¹ Awo Nakasi Omwamoni n'ayambuka n'asiisira okwolekera Yabesugireyaadi: abasaiza bonabona ab'e Yabesi ne bakoba Nakasi nti Lagaana naife endagaanu, fena tulikuweererya: ² Nakasi Omwamoni n'abakoba nti ntyo bwe nalagaine naimwe, amaiso ganyu gonagona amalyo gatoolebwemu; nzena ndikiteeka ku Isiraeri yenayena okubba ekivumi. ³ Abakaire ab'e Yabesi ni bamukoba nti tuwe eibbanga ery'e naku musanvu tutume ababaka mu nsalo gyonagona egya Isiraeri: awo bwe watalibba ow'o kutulokola, tulifuluma ni twiza gy'oli. ⁴ Awo ababaka ni baiza e Gibea amakeeri Sawulo ni batumulira ebigambo ebyo mu matu g'a bantu: awo abantu bonabona ni bayimusya eidoboozi lyabwe ni bakunga amaliga. ⁵ Awo, bona, Sawulo n'aiza ng'asengererya ente okuva mu nimiro; Sawulo n'atumula nti Abantu babakaire batya okukunga amaliga? Ne bamukobera ebigambo by'a basaiza ab'e Yabesi. ⁶ Awo omwoyo gwa Katonda ni gwiza ku Sawulo n'a maani, bwe yawuliire ebigambo ebyo, obusungu bwe ni bubuubuuka inu. ⁷ Awo n'airira ente ibiri n'a gitematema n'a giweererya okubuna ensalo gyonagyona egya Isiraeri mu mikono gy'a babaka ng'atumula nti buli atalifuluma okusengererya Sawulo n'o Samwiri, gityo ente gye bwe girikolebwa. Ekitiibwa kya Mukama ni kigwa ku bantu, ni bafuluma ng'o muntu omumu. ⁸ N'ababalira e Bezeki; awo abaana ba Isiraeri babbaire obusiriivu busatu, n'a basaiza ba Yuda babbaire emitwalo isatu. ⁹ Ni bakoba ababaka abaizire nti mutyo bwe mwakoba abasaiza ab'e Yabesugireyaadi nti amakeeri, omusana nga gwakire, mwafuna obulokozi. Ababaka ni baiza ni bakobera abasaiza ab'e Yabesi; ni basanyuka. ¹⁰ Abasaiza ab'e Yabesi Kyebaviire batumula nti amakeeri twafuluma ni twiza gye muli mutukole byonabona bye musiima. ¹¹ Awo olwatuukiire amakeeri Sawulo n'a yawulamu abantu ebibiina bisatu; ni batuuka wakati mu lusiisira mu kisisimuko eky'a makeeri, ni bakubba Abamoni okutuusya omusana lwe gwakalirye: awo olwatuukiire abaasigairewo ni basaansaana okusigala ni watasigala babiri ku ibo Ababbaire awamu. ¹² Abantu ni bakoba Samwiri nti yani oyo eyatumwire nti Sawulo alitufuga? leeta abasaiza abo tubaite. ¹³ Sawulo n'atumula nti tiwaabbeewo muntu eyaitibwa watynu: kubanga watyanu Mukama akolere obulokozi mu Isiraeri. ¹⁴ Awo Samwiri n'akoba abantu nti mwize twabe e Girugaali, tunywezye eyo ate obwakabaka. ¹⁵ Abantu bonabona ni baaba e Girugaali; Sawulo ni bamufuulira eyo kabaka mu maiso ga Mukama e Girugaali; ne basalira eyo sadaaka egy'e biweebwayo olw'e mirembe mu maiso ga Mukama; Sawulo N'abasaiza bonabona aba Isiraeri ni basanyukira inu eyo.