¹ Kale, kubanga tulina okuweereza okwo, nga bwe twasaasiirwe, tetwiriirira: ² naye twagaine eby'ensoni ebikisibwa, nga tetutambulira mu bukuusa, so tetukyamya kigambo kya Katonda; naye olw'okubonesya amazima nga twetendereza eri omwoyo gwa buli muntu mu maiso ga Katonda. ³ Naye okubikibwaku oba ng'enjiri yaisu ebikibwaku, ebikibwaku mu abo abagota: ⁴ katonda ow'emirembe gino be yazibibire amaiso g'amagezi gaabwe abataikirirya, omusana gw'enjiri ey'ekitiibwa eya Kristo, oyo niikyo ekifaananyi kya Katonda, gulekenga okubaakira. ⁵ Kubanga tetwebuuliire fenka, wabula Kristo Yesu nga niiye Mukama waisu, feena nga tuli baidu banyu ku lwa Yesu. ⁶ Kubanga Katonda niiye yatumwire nti Omusana gulyaka mu ndikirirya, eyayakire mu myoyo gyaisu, okuleeta omusana ogw'okutegeera ekitiibwa kya Katonda mu maiso ga Yesu Kristo. ⁷ Naye obugaiga obwo tuli nabwo mu bibya eby'eibbumba, amaani amangi einu kaisi gavenga eri Katonda, so ti eri ife; ⁸ tutaayizibwa eruuyi n'eruuyi, naye tetunyigirizibwa; tweraliikirira, so ti kweraliikiririra dala: ⁹ tuyigayizibwa, naye tetulekebwa; tukubbibwa, naye tetuzikirira; ¹⁰ bulijjo nga tutambula nga tulina mu mubiri okwitibwa kwa Yesu, era obulamu bwa Yesu kaisi bubonesebwenga mu mubiri gwaisu. ¹¹ Kubanga ife abalamu tuweebwayo enaku gyonagyona eri okufa okutulanga Yesu, era n'obulamu bwa Yesu kaisi bubonesebwenga mu mubiri gwaisu ogufa. ¹² Kityo okufa kukolera mu ife, naye obulamu mu imwe. ¹³ Naye nga tulina omwoyo gudi ogw'okwikirirya, nga bwe kyawandiikiibwe nti Naikirirye, Kyenaviire ntumula era feena twikirirya, era kyetuva tutumula; ¹⁴ nga tumaite ng'oyo eyazuukizirye Mukama waisu Yesu, era Feena alituzuukizia wamu ne Yesu, era alitwanjulira wamu naimwe. ¹⁵ Kubanga byonabyona biri ku bwanyu, ekisa ekyo bwe kyeyongera olw'abangi kaisi kyongeryenga okwebalya Katonda aweebwe ekitiibwa. ¹⁶ Kyetuva tuleka okwiririra; naye waire omuntu waisu w'okungulu ng'awaawo, naye omuntu waisu ow'omunda afuuka muyaaka buliijo buliijo. ¹⁷ Kubanga okubonaabona kwaisu okutazitowa, okw'ekiseera ekya eky'atyanu, kwongerayongera inu okutukolera ekitiibwa ekizitowa eky'emirembe n’emirembe; ¹⁸ ife nga tetulingilira ebiboneka, wabula ebitaboneka: kubanga ebiboneka bye kiseera; naye ebitaboneka bye mirembe ne mirembe.