¹ Awo Samwiri n'airira ecupa y'amafuta n'agafuka ku mutwe gwe n'amunywegera n'atumula nti Mukama ti niiye akufukireku amafuta okubba omukulu w'o busika bwe? ² Bwewava gye ndi watyanu, wabona abasaiza babiri ku magombe ga Laakeeri, mu nsalo y'e Benyamini e Zereza; awo bakukoba nti endogoyi gye wayabire okusagira gibonekere: era, bona, itaawo alekereyo okulowooza endogoyi ni yeeraliikirira iwe ng'atumula nti nakola ntya olw'omwana wange? ³ Awo wavaayo ni weeyongera okwaba mu maiso n'otuuka awali omwera gwa Taboli, wasiŋaanwa eyo abasaiza basatu nga bambuka eri Katonda e Beseri, omumu ng'atwala abaana b'e mbuli basatu, n'o gondi ng'atwala emigaati isatu, n'ogondi ng'atwala ekideku eky'o mwenge: ⁴ awo bakusugirya ni bakuwa emigaati ibiri: gy'obba otoola mu ngalo gyabwe. ⁵ Kaisi n'otuuka ku lusozi lwa Katonda awali ekigo eky'Abafirisuuti: awo olwatuuka, bwewabba ng'otuukire eyo mu kibuga, wasiŋaana ekibiina kya banabbi nga baserengeta nga bava mu kifo ekigulumivu nga balina ekongo n'ebitaasa n'endere n'e nanga nga bibatangiire; era baabba nga balagula: ⁶ awo omwoyo gwa Mukama gwaiza ku iwe n'a maani, n'o lagulira wamu nabo, n'ofuuka okubba omuntu ogondi. ⁷ Awo olwatuuka, obubonero obwo nga bukutuukireku, okolanga ng'o mukono gwo bwe gwasanga bwe biri; kubanga Katonda ali naiwe. ⁸ Era watangira n'o serengeta e Girugaali; nzena, bona, ndiserengeta gy'oli, okuwaayo ebiweebwayo ebyokyebwa n'o kusala sadaaka egy'e biweebwayo olw'e mirembe: olimalayo enaku musanvu kaisi ngize gy'oli nkutegeeze by'obba okola. ⁹ Awo olwatuukire bwe yakyusirye amabega ge okuva Samwiri w'ali, Katonda n'amuwa omwoyo ogundi: obubonero obwo bwonabwona ni butuukirira ku lunaku olwo. ¹⁰ Awo bwe batunkireyo eri olusozi, bona, ekibiina kya banabbi ni kisisinkana naye; omwoyo gwa Mukama ni gwiza ku iye n'a maani, n'a lagula mu ibo. ¹¹ Awo olwatuukire bonabona abaamumanyanga eira bwe bamuboine, bona, ng'alagulira wamu na banabbi, awo abantu nga bakobagana nti kiki kino ekimwiziriire mutaane wa Kiisi? n'o Sawulo ali mu banabbi? ¹² Awo omuntu ow'o mu kifo omwo n'airamu n'atumula nti N'o itaaye niiye ani? Kyewaviire lufuuka olugero nti n'o Sawulo ali mu banabbi? ¹³ Awo bwe yamalire okulagula n'aiza mu kifo ekigulumivu. ¹⁴ Awo kweiza wa Sawulo n'a mukoba iye n'omwidu we nti mwayabire waina? Natumula nti Okusagira endogoyi: awo bwe twaboine nga tigibonekere ni twiza eri Samwiri. ¹⁵ Kwiza wa Sawulo n'atumula nti nkobera, nkwegayiriire, Samwiri bye yabakobere. ¹⁶ Sawulo n'akoba koizawe nti yatubuuliriire dala ng'e ndogoyi gibonekere. Naye ebigambo eby'obwakabaka, Samwiri bye yatumwire, teyabimukobeireku. ¹⁷ Samwiri n'ayeta abantu n'abakuŋaanyirya eri Mukama e Mizupa; ¹⁸ n'akoba atyo abaana ba Isiraeri nti atyo bw'atumula Mukama, Katonda wa Isiraeri, nti natoire Isiraeri mu Misiri ne mbalokola mu mukono gw'Abamisiri n'o mu mukono gw'o bwakabaka bwonabwona obwabajooganga: ¹⁹ naye watynu mugaine Katonda wanyu, abalokola mwene mu naku gyanyu gyonagyona n'o bwinike bwanyu; era mumukobere nti bbe naye teekawo kabaka atufuge. Kale atyanu mweyanjule mu maiso ga Mukama ng'ebika byanyu bwe biri; era ng'e nkumi gyanyu bwe giri. ²⁰ Awo Samwiri n'a semberya ebika byonabyona ebya Isiraeri; ekika kya Benyamini ni kitwalibwa. ²¹ N'asemberya ekika kya Benyamini ng'e nyumba gyabwe bwe gyabbaire, enyumba ey'Abamateri n'etwalibwa: Sawulo mutaane wa Kiisi n'atwalibwa; naye bwe bamusagiire, ne batasobola kumubona. ²² Awo ne beeyongera okubuulya Mukama nti Ekyasigaireyo omusaiza ow'o kwiza eno? Mukama n'a iramu nti bona, yegisire mu bintu. ²³ Ni bairuka mbiro ne bamutoolayo; awo bwe yayemereire mu bantu, ng'asinga abantu bonabona obuwanvu okuva ku bibega bye n'o kwambuka. ²⁴ Awo Samwiri n'a koba abantu bonabona nti Muboine oyo Mukama gw'alondere, nga wabula amwekankana mu Bantu bonabona? Abantu bonabona ne batumulira waigulu ni batumula nti Kabaka abbe omulamu. ²⁵ Awo Samwiri kaisi n'akobera abantu obwakabaka bwe bulifaanana, n'abiwandiika mu kitabo n'akigisa mu maiso ga Mukama. Samwiri n'asindika abantu bonabona baabe buli muntu mu nyumba ye. ²⁶ N'o Sawulo yeena n'ayaba mu nyumba e Gibea; ni waaba naye eigye Katonda be yabbaire akomereku ku myoyo gyabwe. ²⁷ Naye ne wabbaawo abaana ba Beriali abatumwire nti omusaiza oyo alitulokola atya? Ni bamunyooma ni batamuleetera kirabo. Naye iye n'a sirika.