¹ Awo Samwiri n'akoba Sawulo nti Mukama Yantumire okukufukaku amafuta okubba kabaka w'a bantu ba Isiraeri: kale atyanu wulira eidoboozi ly'e bigambo bya Mukama. ² Atyo bw'atumula Mukama ow'e igye nti nekaanyire ebyo Amaleki bye yakolere Isiraeri, bwe yeesimbirewo okumuziyizya mu ngira, bwe yaniinire okuva mu Misiri. ³ Atyanu Yaba okubbe Amaleki, ozikiririrye dala byonabyona bye balina, so tobasaasira; naye baite abasaiza n'abakali omwana omuwere n’a nyonka, ente n’e ntama, eŋaamira n’e ndogoyi. ⁴ Awo Sawulo n'ayeta abantu n'ababalira e Terayimu, abasaiza abatambula n'e bigere obusiriivu bubiri, n'a basaiza ba Yuda kakumi. ⁵ Sawulo n'atuuka ku kibuga kya Amaleki n'ateegera mu kiwonvu. ⁶ Sawulo n'akoba Abakeeni nti Mwabe muveewo muserengete okuva mu Bamaleki ndeke okubazikirirya awamu nabo: kubanga mwakolere eby'e kisa abaana ba Isiraeri bonabona, bwe baviire mu Misiri. Awo Abakeeni ni bava mu Bamaleki. ⁷ Sawulo n'a kubba Abamaleki; okuva e Kavira ng'oyaba e Suuli, ekyolekera Misiri. ⁸ N'awamba Agagi kabaka w'Abamaleki, n'azikiririrya dala abantu bonabona n'o bwogi bw'e kitala. ⁹ Naye Sawulo n'a bantu ni basonyiwa Agagi n'entama egyasingire obusa n'e nte n'ebya sava n'a baana b'e ntama n'ebisa byonabyona, ne bagaana okubizikirirya dala: naye ebibbiibi byonabyona era ebitali byo muwendo ebyo ni babizikiririrya dala. ¹⁰ Awo ekigambo kya Mukama kaisi ne kiizira Samwiri ng'atumula nti ¹¹ Nejusirye kubanga nakulirye Sawulo okubba kabaka: kubanga airireyo enyuma obutansengererya so takolere biragiro byange. Awo Samwiri n'a sunguwala; n'a kungira Mukama okukyesya obwire. ¹² Awo Samwiri n'agolokoka mu makeeri okusisinkana n'o Sawulo Amakeeri; ne bamukobera Samwiri nti Sawulo yatuukire ku Kalumeeri, era, bona, ne yeesimbira ekijukiryo, n'akyuka n'abitamu n'a serengeta e Girugaali. ¹³ Awo Samwiri n'aiza eri Sawulo: Sawulo n'a mukoba nti oweebwe Mukama omukisa: nkolere ekiragiro kya Mukama. ¹⁴ Awo Samwiri n'atumula nti okubeigyagala kuno okw'entama okuli mu matu gange makulu ki, n'o kuŋooŋa kw'e nte kwe mpulira? ¹⁵ Sawulo n'atumula nti Bagitoole ku Bamaleki ne bagireeta: kubanga abantu basonyiwire entama n'e nte egyasinga obusa, okuwaayo sadaaka eri Mukama Katonda wo; n'e bindi tubizikiririirye dala. ¹⁶ Awo Samwiri n'akoba Sawulo nti Sooka oleke nzena nakukobera Mukama by'a nkobere obwire buno. N'a mukoba nti tumula. ¹⁷ Samwiri n'atumula nti waire nga wabbaire mutono mu maiso go iwe, tewafuuka mutwe gwe bika bya Isiraeri? Mukama n'akufukaku amafuta okubba kabaka wa Isiraeri: ¹⁸ Mukama n'akutuma olugendo, n'atumula nti yaba ozikiririrye dala abalina ebibbiibi abo Abamaleki, olwane nabo okutuusya lwe balimalibwawo. ¹⁹ Kale kiki ekyakulobeire okugondera eidoboozi lya Mukama, naye n'ogwa ku munyago, n'okola ebyabbaire ebibbiibi mu maiso ga Mukama? ²⁰ Sawulo n'akoba Samwiri nti okugondera ŋondeire eidoboozi lya Mukama, ne njaba olugendo Mukama lwe yantumire, ne ndeeta Agagi kabaka wa Amaleki, ne nzikiririrya dala Abamaleki. ²¹ Naye abantu ni batoola ku munyago entama n'e nte, ebyasingire mu ebyo ebyawongeibwe, okuweerayo eri Mukama Katonda wo e Girugaali. ²² Samwiri n'atumula nti Mukama asanyukira ebiweebwayo ebyokyebwa n'e sadaaka okwekankana nga bw'asanyukira okugondera eidoboozi lya Mukama? Bona okugonda kusinga saadaaka obusa n’okuwulira kusinga amasavu g’e ntama enume. ²³ Kubanga okujeema kuliŋanga ekibbiibi eky’obufumu, n’o bukakanyavu buliŋanga okusinza ebifaananyi n'a baterafi. Kubanga ogaine ekigambo kya Mukama, yeena akugaine okubba kabaka. ²⁴ Awo Sawulo n'akoba Samwiri nti Nayonoonere: kubanga nasoberye ekiragiro kya Mukama n'e bigambo byo: kubanga natiire abantu ni ŋondera eidoboozi lyabwe. ²⁵ Kale atyanu, nkwegayiriire, sonyiwa ekibbiibi kyange, okyukire wamu nanze ate tininze Mukama. ²⁶ Samwiri n'akoba Sawulo nti tinaireyo naiwe: kubanga ogaine ekigambo kya Mukama, n'e Mukama akugaine okubba kabaka wa Isiraeri. ²⁷ Awo Samwiri bwe yakyukire okwaba, n'akwata ekirenge ky'e bivaalo kye ni kikanuka. ²⁸ Awo Samwiri n'a mukoba nti Mukama akukanwireku obwakabaka bwa Isiraeri watyanu, n'abuwa muliraanwa wo akusinga obusa. ²⁹ Era maite ga Isiraeri talibbeya so talyejusya: kubanga ti muntu yejusye. ³⁰ Kaisi n'atumula nti Nayonoonere: naye nteekamu ekitiibwa atyanu, nkwegayiriire, mu maiso g'abakaire b'a bantu bange n'o mu maiso ga Isiraeri, okyukire wamu nanze ate tininze Mukama Katonda wo. ³¹ Awo Samwiri n'akyuka ate okusengererya Sawulo; Sawulo n'a sinza Mukama. ³² Awo Samwiri kaisi n'atumula nti mundeetere wano Agagi kabaka w'Abamaleki. Agagi n'aiza gy'ali ng'a kumba. Agagi n'atumula nti Mazima obubalagali bw'o kufa bubitire. ³³ Samwiri n'atumula nti ng'e kitala kyo bwe kyafuulanga abakali obutabba na baana, atyo mawo bw'alibba abula baana mu bakali. Awo Samwiri n'atemeratemera Agagi mu maiso ga Mukama e Girugaali. ³⁴ Awo Samwiri kaisi nayaba e Laama; Sawulo n'a yambuka mu nyumba ye e Gibea ekya Sawulo. ³⁵ Samwiri n'ataiza ate okubona Sawulo okutuusya ku lunaku kwe yafiiriire; kubanga Samwiri yanakuwaliire Sawulo: Mukama ni yejusya kubanga yafiire Sawulo kabaka wa Isiraeri.