¹ Awo olunaku lwabbaire lumu Yonasaani mutaane wa Sawulo n'akoba omulenzi eyatwalanga ebyokulwanyisya bye, nti iza tusomoke twabe eri ekigo eky'Abafirisuuti ekiri emitala w'edi. Naye n'atakobera itaaye. ² Sawulo n'abba mu kitundu eky'e Gibea eky'e nkomerero munda w'o mukomamawanga oguli e Miguloni: n'abantu ababbaire naye babbaire abasaiza nga lukaaga; ³ n'o Akiya, mutaane wa Akitubu, mugande wa Ikabodi, mutaane wa Finekaasi, mutaane wa Eri, kabona wa Mukama mu Siiro, ng'a vaire ekanzu. Abantu ne batamanya nga Yonasaani ayabire. ⁴ Awo wakati awayeteibwe Yonasaani we yabbaire ataka okufuluma okutuuka mu kigo eky'Abafirisuuti, wabbairewo eibbaale eisongoli eruuyi n'e ibbaale eisongoli eruuyi: n'e rimu eriina lyalyo Bozezi, n'e rindi eriina lyalyo Sene. ⁵ Eibbaale erimu lyabbaire lyemereire ku luuyi olw'obukiika obugooda okwolekera Mikumasi, n'e rindi ku luuyi olw'o bukiika obulyo okwolekera Gibea. ⁶ Awo Yonasaani n'akoba omulenzi eyatwalanga ebyokulwanisya bye nti iza tusomoke twabe ekigo eky'abatali bakomole bano: koizi Mukama yatukolera omulimu: kubanga Mukama wabula kimuziyizya okulokola n'abangi oba n'abatono. ⁷ Eyatwalanga ebyokulwanisya bye n'amukoba nti Kola byonabona ebiri mu mwoyo gwo; kyuka, bona, nze ndi wamu naiwe ng'o mwoyo gwo bwe guli. ⁸ Awo Yonasaani n'atumula nti bona, twasomoka ni tuwaba eri abasaiza ni tweyerula gye bali. ⁹ Bwe batukoba nti mubbe eyo okutuusya bwe twaiza gye muli; awo twayemerera bwemereri mu kifo kyaisu ni tutayambuka gye bali. ¹⁰ Naye bwe batumula nti Mwize gye tuli; awo twayambuka: kubanga Mukama abagabwire mu mukono gwaisu: era ako niiko kabba akabonero gye tuli. ¹¹ Awo bombiri ne beeyerula eri ekigo eky'Abafirisuuti: Abafirisuuti ne batumula nti bona, Abaebbulaniya bafuluma mu bwina mwe babbaire begisire. ¹² Abasaiza ab'o mu kigo ni bairamu Yonasaani n'oyo eyatwalanga ebyokulwanisya bye ni batumula nti mwambuke gye tuli tubalage ekigambo. Awo Yonasaani n'akoba eyatwalanga eby'o kulwanisya bye nti Yambuka onsengererye: kubanga Mukama abagabwire mu mukono gwa Isiraeri. ¹³ Awo Yonasaani n'a niina ng'a kambuka n'e ngalo n'e bigere n'e yatwalanga ebyokulwanisya bye ng'a musengererya: ne bagwa mu maiso ga Yonasaani; n'e yatwalanga ebyokulwanisya bye n'abaita ng'amuvaaku nyuma. ¹⁴ Era olwita olwo olw'o luberyeberye Yonasaani n'e yatwalanga ebyokulwanisya bye lwe baitire lwabbaire lwa basaiza ng'abiri, n'e ibbanga lyabbaire nga kitundu ky'o lubbimbi mu musiri gw'e itakali. ¹⁵ Ni wabbaawo okutengera mu lusiisira n'o mu nimiro n'o mu bantu bonabona; ab'o mu kigo n'abakwekweti ni batengera nabo: ensi n’e tengera awo ni wabbaawo okutengera kunene einu. ¹⁶ N'abakuumi ba Sawulo ababbaire e Gibea ekya Benyamini ni balinga; awo, bona, ekibiina ni kisereba, ne baaba eruuyi n'e ruuyi. ¹⁷ Awo Sawulo n'akoba abantu ababbaire naye nti Mubone atyanu, mubone bw'ali atuviiremu. Awo bwe baboine, bona, Yonasaani n'eyatwalanga ebyokulwanisya bye nga bawulawo. ¹⁸ Sawulo n'akoba Akiya nti Leeta eno sanduuku ya Katonda. Kubanga esanduuku ya Katonda yabbaire eyo mu biseera ebyo wamu n'a baana ba Isiraeri. ¹⁹ Awo olwatuukire, Sawulo ng'atumula n'o kabona, oluyoogaano olwabbaire mu lusiisira olw'Abafirisuuti ni lubbaawo ni lweyongera: Sawulo n'a koba kabona nti iryayo omukono gwo. ²⁰ Awo Sawulo n'a bantu bonabona ababbaire naye ne bakuŋaana ni baiza okulwana: awo bona, ekitala kya buli muntu ni kirwana n'o mwinaye ni wabba okukeŋentererwa okunene einu. ²¹ Awo Abaebbulaniya ababbaire n'Abafirisuuti ng'eira, abayambukire boona mu lusiisira okuva mu nsi eyeetooloola; era boona ni bakyuka okubba n'Abaisiraeri ababbaire n'o Sawulo n'o Yonasaani. ²² Era batyo n'a basaiza bonabona aba Isiraeri ababbaire begisire mu nsi ey'e nsozi eya Efulayimu, bwe baawuliire Abafirisuuti nga bairukire, era bona ni babasengererya dala mu lutalo. ²³ Awo Mukama n'a lokola atyo Isiraeri ku lunaku olwo: olutalo ni lwigukira e Besaveni. ²⁴ Abantu ba Isiraeri ni babona enaku ku lunaku olwo: naye Sawulo n'alayirya abantu ng'a tumula nti omuntu alaamiibwe eyalya ku mere yonayona okutuusya akawungeezi, nzena nga malire okuwalana eigwanga ku balabe bange: Awo abantu ni batalega ku mere n'o mumu. ²⁵ Abantu bonabona ni batuuka mu kibira; era wabbairewo omubisi gw'e njoki wansi. ²⁶ Awo abantu bwe babbaire batuukire mu kibira, bona, omubisi gw'e njoki nga gutonya: naye ni watabba muntu eyateekere engalo gye ku munwa; kubanga abantu batiire ekirayiro. ²⁷ Naye Yonasaani teyawuliire itaaye bwe yalayirye abantu ekirayiro: kyeyaviire agolola omusa gw'o mwigo ogwabbaire mu mukono gwe, n'agwinika mu bisenge by'e njoki, n’ateeka engalo gye ku munwa; amaiso ge ni gabona kusa. ²⁸ Awo omumu ku bantu n'airamu n'a tumula nti itaawo yakuutiire abantu ng'a balayirya ekirayiro ng'a tumula nti alaamibwe omuntu eyalya ku mere watyanu. Abantu ni bayongobera. ²⁹ Awo Yonasaani n'atumula nti itawange anakuwairye ensi: bona, nkwegayiriire, amaiso gange bwe gaboine okusa, kubanga ndegereku atyanu ku mubisi guno ogw'e njoki. ³⁰ Tebandisingire inu abantu singa baliire watyanu ku munyago ogw'a balabe baabwe gwe baboine ni baikuta? kubanga atyanu tewabbaire lwita lunene mu Bafirisuuti. ³¹ Ne baita ku Bafirisuuti ku lunaku olwo okuva e Mikumasi okutuuka ku Ayalooni: abantu ni bayongobera inu. ³² Awo abantu ni bagwa ku munyago, ne banyaga entama n'e nte n'e nyana ne bagiitira awo: abantu ni bagirya awamu n'o musaayi. ³³ Awo ne bamukobera Sawulo nga bamumula nti bona, abantu basobya ku Mukama kubanga balya wamu n'o musaayi. N'atumula nti mukuusirye: munjiringisirye eibbaale einene atyanu. ³⁴ Sawulo n'atumula nti Musaansaane mu bantu, mubakobe nti mundeetere wano buli muntu ente ye na buli muntu entama ye, mugiitire wano mulye: so temusobya ku Mukama nga mulya omusaayi. Abantu bonabona ne baleeta buli muntu ente ye wamu naye obwire ekyo ni bagiitira eyo. ³⁵ Sawulo n'azimbira Mukama ekyoto: ekyo niikyo kyabbaire ekyoto eky'o luberyeberye kye yazimbire Mukama. ³⁶ Awo Sawulo n'atumula nti Tuserengete tusengererye Abafirisuuti obwire, tubanyage okutuusya mungamba lw'eyasala, tuleke okusigalya omuntu ku ibo. Ni batumula nti kola kyonakyona ky'osiima. Awo kabona n'atumula nti tusemberere Katonda wano. ³⁷ Sawulo n'abuulya Katonda amagezi nti Nserengete okusengererya Abafirisuuti? Wabagabula mu mukono gwa Isiraeri? Yeena n'atamwiramu ku lunaku olwo. ³⁸ Sawulo n'atumula nti musembere wano, imwe mwenamwena abakulu b'a bantu: mutegeere mubone ekibbiibi kino bwe kibbaire atyanu. ³⁹ Kubanga Mukama alokola Isiraeri nga bw'ali omulamu, waire nga kibbaire mu Yonasaani mutaane wange, taaleke kufa. Naye ni watabba muntu n'o mumu mu bantu bonabona eyamwiramu. ⁴⁰ Awo n'akoba Isiraeri yenayena nti imwe mubbe ku luuyi lumu, nzena n'o Yonasaani mutaane wange twabba ku luuyi olundi. Abantu ni bakoba Sawulo nti Kola nga bw'osiima. ⁴¹ Sawulo kyeyaviire akoba Mukama, Katonda wa Isiraeri, nti laga eby'e nsonga. Awo akalulu ni kabagwaku Sawulo n'o Yonasaani; naye abantu ni bawona. ⁴² Sawulo n'atumula nti mukubbire nze n'o Yonasaani mutaane wange. Ni kamugwaku Yonasaani. ⁴³ Awo Sawulo n'akoba Yonasaani nti nkobera by'okolere. Yonasaani n'a mukobera n'atumula nti okulega nalegere ku mubisi gw'e njoki n'o musa gw'o mwigo ogubbaire mu mukono gwange; kale, bona, kiŋwaniire okufa. ⁴⁴ Sawulo n'atumla nti Katonda akole atyo n'o kusingawo: kubanga tooleke kufa, Yonasaani. ⁴⁵ Abantu ni bakoba Sawulo nti Yonasaani yafa akolere obulokozi buno obukulu mu Isiraeri? Kiirire edi: nga Mukama bw'ali omulamu, tiwalibba ku nziiri gye n'o lumu olwagwire wansi: kubanga akoleire wamu n'o Katonda watyanu. Awo abantu n'e banunula batyo Yonasaani, n'atafa. ⁴⁶ Awo Sawulo n'aleka okusengererya Abafirisuuti n'a yambuka: Abafirisuuti ni bairayo ewawabwe. ⁴⁷ Awo Sawulo bwe yamalire okulya obwakabaka bwa Isiraeri, n'a lwana n'a balabe be bonabona enjuyi gyonagyona, Mowaabu n'a baana ba Amoni n'e Edomu na bakabaka b'e Zoba n'Abafirisuuti: awo n'abeeraliikiriryanga buli gye yakyukanga yonayona. ⁴⁸ N'akola eby'obuzira n'akubba Abamaleki, n'alokola Isiraeri mu mikono gy'abo ababanyaganga. ⁴⁹ Na bataane ba Sawulo babbaire Yonasaani n'o Isuvi n'o Malukisuwa: n'amaina ga bawala be ababiri gaano; omuberyeberye eriina lye Merabu, n'o mutomuto eriina lye Mikali: ⁵⁰ no mukali wa Sawulo eriina lye yabbaire Akinoamu omwana wa Akimaazi: n'o mukulu w'e igye lye eriina lye yabbaire Abuneeri mutaane wa Neeri Mugande wa itaaye wa Sawulo. ⁵¹ N'o Kiisi yabbaire itaaye wa Sawulo; n'o Neeri itaaye wa Abuneeri yabbaire mutaane wa Abiyeeri. ⁵² Awo ne balwana inu dala n'Abafirisuuti enaku gyonagyona egya Sawulo: awo Sawulo bwe yabonanga omuntu yenayena ow'a maani oba omuzira yenayena, n'a mwesenzeryanga.