¹ Awo wabbairewo omusaiza wa Benyamini, eriina lye Kiisi, mutaane wa Abiyeeri, mutaane wa Zeroli, mutaane wa Bekolaasi, mutaane wa Afia omwana w'Omubenyamini, omusaiza ow'a maanni omuzira. ² Era yabbaire n'o mwana, eriina lye Sawulo, omwisuka omusa: so mu baana ba Isiraeri ti mwabbaire muntu eyamusingire obusa: Okuva ku bibega bye n'o kwambuka yasingire abantu bonabona obuwanvu. ³ Awo endogoyi gya Kiisi itaaye wa Sawulo gyabbaire gigotere. Kiisi n'akoba Sawulo mutaane we nti Twala omumu ku baidu ayabe naiwe ogolokoke oyabe osagiire endogoyi. ⁴ Awo n'abita mu nsi ey'e nsozi eya Efulayimu n’abita n'o mu nsi ya Salisa, naye ni batagibona: awo ni babita mu nsi y'e Saalimu, nga gibulayo: n'abita mu nsi ey'Ababenyamini, naye ni bataginona. ⁵ Awo bwe baatuukire mu nsi y'e Zufu, Sawulo n'akoba omwidu we eyabbaire naye nti twabe twireyo; itawange aleke okuleka okulowooza endogoyi ni yeeraliikirira ife. ⁶ N'a mukoba nti bona, mu kibuga muno mulimu omusaiza wa Katonda, era omusaiza oyo bamuteekamu ekitiibwa; byonabyona by'atumula tibirema kutuukirira: twabe eyo atyanu; Koizi iye yasobola okutukobera eby'o lugendo lwaisu lwe tutambula. ⁷ Awo Sawulo n'akoba omwidu we nti naye, bona, bwe twayaba kiki kye twamutwalira omusaiza? kubanga emere eweire mu bintu byaisu, so wabula kirabo kye tubba tutwalira omusaiza wa Katonda tulina ki? ⁸ Omwidu n'a mwiramu Sawulo ate n'atumula nti Bona, nina ekitundu eky'okuna ekye sekeri eye feeza mu ngalo gyange: ekyo kye naawa omusaiza wa Katonda atulagirire engira yaisu. ⁹ (Eira mu Isiraeri, omuntu bwe yayabanga okubuulya Katonda, n'atumulanga ati nti iza twabe eri omuboni: kubanga oyo ayetebwa nabbi atyanu bamwetanga muboni eira.) ¹⁰ Awo Sawulo n'akoba omwidu we nti otumwire kusa; Iza twabe. Awo ni bayingira mu kibuga omwabbaire omusaiza wa Katonda. ¹¹ Awo bwe babbaire baniina awayambukirwa mu kibuga, ni basanga abawala abatobato nga bafuluma okusena amaizi, ni babakoba nti omuboni ali wano? ¹² Ne babairamu ni batumula nti aliwo; bona, ali mu maiso go: yanguwa, kubanga atuukire mu kibuga atyanu; kubanga abantu balina sadaaka watyanu mu kifo ekigulumivu: ¹³ bwe mwabba nga mutuukire mu kibuga, mwamubona mangu ago, ng'akaali kwambuka mu kifo ekigulumivu okulya: kubanga abantu tibaalye ng'akaali kwiza, kubanga niiye asabira sadaaka omukisa; awo abayeteibwe kaisi ni balya. Kale atyanu mwambuke; kubanga atyanu lwe mwamubona. ¹⁴ Ne bambuka mu kibuga; awo bwe babbaire bayingira mu kibuga, bona, Samwiri n'afuluma okuboolekera, okwambuka mu kifo ekigulumivu. ¹⁵ Awo Mukama yabbaire abiikuliire Samwiri ng'ekaali esigaireyo olunaku lumu Sawulo okwiza, ng'atumula nti ¹⁶ Amakeeri nga mu kiseera kino nawererya gy'oli omusaiza ava mu nsi y'e Benyamini, era olimufukaku amafuta okubba omukulu w'a bantu bange Isiraeri, era niiye alirokola abantu bange mu mukono gw'Abafirisuuti: kubanga ningiriire abantu bange, kubanga okukunga kwabwe kutuukire gye ndi. ¹⁷ Awo Samwiri bwe yaboine Sawulo, Mukama n'amukoba nti bona omusaiza gwe nakukobereku! oyo niiye alibba n'o buyinza ku bantu bange. ¹⁸ Awo Sawulo n'asemberera Samwiri mu mulyango n'atumula nti nkobera, nkwegayiriire, enyumba ey'o muboni w'eri. ¹⁹ Samwiri n'airamu Sawulo n'gatumula nti ninze muboni; yambuka okuntangira mu kifo ekigulumivu, kubanga mwalya nanze watyanu: awo amakeeri naakuseebula, ni nkukobera byonabyona ebiri mu mwoyo gwo. ²⁰ N'e ndogoyi gyo egyakamala enaku eisatu okugota, togyeraliikirira; kubanga gibonekere. Era byonabyona ebyegombebwa mu Isiraeri biribba by'ani? tibiribba bibyo iwe n'e nyumba ya itaawo yonayona? ²¹ Sawulo n'airamu n'atumula nti nze tindi Mubenyamini, ow'o mu kika ekisinga obutono mu bika bya Isiraeri? n'e nyumba yange ti niiyo esinga obutono mu nyumba gyonagyona egy'e kika kya Benyamini? kale kiki ekikutumulya nanze otyo? ²² Awo Samwiri n'atwala Sawulo n'omwidu we n'abayingirya mu nyumba ey'a bageni n'abatyamisya mu kifo eky'o ku mwanjo mu abo abayeteibwe, abantu ng'asatu. ²³ Samwiri n'akoba omufumbiro nti Leeta omugabo gwe nkuwaire gwe nkukobereku nti Gugise. ²⁴ Omufumbiro n'asitula ekisambi n'ebyakibbaireku n'akiteeka mu maiso ga Sawulo. Samwiri n'atumula nti bona ekyo ekigisiibwe! kiteeke mu maiso go olye; kubanga kikugisisiibwe okutuusya ku biseera ebyateekeibwawo, kubanga natumwire nti njetere abantu. Awo Sawulo n'alya n'o Samwiri ku lunaku olwo. ²⁵ Awo bwe babbaire baserengetere mu kibuga okuva mu kifo ekigulumivu, n'ateesya n'o Sawulo waigulu ku nyumba. ²⁶ Ne bagolokoka mu makeeri: awo olwatuukire obwire nga bukya, Samwiri n'ayeta Sawulo waigulu ku nyumba ng'atumula nti Golokoka, nkusindike oyabe. Sawulo n'agolokoka ni bafuluma bombiri, iye n'o Samwiri. ²⁷ Bwe babbaire nga baserengeta ekibuga we kikoma, Samwiri n'akoba Sawulo nti lagira omwidu abitemu atutangire (n'abitamu,) naye iwe yemerera bwemereri mu kiseera kino nkuwulirye ekigambo kya Katonda.