¹ Awo Mukama n'akoba Samwiri nti olituukya waina okunakuwalira Sawulo nze nga malire okumugaana okubba kabaka wa Isiraeri? Izulya eiziga lyo amafuta oyabe, nakutuma eri Yese Omubesirekemu: kubanga neboneire kabaka mu bataane be. ² Samwiri n'atumula nti nsobola ntya okwaba? Sawulo bw'alikiwulira, alingita. Mukama n'atumula nti twala ente enduusi oyabe nayo otumule nti Ngizire okuwaayo sadaaka eri Mukama. ³ N'oyeta Yese atoole ku sadaaka, nzena ndikulaga bw'olikola: era olinfukira amafuta ku oyo gwe ndikwatulira eriina. ⁴ Awo Samwiri n'akola ekyo Mukama kye yatumwire n'aiza e Besirekemu. Abakaire b'e kibuga ni baiza okumusisinkana nga batengera ni batumula nti oizire mirembe? ⁵ N'atumula nti Mirembe: ngizire okuwaayo sadaaka eri Mukama: mwetukulye mwize nanze twabe ku sadaaka. N'atukulya Yese n'a bataane be n'abeeta okutoola ku sadaaka. ⁶ Awo olwatuukire nga batuukire n'alingirira Eriyaabu n'atumula nti Mazima Mukama gw'afukireku amafuta ali mu maiso ge. ⁷ Naye Mukama n'akoba Samwiri nti tolingirira maiso ge waire embala Ye bw'eri empanvu; kubanga mugaine: kubanga Mukama tabona ng'a bantu bwe babona; kubanga abantu balingirira okufaanana okw'o kungulu, naye Mukama alingirira mwoyo. ⁸ Awo Yese kaisi n'a yeta Abinadaabu n'amubitya mu maiso ga Samwiri. N'atumula nti So n'oyo Mukama tamulondere. ⁹ Awo Yese n'abityawo Sama. N'atumila nti So n'oyo Mukama tamulondere. ¹⁰ Yese n'abitya mu maiso ga Samwiri musanvu ku bataane be. Samwiri n'akoba Yese nti Mukama talondere abo. ¹¹ Samwiri n'akoba Yese nti Abaana bo bonabona bali wano? N'atumula nti ekaali esigaireyo omutomuto, era, bona, aliisya ntama. Samwiri n'akoba Yese nti tuma bamusyome: kubanga titwatyame okutuusya lw'e yaiza eno. ¹² N'atuma n'a muyingirya. Era yabbaire mumyofu n'a maiso ge nga masa era eyeegombebwa okulingrirwa. Mukama n'atumula nti Golokoka omufukeku amafuta: kubanga niye oyo. ¹³ Awo Samwiri kaisi n'airira eiziga ery'a mafuta, n'a mufukaku amafuta wakati mu bagande be: omwoyo gwa Mukama ni gwiza ku Dawudi n'a maani okuva ku lunaku olwo n'o kweyongerayo. Awo Samwiri n'agolokoka n'ayaba e Laama. ¹⁴ Awo omwoyo gwa Mukama gwabbaire guviire ku Sawulo, n'o muzimu omubbiibi ogwaviire eri Mukama ni gumunakuwalya. ¹⁵ Awo abaidu ba Sawulo ni bamukoba nti bona; omuzimu omubbiibi oguva eri Katonda gukunakuwairye. ¹⁶ Mukama waisu alagire Atyanu abaidu bo, abali mu maiso go, okusagira Omusaiza omukubbi w'e nanga ow’a magezi: awo olwatunkanga omuzimu omubbiibi oguva eri Katonda bwe gwabbanga ku iwe, kale yakubbanga enanga n'e ngalo gye weena oliwona. ¹⁷ Sawulo n'akoba abaidu be nti mumbonere Omusaiza asobola okukubba okusa mumundeetere. ¹⁸ Awo omumu ku baisuka n'airamu n'atumula nti bona, naboine mutaane wa Yese omubesirekemu, omukubbi w'e nanga ow'a magezi, era Omusaiza ow'a maanyi omuzira, era omulwani, era omutegeevu okutumula, era omuntu omusa, ne Mukama ali naye. ¹⁹ Sawulo kyeyaviire atumira Yese ababaka n'atumula nti mpeererya Dawudi mutaane wo ali n'e ntama. ²⁰ Yese n'airira endogoyi n'agitiika emigaati n'e kideku eky'o mwenge n'o mwana gw'e mbuli n'abiweererya Sawulo mu mukono gwa Dawudi mutaane we. ²¹ Awo Dawudi n’aiza eri Sawulo n'ayemerera mu maiso ge: n'amukaka inu; n'atwalanga ebyokulwanisya bye: ²² Sawulo n'atumira Yese ng'a tumula nti nkwegayiriire Dawudi nayemererenga mu maiso gange; kubanga ayabire mu maiso gange. ²³ Awo olwatuukanga omuzimu omubbiibi ogwaviire eri Katonda bwe gwabbanga ku Sawulo, Dawudi n'airiranga enanga ye n'akubba n’engalo gye: awo Sawulo n'aweeranga n'awona, omuzimu omubbiibi ni gumuvaaku.