¹ Mu biseera ebyo kabaka Kerode n'agolola emikono okukola obubbiibi abamu ab'omu kanisa. ² N'aita n'ekitala Yakobo mugande wa Yokaana. ³ Awo bwe yaboine nga Abayudaaya bakisiimire, ne yeeyongera okukwata no Peetero. Niigyo enaku egy'emigaati egitazimbulukuswa. ⁴ Bwe yamalire okumukwata, n'amuteeka mu ikomera, n'amuwaayo eri basirikale ikumi na mukaaga okumukuuma kinabana, ng'ataka okumutwala mu maiso g'abantu Okubitaku nga kuweire. ⁵ Awo Peetero n'akuumirwa mu ikomera: naye ab'ekanisa ne banyiikiranga okumusabira eri Katonda. ⁶ Ku lunaku Kerode lwe yabbaire ataka okumutwalayo, mu bwire ekyo Peetero yabbaire nga agonere wakati w'abasirikale babiri, ng'asibiibwe n'enjegere ibiri, abakuumi babbaire ku lwigi nga bakuuma eikomera. ⁷ Bona, malayika wa Mukama n'ayemerera w'ali, okutangaala ne kwizula ekisenge, n'akubba Peetero mu mpete n'amuzuukya ng'akoba nti Yimuka mangu. Enjegere ne giva ku mikono ne gigwa. ⁸ Malayika n'amukoba nti Weesibe, ovaale engaito gyo. N'akola atyo. N'amukoba nti Vaala ekivaalo kyo, onsengererye. ⁹ N'afuluma, n'amusengererya; so teyamanyire nga bya mazima malayika by'akolere, naye yalowooza nti aboine kwolesewa. ¹⁰ Bwe babitire ku bakuumi abaasookerwaku n'ab'okubiri ne batuuka ku lwigi olw'ekyoma olubitibwaku okutuuka mu kibuga: ne lubaigukirawo lwonka: ne bafuluma ne babita mu ngira imu; amangu ago malayika n'amuleka. ¹¹ Peetero bwe yayiriremu n'akoba nti atyanu ntegeire mazima nga Mukama waisu atumire malayika n'antoola mu mukono gwa Kerode no mu kusuubira kwonakwona okw'eigwanga ly'Abayudaaya. ¹² Bwe yalowoozere n'aiza mu nyumba ya Malyamu eyabbaire maye wa Yokaana eriina lye ery'okubiri Mako, mwe babbaire bakuÅ‹aanire abangi nga basaba. ¹³ Peetero bwe yakonkonere ku lwigi olw'omu mulyango omuzaana n'aiza okuvugira, eriina lye Looda. ¹⁴ Bwe yategeire eidoboozi lya Peetero n'ataigulawo lwigi olw'eisanyu, naye n'ayingira mbiro n'akoba nti Peetero ayemereire ewanza ku lwigi. ¹⁵ Ne bamukoba nti Olalukire. Naye n'aikalirirya nti Niiwo awo. Ne bakoba nti Niiye malayika we. ¹⁶ Naye Peetero ne yeeyongera okukonkona: awo bwe baigwirewo ne bamubona ne basamaalirira. ¹⁷ Naye bwe yabawenyere n'omukono okusirika, n'abakobera Mukama waisu bw'amutoire mu ikomera. N'akoba nti Mukobere ebyo Yakobo n'ab'oluganda. N'avaayo n'ayaba mu kifo awandi. ¹⁸ Awo bwe bwakyeire amakeeri, abasirikale ne beegugumula inu nti Peetero abbbaire ki? ¹⁹ Kerode bwe yamusaagire n'atamubona n'abuulirirya abakuumi n'alagira okubaita. N'ava mu Buyudaaya okwaba e Kayisaliya n'atyama eyo. ²⁰ N'asunguwalira inu ab'e Ttuulo n'ab'e Sidoni: ne baiza gy'ali n'omwoyo gumu; bwe baakwanagaine no Bulasito omukulu w'omu nyumba ya kabaka, ne basaba okubawa emirembe, kubanga ensi yaabwe eriisibwa byo mu nsi ya kabaka. ²¹ Awo ku lunaku olwalagaanyiziibwe Kerode n'avaala ebivaalo eby'obwakabaka, n'atyama ku ntebe, n'abakoba ebigambo. ²² Abantu bonabona ne batumulira waigulu nti Eryo idoboozi lya katonda, ti lyo muntu. ²³ Amangu ago malayika wa Mukama n'amukubba, kubanga tawaire Katonda ekitiibwa: n'aliibwa amagino, n'afa. ²⁴ Naye ekigambo kya Katonda ne kikula ne kyeyongeranga. ²⁵ Balunabba ne Sawulo ne bairayo okuva e Yerusaalemi, bwe bamalire okutuukirirya okuweereza kwabwe, ne baleeta Yokaana eriina lye ery'okubiri Mako.