¹ Sawulo yabbaire nga yaakamala emyaka asatu bwe yatandikiire okufuga; n'afugira Isiraeri emyaka ibiri. ² Sawulo ni yeerondera abasaiza ba Isiraeri enkumi isatu; ku abo enkumi eibiri baabbanga n'o Sawulo e Mikumasi n'o ku lusozi olw'e Beseri; n'o lukumi baabbanga n'o Yonasaani e Gibea ekya Benyamini: n'a bantu abandi bonabona n'a basindika buli muntu mu weema ye. ³ Yonasaani n'a kubba ekigo eky'Abafirisuuti ekyabbaire e Geba, Abafirisuuti ni bakiwulira. Sawulo n'afuuwa eikondeere okubuna ensi yonayona, ng'atumula nti Abaebbulaniya bawulire. ⁴ Isiraeri yenayena ni bawulira nga batumula nga Sawulo akubbire ekigo eky'Abafirisuuti era nga Isiraeri Abafirisuuti bamutamiirwe. Abantu ni bakuŋaanira e Girugaali okusengererya Sawulo. ⁵ Awo Abafirisuuti ni bakuŋaana okulwana n'e Isiraeri, amagaali emitwaalo isatu, n'a basaiza abeebagala embalaasi kakaaga, n'a bantu ababbaire ng'o musenyu oguli ku itale ly'e nyanza obungi: ni bambuka ne basiisira e Mikumasi, ku luuyi olw'e buvaisana olw'e Besaveni. ⁶ Awo abasaiza ba Isiraeri bwe baboine nga bali kubbiibi (kubanga abantu babbaire baboine enaku,) awo abantu ni beegisa mu mpuku n'o mu bisaka n'o mu mabbaale n'o mu mpampagama n'o mu biina. ⁷ Era abamu ku Baebbulaniya babbaire basomokere Yoludaani ni baaba mu nsi ye Gaadi ni Gireyaadi: naye Sawulo yabbaire ng'akaali e Girugaali, abantu bonabona ne bamusengererya nga bakankana: ⁸ N'amala enaku musanvu ng'ebiseera bwe byabbaire Samwiri bye yateekerewo: naye Samwiri nga kaali kwiza e Girugaali; abantu ne basaasaana nga bamuvaaku. ⁹ Sawulo n'atumula nti Ndeetera wano ekiweebwayo ekyokyebwa n'ebiweebwayo olw'emirembe: Naawaayo ekiweebwayo ekyokyebwa. ¹⁰ Awo olwatuukire nga yakamala okuwaayo ekiweebwayo ekyokyebwa, bona, Samwiri n'aiza; Sawulo n'afuluma okumusisinkana amusugirye. ¹¹ Samwiri n'a tumula nti Okolere ki? Sawulo n'a tumula nti kubanga naboine ng'abantu basaansaine nga banvaaku so wena nga toiza mu biseera ebyateekeibwewo n'Abafirisuuti nga bakuŋaaniire e Mikumasi; ¹² kyenaviire ntumula nti Abafirisuuti baserengeta e Girugaali okulwana nanze, so nkaali kwegayirira kisa kya Mukama: kyenaviire neegumiinkiriza ni mpaayo ekiweebwayo ekyokyebwa. ¹³ Awo Samwiri n'akoba Sawulo nti wakolere kyo busirusiru: tokwaite kiragiro kya Mukama Katonda wo kye yakulagiire: kubanga atyanu Mukama yandinywezerye obwakabaka bwo ku Isiraeri enaku gyonagyona. ¹⁴ Naye watyanu obwakabaka bwo tibulibba bw'o lubeerera: Mukama yesagiriire omusaiza aliŋanga omwoyo gwe iye, era Mukama amuteekerewo okubba omukulu w'a bantu be, kubanga tokwaite ekyo Mukama kye yakulagiire. ¹⁵ Awo Samwiri n'a golokoka n'ava e Girugaali n'ayambuka e Gibea ekye Benyamini. Sawulo n'abala abantu ababbaire awamu naye, abasaiza nga lukaaga. ¹⁶ Sawulo n'o Yonasaani mutaane we n'abantu ababbaire awamu nabo n'e batyama e Geba ekye Benyamini: naye Abafirisuuti ne basiisira e Mikumasi. ¹⁷ Abakwekweti ni bava mu lusiisira olw'Abafirisuuti ebibiina bisatu: ekibiina ekimu ni baira mu ngira eyaba e Yofula, mu nsi ye Suwaali: ¹⁸ n'ekibiina ekindi ni baira mu ngira eyaba e Besukolooni: n'e kibiina ekindi ni baira mu ngira ey'e nsalo w'oyema waigulu okulingirira ekiwomvu Zeboyimu ku luuyi olw'eidungu. ¹⁹ Awo ni wataboneka muweesi mu nsi yonayona eya Isiraeri: kubanga Abafirisuuti Batumwire nti Abaebbulaniya baleke okweweeserya ebitala oba amasimu: ²⁰ naye Abaisiraeri bonabona ni baserengeta eri Abafirisuuti okuwagala buli muntu embago ye n'ekiwabyo kye n'e mpasa ye n'e kisimu kye; ²¹ naye babbaire balina kumuyamba olw'e bisimu n'e biwabyo n'a makato n'e mpasa; n'o lw'o kutaka emiwunda. ²² Awo olwatuukire mu biseera eby'e ntalo ni wataboneka kitala waire eisimu mu mukono gw'o muntu yenayena ku abo ababbaire n'e Sawulo n'e Yonasaani: naye Sawulo n'o Yonasaani mutaane we niibo babbaire. ²³ N'Abafirisuuti ab'o mu kigo ni bafuluma ni baaba awetebwa mu Mikumasi.