri ebifaananyi, n'omusaayi, n'ebitugiibwe, n'obwenzi: bwe mwekuumanga ebyo, mwabbanga kusa. Mweraba. ³⁰ Awo ibo bwe basindikiibwe ne baiza Antiyokiya, ne bakuŋaanya ekibiina ne babakwatisya ebbaluwa. ³¹ Bwe baasomere ne basanyuka olw'okubuulirirwa okwo. ³² Yuda no Siira, kubanga boona babbaire banabbi, ne babuulirira ab'oluganda mu bigambo bingi, ne babagumya. ³³ Bwe baamalireyo ebiseera, ne basiibulwa ab'oluganda n'emirembe okwirayo eri abaabatumire. ³⁴ Naye Siira yasiimire okusigalayo. ³⁵ Naye Pawulo no Balunabba ne balwayo mu Antiyokiya nga begeresyanga era nga babuuliranga ekigambo kya Mukama waisu wamu n'abandi bangi era. ³⁶ Enaku bwe gyabitirewo Pawulo n'akoba Balunabba nti Kale twireyo tulambule ab'oluganda mu buli kibuga gye twababuuliire ekigambo kya Mukama waisu, tubone nga bwe bali. ³⁷ Balunabba era n’ataka okutwala Yokaana eriina lye ery'okubiri Mako: ³⁸ naye Pawulo teyasiimire kumutwala oyo yabalekere mu Panfuliya n'atayaba nabo ku mulimu. ³⁹ Ne wabbaawo empaka nyingi n'okwawukana ne baawukana, Balunabba n'atwala Mako n'awanika amatanga okwaba e Kupulo; ⁴⁰ naye Pawulo n'alonda Siira, n'avaayo, ab'oluganda bwe baamusigiire ekisa kya Mukama waisu. ⁴¹ N'abita mu Busuuli ne Kirukiya ng'agumya ekanisa.