¹ Awo olwatuukire bwe yamalire okutumula n'o Sawulo, emeeme ya Yonasaani n'e gaitibwa n'e meeme ya Dawudi, Yonasaani n'amutaka ng'e meeme ye iye. ² Sawulo n'a mutwala ku lunaku olwo n'atamuganya kwirayo ate eika mu nyumba ya itaaye. ³ Awo Yonasaani n'o Dawudi ne balagaana endagaanu kubanga yamutakire ng'e meeme ye iye. ⁴ Yonasaani ni yeeyambulamu omunagiro gwe, gwe yabbaire avaire n'aguwa Dawudi, n'e kivaalo kye, era n'e kitala kye n'o mutego gwe n'o lukoba lwe. ⁵ Dawudi n'a yabanga buli Sawulo gye yamutumanga ne yebitya n'a magezi: Sawulo n'a mufuula omukulu w'abasaiza abalwani, abantu bonabona ni bakisiima, era n'a baidu ba Sawulo. ⁶ Awo olwatuukire nga baiza, Dawudi bwe yairirewo ng'aitire omufirisuuti, abakali ni bava mu bibuga byonabyona ebya Isiraeri, nga bemba era nga bakina, okusisinkana n'o kabaka Sawulo, nga balina ebitaasa, nga basanyuka, nga bakwaite ebivuga. ⁷ Abakali ni bemberagana nga bazanya ni batumula nti Sawulo aitire enkumi gye, n'o Dawudi emitwalo gye. ⁸ Sawulo n'a sunguwala inu ekigambo ekyo ni kimunyiizya; n'atumula nti Dawudi bamuwaire emitwalo, nzena bampaire enkumi gyonka: kale Asobola okweyongera okubba naki wabula obwakabaka? ⁹ Awo Sawulo n'a mulingirira Dawudi n'e riiso eibbiibi okuva ku lunaku olwo n'o kweyongerayo. ¹⁰ Awo olwatuukire Amakeeri omuzimu omubbiibi ogwava eri Katonda ni gwiza ku Sawulo n'a maani, n'alagulira wakati mu nyumba: Dawudi n'akubba enanga n'e ngalo gye nga bwe yakolanga buli lunaku: era Sawulo yabbaire ne eisimu lye mu ngalo gye. ¹¹ Sawulo n'akasuka eisimu; kubanga yatumwire nti Nasumita Dawudi okukwatisya n’e kisenge. Dawudi ni yeewomera mu maiso ge emirundi ibiri. ¹² Awo Sawulo n'atya Dawudi kubanga Mukama yabbaire naye, era ng'aviire ku Sawulo. ¹³ Sawulo kyeyaviire amutoola w'ali n'amufuula omukulu we ow'o lukumi: n'a fulumanga n'a yingira mu maiso g'a bantu. ¹⁴ Dawudi ni yebitya n'a magezi mu mangira ge gonagona; era Mukama yabbaire naye. ¹⁵ Awo Sawulo bwe yaboine nga yebitya n'a magezi mangi inu, n'a mutekemukira. ¹⁶ Naye Isiraeri yenayena ne Yuda ne bamutaka Dawudi; kubanga yafulumanga n'a yingira mu maiso gaabwe. ¹⁷ Awo Sawulo n'akoba Dawudi nti bona, muwala wange omukulu Merabu ndimukuwa okumukwa: kyooka ombeereranga omuzira olwanenga entalo gya Mukama. Kubanga Sawulo yatumwire nti Omukono gwange guleke okumubbaaku, naye omukono gw'Abafirisuuti gumubeeku. ¹⁸ Awo Dawudi n'akoba Sawulo nti ninze ani, n'o bulamu bwange kiki, oba enyumba ya itawange mu Isiraeri, nze okubba muko wa kabaka? ¹⁹ Naye olwatuukire ebiseera bwe byaizire bwe kyagwaniire okumuwa Dawudi Merabu muwala wa Sawulo, awo ne bamuwa Adulieri omumekolasi okumufumbirwa. ²⁰ Awo Mikali muwala wa Sawulo n'ataka Dawudi: ni bakobera Sawulo, ekigambo ekyo n'a kisiima. ²¹ Sawulo n'atumula nti Ndimumuwa abbe ekyambika gy'ali, n'o mukono gw'Abafirisuuti gulwane naye. Sawulo kyeyaviire akoba Dawudi nti atyanu wabba muko wange omulundi ogw'okubiri. ²² Awo Sawulo n'alagira abaidu be nti muteesye n'o Dawudi mu kyama mutumule nti bona, kabaka akusanyukira n'a baidu be bonabona bakutaka: kale atyanu bba muko wa kabaka. ²³ Awo abaidu ba Sawulo ni batumula ebigambo ebyo mu matu ga Dawudi. Dawudi n'atumula nti Mukyeta kigambo kitono okubba muko wa kabaka, ninze ani omusaiza omwavu era gwe batayetamu k'o buntu? ²⁴ Abaidu ba Sawulo ni bamubuulira nga batumula nti atyo Dawudi bw'atumwire. ²⁵ Sawulo n'atumula nti mutyo bwe mwakoba Dawudi nti kabaka tataka by'o buko byonabyona, wabula ebikuta by'Abafirisuuti kikumi, okuwalana n'e igwanga ku balabe ba kabaka. Era Sawulo yabbaire alowooza okwitisya Dawudi omukono gw'Abafirisuuti. ²⁶ Awo abaidu be bwe bakobeire Dawudi ebigambo ebyo, Dawudi n'asiima inu okubba muko wa kabaka. Awo enaku nga gikaali kubitawo; ²⁷ Dawudi n'agolokoka n'ayaba, iye n'abasaiza be, n'aita ku Bafirisuuti abasaiza bibiri; Dawudi n'aleeta ebikuta byabwe, n’abiwa kabaka omuwendo nga gutuukiriire, kaisi abbe muko wa kabaka. Awo Sawulo n'a muwa Mikali muwala we okumufumbirwa. ²⁸ Sawulo n'abona n'a tegeera nga Mukama ali n'o Dawudi; no Mikali muwala wa Sawulo n'amutaka. ²⁹ Awo Sawulo ni yeeyongera ate okutya Dawudi, Sawulo n'abba mulabe wa Dawudi enaku gyonagona. ³⁰ Awo abaami b'Abafirisuuti kaisi ni batabaala: awo olwatuukire buli lwe baatabaalanga, Dawudi ni yebityanga n'a magezi n'a singa abaidu ba Sawulo bonabona; eriina lye ni lyatiikirira inu.