¹ Awo ne bakobera Dawudi nti bona, Abafirisuuti balwana n'e Keyira, era banyaga amawuuliro. ² Dawudi kyeyaviire abuulya Mukama nti njabe nkubbe Abafirisuuti abo? Mukama n'akoba Dawudi nti yaba okubbe Abafirisuuti olokole Keyira. ³ Abasaiza ba Dawudi ni bamukoba nti bona, tutiiriire wano mu Yuda: kale titulisinga inu bwe tulyaba e Keyira okulwana n'e igye ly'Abafirisuuti? ⁴ Awo Dawudi kaisi n'abuulya Mukama ate olw'okubiri. Mukama n'a mwiramu n'atumula nti Golokoka oserengete oyabe e Keyira; kubanga ndigabula Abafirisuuti mu mukono gwo. ⁵ Awo Dawudi n'a basaiza be ni baaba e Keyira, ni balwana n'Abafirisuuti, ni banyaga ente gyabwe, ni babaita olwita olunene. Awo Dawudi n'alokola abaatyama e Keyira. 6 Awo olwatuukire, Abiyasaali mutaane wa Akimereki bwe yairukire eri Dawudi e Keyira, yaserengetere ng'alina ekanzo mu mukono gwe. ⁷ Ni bakobera Sawulo nga Dawudi atuukire e Keyira. Sawulo n'atumula nti Katonda amugabwire mu mukono gwange: kubanga aigaliirwe munda mu kibuga ekirina enjigi n'e bisiba. ⁸ Awo Sawulo n'ayeta abantu bonabona okutabaala, okuserengeta okwaba e Keyira, okuzingizya Dawudi n'a basaiza be. ⁹ Dawudi n'ategeera Sawulo ng'amutakirya akabbiibi; n'akoba Abiyasaali kabona nti Leeta wano ekanzo. ¹⁰ Awo Dawudi n'atumula nti Ai Mukama, Katonda wa Isiraeri, omwidu wo awuliriire dala Sawulo nga ataka okwiza e Keyira, okuzikirirya ekibuga ku lwange. ¹¹ Abasaiza ab'e Keyira balimpaayo mu mukono gwe? Sawulo aliserengeta, ng'o mwidu wo bw'awuliire? Ai Mukama, Katonda wa Isiraeri, nkwegayiriire, kobera omwidu wo. Mukama n'atumula nti Aliserengeta. ¹² Awo Dawudi kaisi n'atumula nti Abasaiza ab'e Keyira balimpaayo nze n'abasaiza bange mu mukono gwa Sawulo? Mukama n'atumula nti Balikuwaayo. ¹³ Awo Dawudi n'a basaiza be, ababbaire nga lukaaga ni bagolokoka ni baaba okuva mu Keyira ni baaba buli gye basoboire okwaba. Ni bakobera Sawulo Dawudi ng'a wonere okuva mu Keyira: n'alekayo okutabaala. ¹⁴ Awo Dawudi n'atyama mu idungu mu bigo, n'abba mu nsi ey'e nsozi mu idungu ery'e Zifu. Sawulo n'amusagiranga buli lunaku, naye Katonda n'atamugabula mu mukono gwe. ¹⁵ Dawudi n'abona nga Sawulo atabaire okusagira obulamu bwe: era Dawudi yabbaire mu idungu ery'e Zifu mu kibira. ¹⁶ Awo Yonasaani mutaane wa Sawulo n'agolokoka, n'a yaba eri Dawudi mu kibira, n'a nywezya omukono gwe mu Katonda. ¹⁷ N'amukoba nti totya; kubanga omukono gwa Sawulo itawange tigulikubona; era iwe olibba kabaka wa Isiraeri nzena ndikwiririra obukulu; era n'ekyo Sawulo itawange akimaite, ¹⁸ Awo abo bombiri ni balagaanira endagaanu mu maiso ga Mukama: Dawudi n'abba mu kibira, Yonasaani n'airayo mu nyumba ye. ¹⁹ Awo ab'e Zifu ni bambuka nu baiza eri Sawulo e Gibeya nga batumula nti Dawudi tiyeegisa ewaisu mu bigo mu kibira ku lusozi Kakira oluli ku luuyi olw'o bukiika obulyo olw'e idungu? ²⁰ Kale atyanu, ai kabaka, serengeta, ng'e meeme yo yonayona bw'etaka okuserengeta; fena okumuwaayo mu mukono gwa kabaka kulibba kwaisu. ²¹ Sawulo n'atumula nti muweebwe Mukama omukisa; kubanga munsaasiire. ²² Mwabe, mbeegayiriire, mweyongere okwetegereza, mumanye mubone ekifo kye w'abba n'e yamuboineyo: kubanga bankobeire nti alina obugerengetanya bungi inu. ²³ Kale mubone, muzige ebifo byonabyona mwateegeire mwe yeegisire, mwirewo gye ndi so timuleka kwiza, nanze ndyaba naimwe: awo olulituuka, oba ng'ali mu nsi, ndimusagira ni mubona mu nkumi gyonagyona egya Yuda. ²⁴ Awo ni bagolokoka ni baaba e Zifu okukutangira Sawulo: naye Dawudi n'a basaiza be babbaire mu idungu ery'e Mawoni, mu Alaba ku luuyi olw'e idungu olw'obukiika obulyo. ²⁵ Sawulo n'abasaiza be ni baaba okumusagira. Ni bakobera Dawudi; kyeyaviire aserengeta awali olwazi, n'abba mu idungu ery'e Mawoni. Awo Sawulo bwe yakiwuliire, n'agoberera Dawudi mu idungu ery'e Mawoni. ²⁶ Sawulo n'ayaba ku mbali kw'o lusozi eruuyi, n'o Dawudi n'a basaiza be ku mbali kw'o lusozi eruuyi: Dawudi n'a yanguwa okuvaayo olw'o kutya Sawulo; kubanga Sawulo n'abasaiza be baazingizirye Dawudi N'abasaiza be enjuyi gyonagyona okubakwata. ²⁷ Naye nu waiza omubaka eri Sawulo ng'atumula nti yanguwaku oize; kubanga Abafirisuuti bakwegisire mu nsi. ²⁸ Awo Sawulo n'alekayo okusengererya Dawudi n'airayo, n'atabaala Abafirisuuti: ekifo ekyo kyebaaviire bakyeta Serakamalekosi. ²⁹ Awo Dawudi n'avaayo n'ayambuka n'abba mu bigo ebya Engedi.