¹ Abatume n'ab'oluganda ababbaire mu Buyudaaya ne bawulira ng'abamawanga boona baikirirye ekigambo kya Katonda. ² Awo Peetero bwe yayambukire e Yerusaalemi, badi abakomole ne bawakana naye ³ nga bakoba nti Wayabire mu bantu abatali bakomole n'olya nabo. ⁴ Naye Peetero n'atandika n'abanyonyola kimu Ku kimu ng'akoba nti ⁵ Nze nabbaire mu kibuga Yopa nga nsaba; omwoyo gwange ne guwaanyisibwa, ne mbona mu kwolesebwa ekintu nga kiika ng'eisuuka einene, nga kikwatiibwe ku birenge ebina okwisibwa nga kiva mu igulu, ne kingizira: ⁶ bwe neekalirizirye amaiso ne ndowooza ne mbona ebisolo by'oku nsi ebirina amagulu ana n'ebisolo eby'omu nsiko, n'eby'ekuusa n'enyonyi egy'omu ibbanga. ⁷ Era ne mpulira eidoboozi nga linkoba nti Peetero, yemerera osale olye ⁸ Naye nenkoba nti Bbe, Mukama wange; kubanga ekintu eky'omuzizo waire ekibbiibi tekiyingiranga mu munwa gwange n'akatono. ⁹ Naye eidoboozi ne lingiramu omulundi ogw'okubiri nga liva mu igulu nti Katonda bye yalongooserye tobifuulanga iwe eby'omuzizo. ¹⁰ Ne kibba kityo emirundi isatu; byonabyona ne biniisibwa ate mu igulu. ¹¹ Kale, bona, amangu ago abantu basatu babbaire nga bayemereire mu maiso g'enyumba mwe twabbaire, abaatumiibwe gye ndi okuva e Kayisaliya. ¹² Omwoyo n'ankoba okwaba nabo, obutayawula. Bano ab'oluganda omukaaga ne baaba nanze, ne tuyingira mu nyumba y'odi; ¹³ n'atukobera bwe yaboine malayika mu nyumba ye ng'ayemereire ng'ankoba nti Tuma e Yopa oyete Simooni eriina lye ery'okubiri Peetero; ¹⁴ alikubuulira ebigambo ebirikulokola iwe n'enyumba yo yonayona. ¹⁵ Bwe nabbaire nga nakatandiika okutumula, Omwoyo Omutukuvu n'abagwaku era nga bwe yasookeire ku ife. ¹⁶ Ne ngijukira ekigambo kya Mukama waisu bwe yatumwire nti Yokaana yabatizire na maizi, naye imwe mulibatizibwa no Mwoyo Mutukuvu. ¹⁷ Kale Katonda oba nga abawaire ekirabo ekyo nga ife okwekankana, bwe twaikirirye Mukama waisu Yesu Kristo, nze nabbaire yani eyandisoboire okuziyizia Katonda? ¹⁸ Bwe bawuliire ebyo ne basirika, ne bagulumizia Katonda nga bakoba nti Kale Katonda; awaire n'ab'amawanga okwenenya okutuuka ku bulamu. ¹⁹ Boona abaasaansanire mu kuyiganyizibwa okwabbairewo ku Suteefano ne batambula okutuuka e Foyiniiki ne Kupulo ne Antiyokiya, ne batabuulira kigambo muntu gondi wabula Abayudaaya bonka. ²⁰ Naye waaliwo abantu mu ibo ab'e Kupulo n'ab'e Kuleene, abo bwe baatuukire mu Antiyokiya ibo ne batumula n'Abayonaani, nga babuulira Mukama waisu Yesu. ²¹ N'omukono gwa Mukama waisu gwabbaire nabo: ekibiina kinene eky'abaikirirya ne bakyukira Mukama waisu. ²² Ekigambo ekyo ne kiwulirwa okutuuka mu matu g'ekanisa eyabbaire mu Yerusaalemi; ne batuma Balunabba okutuuka mu Antiyokiya: ²³ naye bwe yamalire okutuuka n'abona ekisa kya Katonda n'asanyuka, n'ababuulirira bonabona nti Mumalirire mu mwoyo okwekwata ku Mukama waisu:1 ²⁴ kubanga yabbaire muntu musa, n'aizula Omwoyo Omutukuvu n'okwikirirya. Ekibiina kinene ne kireetebwa eri Mukama waisu. ²⁵ N'avaayo okwaba e Taluso okusagira Sawulo: ²⁶ bwe yamalire okumubona n'amuleeta mu Antiyokiya. Awo olwatuukire ne bamala omwaka mulamba nga bakuÅ‹aana n'ekanisa ne bayegeresya ekibiina kinene: abayigirizwa ne basooka okwetebwa Abakristaayo mu Antiyokiya. ²⁷ Mu nnaku egyo banabbi ne bava e Yerusaalemi okutuuka Antiyoklya. ²⁸ N'ayemerera omumu ku ibo, eriina lye Agabo, n'abuulira ku bw'Omwoyo nti Walibba enjala nyingi mu nsi gyonagyona: yoona yabbbairewo ku mirembe gya Kulawudiyo. ²⁹ Abayigirizwa, buli muntu nga bwe yabbaire n'ebintu, ne bateesia okuweereza ab'oluganda ababbaire batyama e Buyudaaya: ³⁰ n'okukola ne bakola batyo ne baweereza abakaire mu mukono gwa Balunabba no Sawulo.