¹ Tutanula ate okwetendereza fenka? oba twetaaga ebbaluwa, ng'abandi, egy'okutendereza eri imwe, oba egiva gye muli? ² Imwe muli bbaluwa yaisu, ewandiikiibwe mu myoyo gyaisu abantu bonabona gye bategeera, gye basoma; ³ nga mubonesebwa okubba ebbaluwa ya Kristo, ife gye twamuweererezeiryemu, eyawandiikiibwe no bwino, wabula Omwoyo gwa Katonda omulamu; ti ku bipande eby'amabbaale, wabula ku bipande niigyo emyoyo egy'omubiri. ⁴ Era tutyo bwe twesiga Katonda ku bwa Kristo: ⁵ ti kubanga fenka tulina obuyinza, okulowooza ekigambo kyonakyona nga ekiva gye tuli; naye obuyinza bwaisu buva eri Katonda; ⁶ era eyatusoboleserye ng'abaweereza b'endagaano engyaaka; ti baweereza be nyukuta, wabula ab’omwoyo: kubanga enyukuta eita; naye omwoyo guleeta obulamu. ⁷ Naye oba nga okuweereza okw’okufa okwabbaire mu nyukuta, okwasaliibwe ku mabbaale, kwaiziire mu kitiibwa, abaana ba Isiraeri n'okuyinza ne batayinza kwekalirirya maiso ga Musa olw'ekitiibwa ky’amaiso ge; ekyabbaire kyaba akuwaawo: ⁸ okuweereza okw'omwoyo tekulisinga kubba ne kitiibwa? ⁹ Kuba oba ng’okuweereza okw'omusango niikyo ekitiibwa, okuweereza okw'obutuukirivu kweyongera inu okusukirirya ekitiibwa. ¹⁰ Kubanga ekyaweweibwe ekitiibwa tekyakiweweibwe mu kigambo kino, olw'ekitiibwa ekisinga ekyo. ¹¹ Kuba oba ng'ekyaweirewo kyabbaire ne ekitiibwa, eky'olubeerera kisinga einu okubba n’ekitiibwa. ¹² Kale nga bwe tulina eisuubi eryenkana awo, tutumula n'obuvumu bungi ¹³ so ti nga Musa eyeebikanga ku maiso ge, abaana ba Isiraeri balekenga okwekalisisya enkomerero y'ekyo ekyabbaire kiwaawo: ¹⁴ naye amagezi gaabwe gaakakanyalibwe: kubanga n'okutuusia atyanu eky'okuboneraku kidi kikaali kiriwo mu kusomebwa kw'endagaanu ey'eira nga kikaali kutolebwawo; ekyo kivaawo mu Kristo. ¹⁵ Naye n'okutuusia atyanu, ebya Musa bwe bisomebwa, eky'okuboneraku kiri ku mwoyo gwabwe. ¹⁶ Naye bwe gukyukira Mukama waisu, eky'okuboneraku kiwaaawo. ¹⁷ Naye Mukama waisu niigwo Mwoyo: era awaba Omwoyo gwa Mukama waisu niiwo waba eidembe. ¹⁸ Naye ife fenafena, bwe tumasamasa ng'endabirwamu ekitiibwa kya Mukama waisu amaaso gaisu nga gatoleibweku eky'okuboneraku, tufaananyizibwa engeri edi okuva mu kitiibwa okutuuka mu kitiibwa, nga ku bwa Mukama waisu Omwoyo.