¹ Awo Dawudi n'airuka okuva e Nayosi mu Laama n'aiza n'atumulira mu maiso ga Yonasaani nti nkolere ki? buliwaina obutali butuukirivu bwange? era kiriwa ekibbiibi kyange mu maiso ga itaawo n'asagira obulamu bwange? ² N'amukoba nti kiirire edi; toiza kufa: bona, itawange tabbaaku ky'akola oba kikulu oba kidiidiiri ky'atambikulira: era iitawange yandingisiire ki ekigambo ekyo? ti bwe kiri. ³ N'okulayira Dawudi n'alayira n'atumula nti itaawo amanyiire dala nga bwe ŋanjire mu maiso go; n'atumula nti Yonasaani tamanyanga kino, aleke okunakuwala: naye mazima nga Mukama bw'ali omulamu, era nga naiwe bw'oli omulamu, wakati wange n'okufa wasigaire katono inu. ⁴ Awo Yonasaani Kaisi n'akoba Dawudi nti Buli kintu emeeme yo ky'etaka kyonakyona okukola ndikukolera. ⁵ Awo Dawudi n'akoba Yonasaani nti bona, eizo omwezi gwaboneka, nzena tinadirekere kutyama n'o kabaka ng'alya: naye ka njabe negise mu nsiko okutuusya ku lunaku olw'o kusatu olw'e igulo. ⁶ Itaawo bw'eyambuulya, Kaisi n'o tumula nti Dawudi andagire n'a neegayirira inu watyanu ayabe mangu e Besirekemu ekyalo kye: kubanga sadaaka gy'edi eya buli mwaka ey'e nyumba ye yonnayona. ⁷ Awo bw'e yatumula nti busa; omwidu wo yabba n'e mirembe: naye bweyasunguwala, kale tegeera ng'ateeserye kabbiibi. ⁸ Kale kola omwidu wo obusa: kubanga wayingirya omwidu wo mu ndagaano ya Mukama naiwe: naye oba ng'o butali butuukirivu buli mu ninze, ngita wenka; kubanga wandindeeteire ki eri itaawo? ⁹ Yonasaani n'atumula nti kireke okukubbaaku n'akatono: kubanga mba kumanya n'akatono nga itawange ateeserye akabbiibi okukutoolaku, kale tinandikukobeire? ¹⁰ Awo Dawudi n'akoba Yonasaani nti itaawo bweyabba ng'a kwiriremu n'eibboogo alinkobera yani? ¹¹ Yonasaani n'akoba Dawudi nti iza tufulume twabe mu nsiko. Ni bafuluma bombiri ni baaba mu nsiko. ¹² Awo Yonasaani n'akoba Dawudi nti Mukama, Katonda wa Isiraeri, abbe mujulizi; bwe naabba nga malire okukemenkererya itawange nga mu kiseera kino amakeeri oba ku lw'okusatu, bona, bwe walibba obusa eri Dawudi, kale tindikutumira ni nkikubikulira? ¹³ Mukama akole atyo Yonasaani n'okusingawo, itawange bw'alibba ng'asiimire okukukola okubbiibi, ni ntakikubikulira ni nkusindika oyabe mirembe: era Mukama abbe naiwe nga bwe yabbanga n'o itawange. ¹⁴ Wena olindaga ekisa kya Mukama nga nkaali mulamu, ndeke okufa; ¹⁵ so ti kukoma ku ekyo kyonka, era naye n'e naku gyonagyona tolisalaku kisa ky'o ku nyumba yange niiwo awo, okutuusya Mukama lw'alimala okusalaku abalabe ba Dawudi buli mumu ku nsi yonayona. ¹⁶ Awo Yonasaani n'alagaana endagaanu n'e nyumba ya Dawudi nti n'o Mukama aligivunaana mu mukono gw'abalabe ba Dawudi. ¹⁷ Yonasaani n'alayirya Dawudi ate, olw'okutaka kwe yamutakire: kubanga yamutakire nga bwe yatakire emeeme ye iye. ¹⁸ Awo Yonasaani kaisi n'a mukoba nti eizo omwezi gwaboneka: era bakumaganaga, kubanga entebe yo yabba njereere. ¹⁹ Awo bw'olimala enaku eisatu, n'o serengeta mangu n'o iza mu kifo mwe wegisira ekigambo ekyo bwe kyabbairewo, n'obba awali eibbaale Ezeri: ²⁰ Nzena ndirasa obusaale busatu ku mbali kwalyo, nga nteeba sabbaawa. ²¹ Kale, bona, ndituma omwana nga ntumula nti Yaba osagire obusaale. Bwe ntama omwana nti bona, obusaale buli ku luuyi luno gye ndi: kale n'o butwala n'o iza; kubanga waliwo emirembe gy'oli so wabula kabbiibi, nga Mukama bw'ali omulamu. ²² Naye bwe ndikoba omwana ntyo nti bona, obusaale buli ku luuyi olw'o mumaiso go: kale ni weirukira: kubanga Mukama ng'a kusindikire. ²³ Era ekigambo ekyo kye twatumwireku iwe nanze, bona, Mukama ali wakati wo nanze enaku gyonagyona. ²⁴ Awo Dawudi ni yegisa mu nsiko: awo omwezi bwe gwabonekere, kabaka ni yeetyamira okulya ku mere. ²⁵ Kabaka n'a tyama ku ntebe ye ng'o lundi, niiyo entebe eriraine ekisenge; Yonasaani n'ayemerera. Abuneeri n'a tyama ku lumpete lwa Sawulo: naye entebe ya Dawudi yabbaire njereere. ²⁶ Naye Sawulo teyabbaireku kye yatumwire ku lunaku olwo: kubanga yalowoozere nti aliku ky'abbaire, ti mulongoofu; mazima ti mulongoofu. ²⁷ Awo olwatuukire Amakeeri omwezi nga gumalire okuboneka, niilwo lunaku olw'okubiri, entebe ya Dawudi n'ebba njereere: Sawulo n'akoba Yonasaani mutaane we nti kiki ekiroberya mutaane wa Yese okwiza ku mere waire eizo waire watyanu? ²⁸ Yonasaani n'airamu Sawulo nti Dawudi yandagiire ng'a neegayirira inu okwaba e Besirekemu: ²⁹ n'atumula nti Leka oyabe, nkwegayiriire; kubanga enyumba yaisu balina sadaaka mu kyalo; n'o mugande wange yandagiire okubbaawo: kale oba nga ŋanjire mu maiso go, leka njabe, nkwegayiriire, mbone bagande bange. Kyeyaviire aleka okwiza ku meenza ya kabaka. ³⁰ Awo obusungu ni bukwata Sawulo eri Yonasaani n'a mukoba nti iwe omwana w'o mukali omukakanyavu omujeemu, timaite nga walondere mutaane wa Yese okwekwatisya ensoni, n'okukwatisya ensoni obwereere bwa mawo? ³¹ Kuba mutaane wa Yese ng'a kaali mulamu ku itakali, tolinywezebwa iwe waire obwakabaka bwo. Kale atyanu tuma omunsyomere, kubanga taaleke kufa. ³² Yonasaani n'airamu Sawulo itaaye n'a mukoba nti ekyabba kimwitisya kiki? akolere ki? Sawulo n'akasuka eisimu lye okumusumita: Yonasaani kwe yategeereire itaaye ng'a maliriire okwita Dawudi. ³³ Sawulo n'a kasuka eisimu lye okumusumita: Yonasaani kwe yategeereire itaaye ng'a maliriire okwita Dawudi. ³⁴ Awo Yonasaani. n'a golokoka ku meenza ng'aliku ekiruyi kingi, n'atalya ku mere yonayona ku lunaku olw'o kubiri olw'o mwezi: kubanga yanakuwaire olwa Dawudi, kubanga itaaye yabbaire amuwemukiire. ³⁵ Awo olwatuukire Amakeeri Yonasaani n'afuluma n'ayaba mu nsiko mu kiseera kye yalagaine n'o Dawudi, n'o mwisuka omutomuto ng'ali naye. ³⁶ N'akoba omwisuka we nti iruka osagiire obusaale bwe ndasa. Omwisuka ng'a iruka n'alasa akasaale ku luuyi olw'o mu maiso ge. ³⁷ Awo omwisuka bwe yatuukire mu kifo eky'a kasaale Yonasaani ky'alasirya, Yonasaani n’a koowoola omwisuka n'atuula nti akasaale tikali ku luuyi olw'o mu maiso go? ³⁸ Yonasaani n'akoowoola omwisuka nti iruka, yanguwa, tolwawo. Omwisuka wa Yonasaani n'alonda obusaale, n'aiza eri mukama we. ³⁹ Naye omwisuka tiyabbaireku kye yategeire: Yonasaani n'o Dawudi bonka niibo bamaite ekigambo. ⁴⁰ Awo Yonasaani n'awa omwisuka we ebintu bye, n'amukoba nti yaba ogitwale mu kibuga. ⁴¹ Awo omwisuka ng'ayabire Dawudi n'agolokoka mu kifo ekyabbaire ku luuyi olw'o bukiika obulyo, n'avuunama amaiso ge n'a kutama emirundi isatu: ni banywegeragana ni bakunga bonka na bonka okutuusya Dawudi lwe yayingiriirye, ⁴² Yonasaani n'akoba Dawudi nti yaba mirembe kubanga tulayiire fembiri mu liina lya Mukama nga tutumula nti Mukama yabbanga wakati wange naiwe era wakati w'e izaire lyange n'eizaire lyo, enaku gyonagyona. N'a golokoka n'ayaba: Yonasaani n'ayingira mu kibuga.