¹ Awo Dawudi n'atuuka e Nobu eri Akimereki kabona: Akimereki n'aiza okusisinkana Dawudi ng'atengera n'a mukoba nti obbeereire ki omumu, so wabula muntu naiwe? ² Dawudi n'akoba Akimereki kabona nti Kabaka yantumire omulimu n'ankoba ati tiwabba muntu eyamanya ekigambo kyonakyona eky'o mulimu gwe nkutuma waire bye nkulagiire: era n'abalagiire abaisuka egindi n'e gindi. ³ Kale kiki ekiri wansi w'o mukono gwo? mpa emigaati itaanu mu mukono gwange oba kyonakyona ekiriwo. ⁴ Awo kabona n'a iramu Dawudi n'a tumula nti wabula mugaati bugaati wansi w'o mukono gwange, naye omugaati omutukuvu niigwo guliwo; kyooka abaisuka oba nga beekuumire obutakwata ku bakali. ⁵ Dawudi n'a iramu kabona n'a mukoba nti mazima twaziyiziibwe okubba n'a bakali enaku nga isatu; bwe naviireyo, ebintu by'a baisuka byabbaire bitukuvu, waire nga lugendo bugendo; kale watyanu ebintu byabwe tibirisinga einu okubba ebitukuvu? ⁶ Awo kabona n'amuwa emigaati emitukuvu: kubanga tiyabbaireyo mugaati wabula emigaati egy'o kulaga, egyatoolebwanga mu maiso ga Mukama, okuteekawo emigaati egibuguma ku lunaku kwe gyatooleibwewo. ⁷ Era omuntu ow'o ku baidu ba Sawulo yabbaireyo ku lunaku olwo, ng'a ziyizibwa mu maiso ga Mukama; n'e riina lye yabbaire Dowegi Omwedomu, omukulu w'a basumba ba Sawulo. ⁸ Dawudi n'a koba Akimereki nti Era wabula wano eisimu waire ekitala wansi w'o mukono gwo? kubanga tinaleetere wamu mawange kitala kyange waire ebyokulwanisya byange, kubanga omulimu gwa kabaka gwabbaire gwo kwanguwa. ⁹ Kabona n'a tumula nti Ekitala kya Goliyaasi Omufirisuuti gwe waitiire mu kiwonvu Era, bona, kiri wano nga kizingiibwe mu kiwero enyuma w'e kanzo: oba otaka okutwala ekyo, kitwale; kubanga wabula kindi wano wabula ekyo. Dawudi n'atumula nti wabula kikyekankana ekyo; kimpe. ¹⁰ Awo Dawudi n'agolokoka n'a iruka ku lunaku olwo olw'o kutya Sawulo, n'ayaba eri Akisi kabaka w'e Gaasi. ¹¹ Abaidu ba Akisi ni bamukoba nti Dawudi oyo ti niiye kabaka w'e nsi? tibaayemberagaine ku iye nga bakina, nga batumuka nti Sawulo aitire enkumi gye, n'o Dawudi emitwaalo gye? ¹² Dawudi n'agisa ebigambo ebyo mu mwoyo gwe, n'atya inu Akisi kabaka w'e Gaasi. ¹³ Awo n'awaanyisya empisa gye mu maiso gabwe, ni yeeralukyalalukya mu mikono gyabwe, n’ayagulayagula ku njigi egya wankaaki, n'akulukutya amatanta mu birevu bye. ¹⁴ Awo Akisi kaisi n'akoba abaidu be nti abaisu, muboine omusaiza ng'a gwiremu eiralu: kale mumuleeteire ki gye ndi? ¹⁵ Mbuliirwe abalalu n'okuleeta ni muleeta olusaiza luno okulalukira mu maiso gange? olusaiza luno lwayingira mu nyumba yange?