¹ Awo Abafirisuuti ni bakuŋaanya eigye lyabwe okulwana, ni bakuŋaanira e Soko ekya Yuda, ni basiisira wakati w'e Soko n'e Azeka mu Efusudamimu. ² Sawulo n'abasaiza ba Isiraeri ni bakuŋaana ni basiisira mu kiwonvu Era, ni basimba enyiriri okulwana n'Abafirisuuti. ³ Abafirisuuti ni bemerera ku lusozi eruuyi n'e Isiraeri n'ayemerera ku lusozi eruuyi: ni wabba ekiwonvu wakati waabwe. ⁴ N'o mu lusiisira olw'Abafrisuuti ni muva omuzira, eriina lye Goliyaasi, ow'e Gaasi, obuwanvu bwe emikono mukaaga ku oluta; ⁵ Era yabbaire atikiire sepewo ey'e kikomo ku mutwe gwe, n'avaala ekizibawo eky'e kikomo; n'o buzito bw'e kizibawo bwabbaire sekeri enkumi itaano egy'e kikomo. ⁶ Era yabbaire avaire ku magulu eby'e bikomo, era yabbaire n'e isimu ery'ekikomo ku kibega kye. ⁷ N'olunyago lw'e isimu lye lwabbairenga omusale ogulukirwaku engoye; n'e isimu lye lyene obuzito bwalyo sekeri kikumi egy'e kyoma: n'oyo eyatwalanga engabo ye n'amutangiranga. ⁸ Awo n'ayemera n'alangira eigye lya Isiraeri n'a bakoba nti mwafulumiire ki okusimba enyiriri gyanyu? nze tindi Mufirisuuti naimwe baidu ba Sawulo? mwerondere omusaiza aserengete gye ndi. ⁹ Bw'eyasobola okulwana nanze n'a ngita, kale twabba baidu banyu: naye bwe mwamusinga ni mwita, kale imwe mwaba baidu baisu ne mutuweererya. ¹⁰ Omufirisuuti n'atumula nti nsoomozerye eigye lya Isiraeri watyanu: mumpe Omusaiza tulwane fembiri. ¹¹ Awo Sawulo n'e Isiraeri yenayena bwe baawuliire ebigambo ebyo eby'Omufirisuuti, ni bakeŋentererwa ne batya inu. ¹² Awo Dawudi yabbaire mwana wa Mwefulaasi oyo ow'e Besirekemuyuda, eriina lye Yese; era yabbaire n'a bataane be munaana: era Omusaiza yabbaire mukaire ku mirembe gya Sawulo ng'a kootakoota mu bantu. ¹³ N'a bataane ba Yese abakulu abasatu babbaire basengereirye Sawulo mu ntalo: n'a bataane be abasatu abayabire mu ntalo amaina gaabwe Eriyaabu omuberyeberye, n'e yamwirireku Abinadaabu, n'o w'o kusatu Sama. ¹⁴ N'o Dawudi niiye yabbaire omutomuto: n'a bakulu abasatu ni basengererya Sawulo. ¹⁵ Era Dawudi n'airaŋananga okuva eri Sawulo okuliisya entama gya itaaye e Besirekemu. ¹⁶ Omufirisuuti n'asemberanga amakeeri n'olweigulo, ni yeeyolekeranga enaku ana. ¹⁷ Awo Yese n'akoba Dawudi mutaane we nti twalira bagande bo efa ey'eŋaanu eno ensiike n'e migaati gino eikumi, oyanguwe obitwale mu lusiisira eri bagande bo; ¹⁸ otwalire omukulu w'o lukumi lwabwe ebitole bino eikumi eby'a mata amakalu, obone bagande bo bwe bali, obatooleku omusingo gwabwe. ¹⁹ Era Sawulo nabo abasaiza bonabona aba Isiraeri babbaire mu kiwonvu Era nga balwana n'Abafirisuuti. ²⁰ Dawudi n'a golokoka amakeeri mu makeeri, n'alekera entama omusumba n'airira ebintu n'a yaba nga Yese bwe yamulagiire; n'atuuka mu kifo eky'a magaali, eigye eryabbaire lifuluma okulwana nga balanga emiruka egy'o bulwa. ²¹ Awo Isiraeri n'Abafirisuuti ni basimba enyiriri, eigye nga lyolekera eigye. ²² Dawudi n'aleka omugugu gwe mu mukono gw'o mukuumi w'e migugu, n'airuka mbiro eri eigye n'aiza n'asugirya bagande be. ²³ Awo bwe yabbaire alogya nabo, bona, ni wayambuka oyo omuzira, Omufirisuuti ow'e Gaasi, eriina lye Goliyaasi, ng'ava mu nyiriri egy'Abafirisuuti n'atumula ng'ebigambo ebyo bwe byabbaire: Dawudi n'abiwulira. ²⁴ Awo abasaiza bonabona aba Isiraeri bwe baboine Omusaiza ni bamwiruka ni batya inu. ²⁵ Abasaiza ba Isiraeri ni batumula nti muboine omusaiza oyo ayambukire? mazima okusoomoza Isiraeri kyaviire ayambuka: awo olwatuukire omuntu eyamwita kabaka yamugaigawalya n'o bugaiga bungi, era yamuwa n'o muwala we, era yafuula enyumba ya itaaye okubba ey'eidembe mu Isiraeri. ²⁶ Awo Dawudi n'atumula n'abaiza ababbaire bemereire okumuliraana nti omuntu yakolebwa atya eyaita Omufirisuuti ono, n'atoola ekivumi ku Isiraeri? kubanga Omufirisuuti ono atali mukomole niye ani asoomoza eigye lya Katonda omulamu? ²⁷ Abantu ne bamwiramu bati nga batumula nti atyo bweyakolebwa omuntu eyamwita. ²⁸ Ne Eriyaabu mugande we omukulu n'awulira bwe yatumwire n'abasaiza; obusungu ni bumukwata Eriyaabu eri Dawudi, n'atumula nti oserengeteire ki? N'e ntama egyo entono wagirekeire yani ku itale? Maite amalala go n'e kyeju ekiri mu mwoyo gwo, kubanga iserengetere okubona olutalo. ²⁹ Dawudi n'atumula nti nkolere ki atyanu? Wabula nsonga? ³⁰ N'amuvaaku n'akyukira ogondi n'atumula ebigambo ebimu n'ebyo: abantu ni bamwiramu ate batyo nga bwe bamwiriremu oluberyeberye. ³¹ Awo ebigambo bwe byawuliirwe Dawudi bye yatumwire ni babitumulira mu maiso ga Sawulo; n'a mutumya. ³² Dawudi n'akoba Sawulo nti Omuntu yenayena aleke akuwaamu omwoyo ku lulwe; omwidu wo eyayaba n'a lwana n'Omufirisuuti oyo. ³³ Sawulo n'akoba Dawudi nti tosobola kusisinkana n'o Mufirisuuti oyo okulwana naye: kubanga iwe oli mwisuka bwisuka, naye iye musaiza mulwani okuva mu butobuto bwe; ³⁴ Dawudi n'akoba Sawulo nti omwidu wo yakuumanga entama gya itaaye; awo bwe waizanga empologoma oba eidubu n'eriitoola omwana gw'e ntama mu kisibo, ³⁵ ni nfulumanga ne ngisengererya ni ngikubba ni ngiwonya nga ngitoola mu munwa gwayo: awo bwe yangolokokerangaku ni ngikwata ku kirevu kyayo ni ngikubba ni ngiita. ³⁶ Omwidu wo yakubbire empologoma era n'eidubu: n'o mufirisuuti oyo atali mukomole alibba ng'e imu ku gyo kubanga asoomozerye eigye lya Katonda omulamu. ³⁷ Dawudi n'atumula nti Mukama eyamponyerye mu bidete by'e mpologoma n'o mu bidete by'e idubu, yakunponya n'o mu mukono gw'Omufirisuuti oyo. Sawulo n'akoba Dawudi nti Yaba, era Mukama yabba naiwe. ³⁸ Awo Sawulo n'avalisya Dawudi ebivaalo bye, n'a mutikira enkoofiira ey'e kikomo ku mutwe gwe, n'a muvaalisya ekizibawo eky'e kikomo. ³⁹ Awo Dawudi ne yeesiba ekitala kye ku bivaalo bye, n'agezyaaku okutambula; kubanga yabbaire akaali kubyegezyaamu. Awo Dawudi n'a koba Sawulo nti tinsobola kwaba na bino; kubanga nkaali kubyegezyaamu. Dawudi n'abyeyambulamu. ⁴⁰ N'airira omwigo gwe mu mukono gwe, ni yeerondera amabbaale amaweweevu mataano mu kaiga, n'agateeka mu nsawo ey'o musumba gye yabbaire, mu ndyanga ye; n'e nvuumuulo ye yabbaire mu mukono gwe: n'a semberera Omufirisuuti. ⁴¹ Awo Omufirisuuti n'aiza n'amusemberera Dawudi; N'o musaiza eyatwalanga engabo n'amutangira. ⁴² Awo Omufirisuuti bwe yalingirelingire n'a bona Dawudi, n'amunyooma: kubanga nga yabbaire mwisukaisuka, era mumyofu, n'a maiso ge nga masa. ⁴³ Omufirisuuti n'akoba Dawudi nti nze ndi mbwa n'o kwiza n'o iza gye ndi n'emiigo? Omufirisuuti n'alaama Dawudi eri bakatonda be. ⁴⁴ Omufirisuuti n'akoba Dawudi nti Iza gye ndi ngabire omubiri gwo enyonyi egy'o mu ibbanga n'e nsolo egy'o mu nsiko. ⁴⁵ Awo Dawudi n'akoba Omufirisuuti nti Oiza gye ndi n'ekitala n'olunyago n'e isumu: naye nze ngiza gy'oli mu liina lya Mukama ow'e igye, Katonda w'e igye lya Isiraeri, ly'o soomozerye: ⁴⁶ Watyanu Mukama yakugabula mu mukono gwange; era nakukubba ni nkutoolaku omutwe gwo; era nagabira enyonyi egy'o mu ibbanga n'e nsolo egy'o mu nsiko emirambo egy'e igye ery'Abafirisuuti; ensi gyonagyona gitegeere nga mulimu Katonda mu Isiraeri: ⁴⁷ era ekibiina kino kyonakyona kitegeere nga Mukama talokola na kitala n'e isimu: kubanga olutalo lwa Mukama, yena yabagabula mu mukono gwaisu. ⁴⁸ Awo olwatuukire Omufirisuuti bwe yagolokokere n'a sembera okusisinkana n'o Dawudi, awo Dawudi n'ayanguwa n'airuka mbiro eri eigye okusisinkana n'Omufirisuuti. 49 Awo Dawudi n'ayingirya engalo gye mu nsawo ye n'atoolamu eibbaale n'alivuumuula n'akubba Omufirisuuti ekyeni; eibbaale ni liiyingira mu kyeni kye, n'agwa nga yenfundikire. ⁵⁰ Awo Dawudi n'a wangula atyo Omufirisuuti n'envuumuulo n'e ibbale, n'a kubba omufirisuuti n'a mwita; naye nga mubula kitala mu mukono gwa Dawudi. ⁵¹ Awo Dawudi n'airuka mbiro n'ayemerera ku Mufirisuuti, n'airira ekitala kye n'akisowola mu kiraato kyakyo, n'amwita n'amutemaku omutwe nakyo. Awo Abafirisuuti bwe baboine omuzira waabwe ng'afiire ni bairuka. ⁵² Awo abasaiza ba Isiraeri n'ab'e Yuda ni bagolokoka ne batumulira waigulu ni basengererya Abafirisuuti okutuusya lw'otuuka e Gaayi n'o ku miryango gya Ekuloni. N'Abafirisuuti abaasumitiibwe ebiwundu ni bagwa kungira eira e Saalayimu, okutuusya e Gaasi ne Ekuloni. ⁵³ Abaana ba Isiraeri ne baleka okusengererya Abafirisuuti ni bairawo ni banyaga olusiisira lwabwe. ⁵⁴ Awo Dawudi N'airira omutwe gw'Omufirisuuti n'agutwala e Yerusaalemi; Yena n'ateeka eby'okulwanisya bye mu weema ye. ⁵⁵ Era Sawulo bwe yaboine Dawudi ng'afuluma okulwana n'Omufirisuuti, n'akoba Abuneeri, omukulu w'eigye, nti Abuneeri, omwisuka ono niiye mwana w'ani? Abuneeri n'atumula nti nga iwe bw'oli omulamu, ai kabaka, timaite. ⁵⁶ Kabaka n'atumula nti bulya itaaye w'o mwisuka oyo bw'ali. ⁵⁷ Awo Dawudi bwe yabbaire airawo ng'aitire Omufirisuuti, Abuneeri n'amutwala n'amuleeta eri Sawulo ng'alina omutwe gw'Omufirisuuti mu mukono gwe. ⁵⁸ Sawulo n'amukoba nti iwe oli mwana w'ani, mwisuka iwe? Dawudi n'airamu nti nze ndi mwana wa mwidu wo Yese Omubesirekemu.