¹ Awo Sawulo n'akoba Yonasaani mutaane we n'a baidu be bonabona baite Dawudi. Naye Yonasaani mutaane wa Sawulo yamusanyukiire oyo Dawudi. ² Yonasaani n'akobera Dawudi ng'a tumula nti Sawulo itawange ataka okukwita: kale atyanu, nkwegayiriire, weekuume amakeeri obbe mu kifo eky'e kyama weegise: ³ nzena naafuluma ni nyemerera ku mbali kwa itawange mu nimiro mw'oli, era nateesya n'o itawange ebigambo byo; era bwe ndibona ekigambo kyonakyona, ndikukobera. ⁴ Awo Yonasaani n'atumula n'o Sawulo itaaye ng'a tenda Dawudi okusa n’amukoba nti Kabaka tayonoonanga mwidu we Dawudi; kubanga takwonoonanga iwe, era kubanga ebikolwa bye byabbanga bisa inu gy'oli; ⁵ kubanga yateekere obulamu bwe mu mukono gwe n'akubba Omufirisuuti, Mukama n’akolera Isiraeri yenayena obulokozi obukulu: wabuboine n'o sanyuka: kale kiki ekikutakisya okwonoona omusaayi ogubulaku musango, okwita Dawudi awabula nsonga? ⁶ Sawulo n'a wulira eidoboozi lya Yonasaani: Sawulo n'alayira nti Mukama nga bwali omulamu, taliitibwa. ⁷ Yonasaani n'ayeta Dawudi, Yonasaani n'amutegeezya ebigambo ebyo byonabyona. Yonasaani n'aleeta Dawudi eri Sawulo, n'abbanga mu maiso ge ng'o luberyeberye. ⁸ Ni waba entalo ate: Dawudi n'atabaala n'a lwana n'Abafirisuuti, n'abaita olwita olunene; ni bairuka mu maiso ge. ⁹ Awo omuzimu omubbiibi ogwaviire eri Mukama gwabbaire ku Sawulo, ng'atyaime mu nyumba iye ng'akwaite eisimu lye mu ngalo gye; n'o Dawudi ng'a kubba enanga n'e ngalo gye: ¹⁰ Awo Sawulo n'agezyaaku okusumita Dawudi n'o kumukwatisya n'e kisenge n'e isimu; naye ni yeemulula mu maiso ga Sawulo, n'a kubba eisimu mu kisenge: Dawudi n'a iruka n'a wona obwire obwo. ¹¹ Awo Sawulo n'atuma ababaka mu nyumba ya Dawudi, okumukuuma, bamwite amakeeri: Mikali wa Dawudi n'amukobera ng'atumula nti Bw'otoowonye bulamu bwo obwire buno, waitibwa amakeeri. ¹² Awo Mikali n'aikirya Dawudi mu dirisa: n'a yaba n'airuka n'a wona. ¹³ Mikali n'airira terafi n'a muteeka mu kitanda, n'a teeka ekigugu eky'e byoya by'e mbuli emitwe, n'akibikaku emigaire. ¹⁴ Awo Sawulo bwe yatumire ababaka okukwata Dawudi, n'atumula nti Alwaire. ¹⁵ Sawulo n'atuma ababaka okubona Dawudi ng'a tumula nti mumundeetere mu kitanda kaisi mwite. ¹⁶ Awo ababaka bwe bayingiire, bona, terafi ng'ali mu kitanda, ekigugu eky'e byoya by'e mbuli nga kiri mitwe. ¹⁷ Sawulo n'akoba Mikali nti ombeyeire ki otyo, n'oleka omulabe wange ayabe n'o kuwona awonere? Mikali n'a iramu Sawulo nti Yankobere nti Ka njabe; nandikwitiire ki? ¹⁸ Awo Dawudi n'airuka n'a wona n'a iza eri Samwiri e Laama, n'amukobera byonabyona Sawulo bye yamukolere. Iye n'o Samwiri ni baaba ne batyama e Nayosi. ¹⁹ Ne bakobera Sawulo nti bona, Dawudi ali e Nayosi mu Laama. ²⁰ Sawulo n'atuma ababaka okukwata Dawudi: awo bwe baboine ekibiina kya banabbi nga balagula n'o Samwiri ng'ayemereire nga niigwo mutwe gwabwe, awo omwoyo gwa Katonda ni gwiza ku babaka ba Sawulo, ni balagula nabo. ²¹ Awo bwe bamukobeire Sawulo, n'atuma ababaka abandi, era boona ni balagula. Awo Sawulo n'atuma ababaka ate omulundi ogw'okusatu, era boona ne balagula. ²² Awo yeena n'ayaba e Laama, n'a iza awali ensulo enene eri e Seku: n'a buulya n'a tumula nti Bali waina Samwiri n'o Dawudi? Ni wabba eyatumwire nti bona, bali e Nayosi mu Laama. ²³ N'ayabayo e Nayosi mu Laama: omwoyo gwa Katonda ni gwiza ku iye era, ni yeeyongerayo n'a lagula okutuusya lwe yaizire e Nayosi mu Laama. ²⁴ Era yeena ne yeeyambulamu engoye gye, naye n'a lagulira mu maiso ga Samwiri n'agalamira nga abulaku ky'a vaire n'a zibya obwire obwo n'akyeesya obwire. Kyebaviire batumula nti n'o Sawulo ali mu banabbi?