¹ Awo Samwiri n'akoba Isiraeri yenayena nti bona, mpuliire eidoboozi lyanyu mu byonabyona bye mwankobere, era nkolere kabaka okubafuga. ² Era, bona, atyanu kabaka atambulira mu maiso ganyu: Nzeena ndi mukaire, merere n'envi; era, bona, bataane bange bali naimwe: era natambulira mu maiso ganyu okuva mu butobuto bwange ne watynu. ³ Ninze ono: munumiririrye mu maiso ga Mukama n'o mu maiso g'oyo gwe yafukakireku amafuta: yani gwe nanyagireku ente ye? oba yani gwe nanyagireku endogoyi ye? oba yani gwe nabbaire ndyazaamaanyizire? yani gwe nabbaire njoogere? oba yani gwe natoireku mu ngalo gye enguzi okunzibya amaiso nzeena naabasasula. ⁴ Ni batumula nti Totulyazaamaanyanga so totujooganga, so totoolanga kintu mu ngalo gy'o muntu yenayena. ⁵ N'abakoba nti Mukama niiye mujulizi gye muli n'oyo gwe yafukireku amafuta niiye mujulizi watyanu nga imwe timuboine kintu mu mukono gwange. Ni batumula nti niiye mujulizi. ⁶ Samwiri n'akoba abantu nti niiye Mukama eyateekerewo Musa n'a Alooni era eyatoire bazeiza banyu mu nsi y'e Misiri. ⁷ Kale atyanu mwemerere bwemereri mpozye naimwe mu maiso ga Mukama olw'e bikolwa byonabona eby'o butuukirivu ebya Mukama bye yakolere imwe na Bazeiza. ⁸ Yakobo bwe yabbaire atuukire mu Misiri, Bazeiza banyu ni bakungira Mukama, awo Mukama n'atuma Musa n'a Alooni eyatoire bazeiza banyu mu Misiri n'abagonia mu kifo muno. ⁹ Naye ne beerabira Mukama Katonda wabwe, n'abatunda mu mukono gwa Sisera, omwami w'e igye lya Kazoli n'o mu mukono gw'Abafirisuuti n'o mu mukono gwa kabaka wa Mowaabu, ne balwana nabo. ¹⁰ Awo ne bakungira Mukama ne batumula nti Twayonoonere kubanga twalekere Mukama ni tuweererya Babaali n'a Baasutaloosi; naye atyanu tulokole mu mukono gw'abalabe baisu, kaisi tukuweererye. ¹¹ Awo Mukama n'atuma Yerubbaali n'o Bedani n'o Yefusa n'o Samwiri, n'abalokola mu mukono gw'a balabe banyu enjuyi gyonagyona, ni mutyama mirembe. ¹² Awo bwe mwaboine nga Nakasi kabaka w'a baana ba Amoni ng'abatabaire, ni munkoba nti Bbe, naye kabaka niiye alitufuga: Mukama Katonda wanyu nga niiye kabaka wanyu. ¹³ Kale atyanu bona kabaka gwe mulondere era gwe musabire: era, bona, Mukama atekerewo kabaka okubafuga. ¹⁴ Bwe mwatyanga Mukama ni mumuweereryanga ni muwuliranga eidoboozi lye ni mutajeemeranga kiragiro kya Mukama, imwe era no kabaka abafuga ni mumusengereryanga Mukama Katonda wanyu; kale: ¹⁵ naye bwe mutaawulirenga eidoboozi lya Mukama, naye ni mujeemeranga ekiragiro kya Mukama, awo omukono gwa Mukama gwalwananga naimwe nga bwe gwalwananga n'a bazeiza banyu. ¹⁶ Kale atyanu mwemerere bwemereri mubone ekigambo kino ekikulu Mukama kyeyakolera mu maiso ganyu. ¹⁷ Watyanu ti niigo makungula g'e ŋaanu? Nasaba Mukama aweererye okubwatuka n'a maizi: awo mwamanya ni mubona ng'o bubbiibi bwanyu bunene bwe mwakolere mu maiso ga Mukama nga mwesabira kabaka. ¹⁸ Awo Samwiri n'a saba Mukama; Mukama n'a weererya okubwatuka n'a maizi ku lunaku olwo: abantu bonabona ni batya inu Mukama n'o Samwiri. ¹⁹ Abantu bonabona ni bakoba Samwiri nti Sabira abaidu bo eri Mukama Katonda wo tuleke okufa: kubanga twongeire ku bibbiibi byaisu byonabona n'e kibbiibi kino, okwesabira kabaka. ²⁰ Samwiri n'akoba abantu nti timutya: okukola mwakolere ekibbiibi kino kyonakyona: naye timukyamanga obutasengereryanga Mukama, naye muweereryenga Mukama n'o mwoyo gwanyu gwonagwona; ²¹ so temukyamanga: kubanga niikwo kwandibbaire okusengererya ebibulamu ebitasobola kugasa waire okulokola, kubanga bibulamu. ²² Kubanga Mukama taayabulirenga bantu be olw'e riina lye eikulu: kubanga Mukama yasiimire okubeefuulira yenka eigwanga. ²³ Era nze kiirire edi nze okusobya ku Mukama nga ndekayo okubasabira: naye nabegeresyanga engira ensa engolokofu. ²⁴ Kyooka mutyenga Mukama mumuweeryenga mu mazima n'o mumwoyo gwanyu gwonagwona: kubanga mulowoozerye ebigambo bye yabakoleire bwe byekankana obukulu. ²⁵ Naye bwe mweyongeranga okukola Ebibbiibi, mulizikirira imwe era n'o kabaka wanyu.