¹ Dawudi kyeyaviire avaayo, n'airuka n'atuuka ku mpuku ya Adulamu: awo bagande be n'e nyumba ya itaaye yonayona bwe bakiwuliire, ni baserengeta ne baabayo gy'ali. ² Awo buli muntu eyabbaire abona enaku na buli muntu eyabbaire neibbanja na buli eyabbaire n'o bwinike, ni bakuŋaana gy'ali; n'afuuka omukulu waabwe: awo ni wabba naye abasaiza nga bina. ³ Awo Dawudi n'a vaayo n'a yaba e Mizupa ekye Mowaabu: n'akoba kabaka wa Mowaabu nti itawange n'o mawange bafulume babbe naimwe, okutuusya lwe ndimanya Katonda by'alinkolera. ⁴ Awo n'abaleeta mu maiso ga kabaka wa Mowaabu: ni batyama naye ekiseera kyonakyona Dawudi ng'akaali mu mpuku. ⁵ Awo nabbi Gaadi n'akoba Dawudi nti tobba mu mpuku; yaba, otuuke mu nsi ya Yuda. Awo Dawudi n'a yaba n'a tuuka mu kibira Keresi. ⁶ Awo Sawulo n'awulira nga Dawudi abonekere n'a basaiza abaali naye: era Sawulo yabbaire atyaime e Gibeya, munda w'o mumyuliru mu Laama, ng'a kwaite eisimu lye mu ngalo, n'abaidu be bonabona babbaire bemereire okumwetooloola. ⁷ Sawulo n'akoba abaidu be ababbaire beemereire okumwetooloola nti Muwulire, imwe Ababenyamini; mutaane wa Yese aliwaina buli muntu ku imwe enimiro n'e nsuku egy'e mizabbibu, alibafuula mwenamwena okubba abaami b'e nkumi era abaami b'e bikumi; ⁸ mwena ne muneekobaana, so wabula ambikulira mutaane wange bw'alagaana endagaanu n'o mutaane wa Yese, so wabula ku imwe ansaasiire, waire antegeeza nga mutaane wange yamperereire omwidu wange okuteega nga watyanu? ⁹ Awo Dowegi Omwedomu, eyayemereire awali abaidu ba Sawulo, Kaisi nairamu n'atumula nti naboine mutaane wa Yese ng'aiza e Nobu, eri Akimereki mutaane wa Akitubu. ¹⁰ N'amubuulirya eri Mukama n'amuwa ebyokulya n'a muwa ekitala kya Goliyaasi omufirisuuti. ¹¹ Awo kabaka kaisi n'atuma okweta Akimereki kabona, mutaane wa Akitubu, n'e nyumba yonayona eya itaaye: bakabona ababbaire e Nobu ni baiza bonabona eri kabaka. ¹² Sawulo n'atumula nti wulira, iwe mutaane wa Akitubu. N'airamu nti ninze ono, mukama wange. ¹³ Sawulo n'amukoba nti Mwaneekobaniire ki, iwe n'o mutaane wa Yese, kubanga wamuwaire emigaati n'ekitala; n'omubuulirya eri Katonda, angolokokereku, okuteega nga watyanu? ¹⁴ Awo Akimereki n'airamu kabaka n'atumula nti era yani ku baidu bo bonabona amwekankana Dawudi obwesigwa, niiye muko wa kabaka, era ayingizibwa mu kuteesya kwo era ow'e kitiibwa mu nyumba yo? ¹⁵ Nsokere watyanu okumubuulirya edi Katonda? kiirire edi: kabaka aleke okuteekaku omwidu we ekigambo kyonakyona, waire enyumba ya itawange yonayona: kubanga omwidu wo abulaku ky'amaite ku bino byonabyona, waire ebitono waire ebingi. ¹⁶ Kabaka n'atumula nti tooleke kufa, Akimereki, iwe n'e nyumba ya itaawo yonayona, ¹⁷ Awo kabaka n'akoba abambowa ababbaire bemereire okumwetooloola nti mukyuke mwite bakabona ba Mukama; kubanga n'o mukono gwabwe guli n'o Dawudi, era kubanga baamaite nga yairukire, ne batakimbikulira. Naye abaidu ba kabaka ni bagaana okuteekawo omukono gwabwe okugwa ku bakabona ba Mukama. ¹⁸ Awo kabaka n'akoba Dowegi nti kyuka iwe obagweku bakabona. Awo Dowegi Omwedomu n'akyuka n'agwa ku bakabona, n'aita ku lunaku olwo abantu kinaana na bataanu abavaalanga ekanzo eya bafuta. ¹⁹ N'e Nobu, ekibuga kya bakabona, n'akiita n'o bwogi bw'e kitala, abasaiza era n'a bakali, abaana abatobato n'a banyonka, n'e nte n'e ndogoyi n'e ntama, n'o bwogi bw'e kitala. ²⁰ Awo omwana omumu owa Akimereki, mutaane wa Akitubu, eriina lye Abiyasaali, n'a wona n'airuka okusengererya Dawudi. ²¹ Abiyasaali n'a kobera Dawudi Sawulo ng'a itire bakabona ba Mukama. ²² Awo Dawudi n'a koba Abiyasaali nti Namaite ku lunaku olwo, Dowegi Omwedomu bwe yabbaireyo, nga talireka kumukobera Sawulo: nze naitisirye abantu bonabona ab'o mu nyumba ya itaawo. ²³ Iwe bba nanze, totya; kubanga oyo asagira obulamu bwange asagiira obulamu bwo: kubanga awali nze wabbbanga mirembe.